रामदास कदम : शाखाप्रमुख ते मंत्री, जाणून घ्या 9 मुद्द्यांमध्ये प्रवास

माजी पर्यावरण मंत्री रामदास कदम यांनी शिवसेनेच्या नेतेपदाचा राजीनामा दिला आहे. तसं राजीनामापत्र पक्षप्रमुख उद्धव ठाकरेंकडे त्यांनी पाठवलंय.

राजीनामापत्रात रामदास कदमांनी लिहिलंय की, "बाळासाहेब ठाकरे यांनी माझी शिवसेना नेतेपदी नियुक्ती केली होती. मात्र, शिवसेनाप्रमुखांचं निधन झाल्यानं पदाला कुठलीही किंमत राहिली नाही, हे मला पाहायला मिळालं."

या राजीनामापत्रात रामदास कदम यांनी उद्धव ठाकरेंवर नाराजी व्यक्त केलीय. काँग्रेस-राष्ट्रवादीसोबत सरकार स्थापनेबाबतही त्यांनी नापसंती व्यक्त केलीय.

शिवसेनेत चार ते पाच दशकांपासून काम करणाऱ्या रामदास कदम यांच्या राजकीय कारकीर्दीचा घेतलेला आढावा :

1) रामदास कदम यांचा जन्म 27 जुलै 1953 रोजी झाला. ते निष्ठावंत शिवसैनिक म्हणून ओळखले जातात.

2) रत्नागिरीमधील खेड मतदारसंघातून ते निवडून येत असले तरी त्यांच्या राजकीय कारकिर्दीची सुरुवात मुंबईतील कांदिवली येथून झाली आहे. शिवसेनाप्रमुखांनी बजाव पुंगी, हटाव लुंगी आंदोलन सुरू केल्यावर रामदास कदम शिवसेनेच्या आंदोलनात सहभागी झाले.

3) कांदिवली गटप्रमुख, उपशाखाप्रमुख, शाखाप्रमुख, खेडचे आमदार अशी त्यांची राजकीय कारकीर्द वाढत गेली आणि शिवसेनेचे महत्त्वाचे नेते म्हणून त्यांना ओळख मिळाली.

4) 1990 साली ते खेड मतदारसंघात विजयी झाले. त्यानंतर 1995, 1999, 2004 अशा विधानसभा निवडणुका जिंकले.

5) 1995 साली युतीच्या सरकारमध्ये ते पहिल्यांदा अन्न आणि नागरी पुरवठा मंत्री होते तसेच गृहराज्यमंत्री होते.

6) 2005 साली त्यांची विधानसभेतील विरोधीपक्षनेतेपदी निवड झाली. या काळात त्यांनी आघाडी सरकारवर विविध प्रश्नांच्या निमित्ताने टीकास्त्र सोडले होते. नारायण राणे यांनी काँग्रेसमध्ये प्रवेश केल्यानंतर झालेली पोकळी भरुन काढण्याचा प्रयत्न त्यांनी केला होता.

7) 2009 साली रामदास कदम रत्नागिरीतील गुहागर मतदारसंघातून पराभूत झाले. राष्ट्रवादीचे भास्कर जाधव यांनी कदमांचा पराभव केला होता. त्यानंतर कदमांना शिवसेनेनं विधानपरिषदेत पाठवलं.

8) 2014 सालीही रामदास कदम पुन्हा विधानपरिषदेत गेले. मात्र, 2014 साली विधानसभा निवडणुकीनंतर शिवसेना-भाजपनं एकत्र येत राज्यात सत्ता स्थापन केली. या सत्तेत रामदास कदम यांना पर्यावरण मंत्रिपद देण्यात आलं. पर्यावरण मंत्री असताना प्लास्टिक बंदीचा घेतलेला निर्णय विशेष गाजला.

9) 2019 च्या विधानसभा निवडणुकीत मात्र रामदास कदम यांनी विधानसभा लढवण्यास नकार दिला. मात्र, मुलगा योगेश कदम याला दापोली मतदारसंघातून उमेदवारी मिळाली आणि तिथं राष्ट्रवादीचे संजय कदम यांना पराभूत करून योगेश कदम विधानसभेत पोहोचले.

यापूर्वी अनिल परबांवर टीका

यापूर्वी रामदास कदम यांनी माजी परिवहन मंत्री अनिल परब यांच्यावर जोरदार टीका केली होती.

अनिल परब यांच्याविरोधात आपली नाराजी 18 डिसेंबर 2021 रोजी रामदास कदमांनी व्यक्त केली होती.

अनिल परब यांच्यावर रामदास कदम यांनी काय आरोप केले होते?

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)