£40m gu CnES is Comhairle na Gàidhealtachd 'son ùrachadh coimhearsnachd

Tha Comhairle nan Eilean Siar agus Comhairle na Gàidhealtachd am measg na gheibh maoineachadh bho phrògram Pride in Place aig Riaghaltas na Rìoghachd Aonaichte.

Tha suas ri £5bn a' dol gu 339 coimhearsnachdan am Breatainn airson phròiseactan ath-leasachaidh.

Gheibh an dà chuid Comhairle na Gàidhealtachd agus Comhairle nan Eilean Siar £20m an urra bhon sgeama.

Bidh an t-airgead ann thairis air deich bliadhna.

Tha an Riaghaltas ag ràdh gur e sgeama a th' ann a tha a' toirt guth dhan t-sluagh air càite is ciamar a bu chòir airgead a chosg gus coimhearsnachdan ath-bheothachadh is gum bi moit aca às ùr anns na sgìrean aca.

Tha e deatamach, thuirt iad, gun tèid conaltradh a dhèanamh le coimhearsnachdan air na prìomhachasan maoineachaidh a th' aca.

Thuirt am Prìomhaire, Keir Starmer, gur e "an rud as cudromaiche cò a cho-dhùineas mar a chosgar am maoineachadh: nàbaidhean, saor-thoilich agus na pàrantan as motha a tha eòlach air na coimhearsnachdan aca.

"'Son cus ro fhada bha daoine a' coimhead nam bailtean is nan sràidean aca a' dol bhuaithe is gun cumhachd aca stad a chur air bùithdean a bha air dùnadh is a tha falamh is pàircean a th' ann an droch staid. Tha sin seachad," thuirt e.

Chaidh airgead às an sgeama fhoillseachadh mar-thà do Mhoireibh is Siorrachd Obar Dheathain na bu tràithe am-bliadhna.

A thaobh Mhoireibh, thuirt an Riaghaltas gun deach còrr is 1,000 beachd a chur a-steach mar-thà a thaobh mar a ghabhadh piseach a thoirt air Eilginn, nam measg a' dèiligeadh ri bùithdean a tha falamh agus meadhan a' bhaile a sgeadachadh.

Tha barrachd fiosrachaidh mun phrògram Pride of Place ri fhaotainn an seo. , taobh a-muigh