Luchd-naidheachd STV air stailc mu phlana North Tonight a ghearradh

Luchd-obrach STV a' togail fianais ann an Obar Dheathain

Luchd-obrach STV a' togail fianais ann an Obar Dheathain

Tha dùil nach bi prògraman naidheachdan Albannach air an craoladh idir air STV Diciadain agus an luchd-naidheachd air stailc aon là.

'S ann mu dheidhinn phlanaichean daoine a chur às an dreuchd an aghaidh an toil agus deireadh seirbheis naidheachd fa leth do cheann a tuath na h-Alba a tha an t-eas-aonta.

Tha STV ag ràdh gur e droch àm a th' ann airson na stailce agus còmhraidhean le na h-aonaidhean a' leantainn.

Cha bhi buaidh aig an stailc air prògraman eile agus sanasachd.

Tha dùil gun toir an iomairt-obrach buaidh air na bhios ri leughadh is fhaicinn de naidheachdan air làrach-lin STV.

Bidh stèisean ciùil ùr na companaidh, a thòisich Dimàirt, fhathast a' dol.

Tha Aonadh Nàiseanta an Luchd-naidheachd an dùil fianais a thogail taobh a-muigh phrìomh-oifisean STV ann an Glaschu agus cuideachd aig an togalach aca ann an Obair Dheathain.

Tha STV an-dràsta a' toirt seachad dà sheirbheis naidheachd fa leth - tè do mheadhan na h-Alba agus tè-eile don cheann a tuath den dùthaich.

Tha riaghladair nan seirbheisean conaltraidh Ofcom a' sireadh bheachdan an-dràsta air na h-atharrachaidhean a thathar a' moladh dhan t-seirbheis.

Bhiodh iad sin a' ciallachadh:

  • Gum biodh preasantairean stèidhichte ann an Glaschu

  • Gum biodh gach geàrr-chunntas air na naidheachdan agus a' chuid as motha de phrògram 6:00f air an craoladh an dà chuid meadhan agus an ceann a tuath na h-Alba.

  • Gum biodh timcheall air 9 mionaidean de naidheachdan diofraichte airson gach sgìre sa phrògram 6:00f

Tha STV ag ràdh gum bi sgiobaidhean naidheachd fhathast aca an Obair Dheathain, Dùn Dè agus Inbhir Nis.

Rinn ceannardan nam prìomh phartaidhean poileataigeach an Alba càineadh air na planaichean nuair a thàinig iad am follais an toiseach san t-Sultain.

Tha Seòmar Malairt Obair Dheathain agus Roinn a' Mhonaidh cuideachd mì-thoilichte mu na molaidhean.

Tha STV air a ràdh gu bheil crathadh a dhìth leis gu bheil nas lugha de luchd-amhairc agus sanasachd ann.

Bhiodh na h-atharrachaidhean a' ciallachadh gun rachadh 28 dreuchdan a chall ann an sgioba nan naidheachdan, ged a tha am BBC a' tuigsinn nach eil ach triùir ann an cunnart an obair a chall an aghaidh an toil.

Tha co-chomhairleachadh Ofcom mu am bu chòir cead a thoirt do na h-atharrachaidhean a' dol gu an Gearran.

Ge-tà, chan eil cumhachd aca a thaobh obraichean dhaoine.

Ma bheir Ofcom cead do na planaichean, dh'fhaodadh gun tòisich na prògraman naidheachdan ùra ron earrach.