श्रीधर पाटणकर: उद्धव ठाकरेंचे मेहुणे कोण आहेत? ते काय करतात?

मुख्यमंत्री उद्धव ठाकरे यांचे मेहुणे श्रीधर पाटणकर यांच्यावर ईडीने कारवाई केलीये. त्यांच्या श्री साईबाबा गृहनिर्मिती प्रकल्पातील 11 फ्लॅट जप्त करण्यात आले आहेत.

पुष्पक बुलियन नावाच्या एका कंपनीवर ईडीने मनी लॉंडरिंगचा गुन्हा दाखल केला होता. त्या प्रकरणी ही कारवाई करण्यात आली आहे.

या कारवाईनंतर श्रीधर पाटणकर कोण आहेत? ते नेमकं काय करतात? असे प्रश्न उपस्थित होत आहेत. या प्रश्नांची उत्तरं शोधण्याचा आम्ही प्रयत्न केला.

श्रीधर पाटणकर काय करतात?

श्रीधर पाटणकर व्यवसायाने बिल्डर आहेत. मुंबई आणि ठाण्यात त्यांचं प्रामुख्याने काम असल्याची माहिती आहे.

मुंबईत वांद्रे आणि डोंबिवलीमध्ये ते राहात असल्याची माहिती मिळतेय.

बीबीसीने श्रीधर पाटणकर यांच्याबाबत अधिक माहिती जाणून घेण्याचा प्रयत्न केला. यासाठी आम्ही कॉरपोरेट मंत्रालयाच्या बेबसाईवर श्रीधर पाटणकर कोण आहेत. ते बिल्डर आहेत का याची माहिती मिळवण्याचा प्रयत्न केला.

तर, श्रीधर पाटणकर व्यवसायाने बिल्डर असून इतर काही कंपन्यांमध्ये त्यांचं नाव आम्हाला आढळून आलं.

कॉर्पोरेट मंत्रालयाच्या वेबसाईटवरून मिळालेली माहिती

ईडीने प्रसिद्ध केलेल्या प्रेस रिलीजमध्ये दावा करण्यात आलाय की, श्री साईबाबा गृहनिर्मिती प्रायव्हेट लिमिटेड कंपनी श्रीधर पाटणकर यांच्या मालकीची असून त्यांच्या ताब्यात आहे.

त्यामुळे आम्ही कॉर्पोरेट मंत्रालयाच्या वेबसाईटवर श्री साईबाब गृहनिर्मिती प्रायव्हेट लिमिटेड या कंपनीची माहिती काढली.

कॉर्पोरेट मंत्रालयाच्या वेबसाईटवर मिळालेल्या माहितीत श्रीधर पाटणकरांचं नाव श्री साईबाबा गृहनिर्मिती प्रायव्हेट लिमिटेड या कंपनीच्या संचालकांच्या यादीत दिसलं नाही.

श्रीधर पाटणकर यांच्यावर करण्यात आलेली कारवाई मनी लॉंडरिंगच्या एका प्रकरणात करण्यात आलीये. ईडीने पुष्पक बुलियन नावाच्या कंपनीवर मनी लॉंडरिंगचा गुन्हा दाखल केला होता. त्याप्रकरणी काही दिवसांपूर्वी 21 कोटी रूपयांची प्रॉपर्टी जप्त करण्यात आली होती.

ईडीने दिलेल्या माहितीनुसार, पुष्पक ग्रुपचे मालक महेश पटेल आणि चंद्रकांत पटेल यांच्यावर कारवाई करण्यात आली होती. त्यांनी पैशांची अफरातफर करून तो पैसा नंदकुमार चतुर्वेदी यांच्या मदतीने इतर कंपन्यांमध्ये गुंतवला होता.

नंदकुमार चतुर्वेदी यांनी हा पैसा आपल्या कंपनीच्या मदतीने श्री साईबाबा गृहनिर्मिती या कंपनीत गुंतवल्याचा ईडीचा आरोप आहे.

श्रीधर पाटणकर यांचे शिवसेनेच्या नेत्यांशी घनिष्ठ संबंध असल्याची चर्चाही राजकीय वर्तुळात सुरू आहे. पण याबाबत कोणीच उघडपणे बोलण्यास तयार नाही.

नेमके प्रकरण काय आहे?

6 मार्च 2017 रोजी PMLA कायद्याअंतर्गत पुष्पक ग्रुपविरोधात ईडीनं गुन्हा दाखल केला होता.

अंमलबजावणी संचलनालया (ED) ने श्रीधर माधव पाटणकरांवरील कारवाईबाबत पत्रक काढून माहिती दिलीय.

ईडीच्या माहितीनुसार, पुष्पक ग्रुपची 6.45 कोटींची मालमत्ता जप्त करण्यात आलीय. यात ठाण्यातील निलांबरी प्रकल्पातील 11 रहिवासी फ्लॅट्सचा समावेश आहे.

निलांबरी प्रकल्प श्री साईबाबा गृहनिर्मिती प्रायव्हेट लिमिटेडच्या मालकीचे असून, याचे मालक श्रीधर माधव पाटणकर हे आहेत.

व्यवहार कसे झाले?

ईडीने म्हटले आहे की अंमलबजावणी संचालनालयाने पुष्पक बुलियन या कंपनीची 6.45 कोटी रुपयांची मालमत्ता तात्पुरती जप्त केली आहे. ही कंपनी पुष्पक समूहांच्या कंपन्यांपैकी एक आहे. या कारवाई अंतर्गत एकूण 11 फ्लॅट जप्त करण्यात आले आहेत. हे फ्लॅट्स निलांबरी प्रकल्प, ठाणेच्या अंतर्गत येतात. हा प्रकल्प श्री साईबाबा गृहनिर्मिती प्रा. लिमिटेड यांचा आहे. ही कंपनी श्रीधर माधव पाटणकर यांच्या मालकीची आहे.

6 मार्च 2017 रोजी ईडीने पुष्पक बुलियन आणि ग्रुप ऑफ कंपनीज विरोधात PML Act 2002 मध्ये केस दाखल करण्यात आली होती. आणि याआधीच महेश पटेल, चंद्रकांत पटेल संचलित पुष्पक बुलियनची 21 कोटी रुपयांची स्थावर आणि जंगम मालमत्ता जप्त केली आहे.

त्यानंतर करण्यात आलेल्या तपासात हे समजले आहे की महेश पटेल यांनी नंदकिशोर चतुर्वेदींनी पुष्पक समूहातील पुष्पक रिअॅलिटी या कंपनीचा निधी वळवला. पुष्पक रिअलिटीने एका व्यवहारासाठी विविध स्तरांचा वापर करून 20.02 कोटी रुपयांचा निधी नंदकिशोर चतुर्वेदी यांच्याकडे वळवला.

नंदकिशोर चतुर्वेदी हे अनेक शेल कंपन्या चालवतात. त्यांच्या कंपन्यांपैकी एक कंपनी हमसफर डीलर प्रायव्हेट लिमिटेड मार्फत व्यवहार करण्यात आले. यामार्फत श्री साईबाबा गृहनिर्मिती प्रायव्हेट लिमिटेडला 30 कोटींचे कर्ज कुठलेही तारण न ठेवता देण्यात आले. म्हणजेच महेश पटेलयांचे पैसे नंदकिशोर चतुर्वेदी यांच्या मार्फत श्री साईबाबा गृहनिर्मिती प्रायव्हेट लिमिटेडमध्ये गुंतवण्यात आले.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)