उद्धव ठाकरे सरकारने जाता जाता घेतले 'हे' 11 मोठे निर्णय

उद्धव ठाकरे यांनी मुख्यमंत्रिपदाचा आणि आमदारकीचा राजीनामा दिला आहे. काही क्षणांपूर्वीच त्यांनी ही घोषणा केली आहे. त्यामुळे एकनाथ शिंदेंच्या बंडाचा आता दुसरा अंक सुरू होणार आहे.

त्याआधी बुधवारी संध्याकाळी झालेल्या कॅबिनेट बैठकीत उद्धव ठाकरे यांनी सर्वांचे आभार मानले.

"माझ्या पक्षातल्या लोकांनीच मला दगा दिला असं ते बोलले होते," अशी माहिती जयंत पाटील यांनी मंत्रिमंडळाच्या बैठकनंतर पत्रकारांशी बोलताना दिली होती.

जाता जात उद्धव ठाकरे सरकारनं मंत्रिमंडळाच्या बैठकीत औरंगाबाद आणि उस्मानाबाद या दोन जिल्ह्यांची नावं बदलण्याचा निर्णय घेतला आहे.

त्याबरोबरच ठाकरे सरकारनं मंत्रिमंडळाच्या बैठकीत 10 मोठे निर्णय घेतले -

विवेक फणसाळकर यांची मुंबई पोलीस कमिशनर म्हणून नियुक्ती

जाता जाता उद्धव ठाकरे यांनी मुंबईच्या पोलीस आयुक्तपदी विवेक फणसाळकर यांची नियुक्ती केली आहे.

IPS विवेक फणसाळकर 1989च्या बॅचचे अधिकारी आहेत. पोलीस आयुक्त संजय पांडे यांच्याकडून ते उद्या पोलीस आयुक्त पदाची सूत्र हाती घेतील.

संजय पांडे यांच्यानंतरचे महाराष्ट्र पोलीस दलातील सर्वांत ज्येष्ठ IPS अधिकारी विवेक फणसाळकर आहेत.

विवेक फणसाळकर हे आधी ठाण्याचे पोलीस आयुक्त होते. 2018 मध्ये देवेंद्र फडणवीस यांच्या काळात त्यांना ठाणे पोलीस आयुक्त पदाची धूरा देण्यात आली होती.

मनसुख हिरेन हत्या प्रकरणाचा पहिला तपास पोलीस आयुक्त म्हणून त्यांच्याच देखरेखीखाली झाला होता.

विवेक फणसाळकर यांनी मुंबईत सहपोलीस आयुक्त (ट्रॅफिक) म्हणूनही काम केलं आहे.

देवेंद्र फडणवीस यांच्या ते अत्यंत मर्जीतील अधिकारी म्हणून ओळखले जातात. विवेक फणसाळकर यांनी साल 2016 मध्ये महाराष्ट्र एँटी करप्शन ब्यूरोचे अतिरिक्त पोलीस महासंचालक म्हणूनही काम केलं आहे.

सर्वात महत्त्वाचं म्हणजे 2008 साली ठाण्यात उसळलेली दंगल रोखण्यात त्यांची प्रमुख भूमिका होती.

काँग्रेसकडून स्तुती

काँग्रेस नेते आणि मंत्री सुनील केदार मंत्रिमंडळ बैठकीनंतर म्हणाले की, "कामाचा कुठलाही अनुभव नसताना अडीच वर्षं सगळ्यांनी सहाकार्य केलं. पुढेसुद्धा ते थांबणार नाहीत. त्यांनी आयुष्यात थांबणं शिकलंच नाही, असंही उद्धवजी म्हणाले. आमचे त्यांनी आभार मानले. मुळात कुणीही काही चांगलं केलं की आपण आभार मानतोच ना."

"स्पाईन सर्जरी झाल्यानंतर महिन्याभरात काम सुरू करणारी दुसरी व्यक्ती दाखवा. एक तरी नाव सांगा. पण उद्धवजींनी काम सुरू केलं. अशा माणसासोबत कटकारस्थान होणार असेल, तर महाराष्ट्राची 12 कोटी जनता विचार करणार आहे की नाही, हे मला माध्यमांनी सांगावं," असंही सुनील केदार म्हणाले.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)