Dàil air co-dhùnadh Ofcom air gearraidhean STV

Chuir riaghladair an telebhisein dàil air co-dhùnadh mu atharrachaidhean mòra a tha STV a' moladh air na seirbheisean naidheachd aca.

Tha STV airson an t-seirbheis naidheachd fa leth aca ann an ceann a tuath na h-Alba a ghearradh, agus na tha de phrògraman ionadail a tha iad a' dèanamh a lùghdachadh.

Thuirt Ofcom gun dèan iad co-dhùnadh air a' chùis a-nise às dèidh taghadh Pàrlamaid na h-Alba sa Chèitean, seach ron Chàisg mar a bha dùil.

Tha Ofcom ag ràdh gur e an àireamh àrd de fhreagairtean a fhuair iad ann an co-chomhairle a thàinig gu ceann tràth sa Ghearran as coireach gun deach dàil air a' cho-dhùnadh.

Rinn Aonadh an Luchd-naidheachd (NUJ) càineadh air an dàil is iad ag ràdh gun robh e na "adhbhar iongantais".

Thuirt an NUJ gum bu chòir do luchd-obrach is luchd-amhairc co-dhùnadh fhaighinn an-dràsta.

Fo na planaichean aig STV, bhiodh prògraman naidheachd uile a' tighinn à Glaschu is 's e sa mhòr-chuid na h-aon sgeulachdan a chìtheadh luchd-amhairc ann am meadhan is ceann a tuath na dùthcha.

Tha STV ag ràdh gum biodh luchd-naidheachd aca fhathast ann an Obar Dheathain, Dùn Dè is Inbhir Nis, is gur ann a tha iad a' feuchainn ris an t-seirbheis naidheachd aca "a dhèanamh seasmhach".

Tha Riaghaltas na h-Alba agus ceannardan phàrtaidhean eile aig Holyrood air na planaichean a chàineadh.

Bha stailc aon là aig an NUJ san Fhaoilleach mu na gearraidhean agus mun chunnart gun tèid daoine a chur às an dreuchd an aghaidh an toil.

Tha eas-aonta ann cuideachd eadar STV is an NUJ agus an t-aonadh BECTU mu phàigheadh.

Tha dùil ri fios an ath-sheachdain mu bhaileatan aig an dà aonadh mu stailcean.

Chaidh beachd iarraidh bho STV.