MGNREGA : नरेगा जॉब कार्ड ऑनलाईन कसं बघायचं? मनरेगाच्या कामांचं स्टेटस कसं पाहायचं?

मनरेगा म्हणजेच महात्मा गांधी राष्ट्रीय ग्रामीण रोजगार हमी योजना हा गावाकडच्या सगळ्यांच्याच जिव्हाळ्याचा विषय.

वैयक्तिक तसंच सार्वजनिक कामांच्या माध्यमातून जसं की शेततळं बांधणं, फळबागेची लागवड या कामांच्या माध्यमातून ग्रामीण भागातील जनतेला रोजगार उपलब्ध करून देणं हा या योजनेचा मूळ उद्देश आहे.

पण, रोजगाराची हमी मिळाल्यानंतर तुमच्या गावात मनरेगाअंतर्गत कोणती कामं सुरू आहेत, त्यांचं स्टेटस काय आहे, सोबतच मनरेगाच्या मजुरीचे पैसे खात्यावर जमा झाले की नाही, हेसुद्धा पाहणं महत्त्वाचं ठरतं.

आता आपण घरबसल्या ही माहिती फोनवर पाहू शकतो. ती कशी हेच आपण आता जाणून घेऊया.

मनरेगाच्या कामाचं स्टेटस कसं पाहायचं?

यासाठी सगळ्यांत आधी तुम्हाला nrega असं सर्च करायचं आहे. त्यानंतर महात्मा गांधी नॅशनल रुरल इम्प्लॉयमेंट असं एक पेज तुमच्यासमोर ओपन होईल. त्यावर क्लिक केलं की या योजनेचं पेज तुम्हाला तिथं दिसेल.

या पेजवर डावीकडील Panchayat या पर्यायावर तुम्हाला क्लिक करायचं आहे.

त्यानंतर एका नवीन पेजवर तुम्हाला Gram Panchayats, Panchayat Samiti आणि Zilla Panchayats हे तीन पर्याय तुम्हाला दिसतील.

यांतील Gram Panchayatया पर्यायावर तुम्हाला क्लिक करायचं आहे.

त्यानंतर एक नवीन रकाना तुमच्यासमोर ओपन होईल. यांतील दुसऱ्या क्रमांकाचा जो पर्याय आहे जनरेट रिपोर्ट्स यावर क्लिक करायचं आहे.

मग तुमच्यासमोर देशातल्या सगळ्या राज्यांची नावं ओपन होतील. यांतील महाराष्ट्र या नावावर क्लिक केलं की, Gram Panchayat Module नावाचं नवीन पेज तुम्हाला तिथं दिसेल.

आता इथं सुरुवातीला फायनान्शियल ईयरमध्ये आर्थिक वर्ष निवडायचं आहे, त्यानंतर जिल्हा, तालुका आणि मग गाव निवडायचं आहे.

हे सगळं निवडून झालं की मग प्रोसिड यावर क्लिक करायचं आहे.

यानंतर Gram Panchayat Reports नावाचं एक पेज तुमच्यासमोर ओपन होईल. या पेजवर R1, R2, R3, R4, R5, R6 असे रकाने दिलेले असतील.

यांतल्या R5 या रकान्यातल्या लिस्ट ऑफ वर्क पर्यायावर तुम्हाला क्लिक करायचं आहे. त्यानंतर Work Expenditure नावाचं एक नवीन पेज तुमच्यासमोर ओपन होईल.

इथं सुरुवातीला कामाचा वर्ग म्हणजेच प्रकार निवडायचा आहे. तुम्हाला गावातल्या सगळ्या कामांचं स्टेटस जाणून घ्यायचं असल्यास ALL हा पर्याय निवडायचा आहे.

त्यानंतर वर्क स्टेटस या पर्यायासमोर तुम्ही नवीन कोणती कामं सुरू आहेत, किती कामांना मंजुरी मिळाली, किती पूर्ण झाली हे पाहू शकता.

पण जर ही सगळी माहिती एकदाच पाहायची असल्यानं मी ALL या पर्यायावर क्लिक करायचं आहे.

शेवटी फायनान्शियल ईयर या रकान्यातील ALL या रकान्यांसमोर तुम्ही क्लिक केलं की तुम्हाला स्क्रीनवर तुमच्या गावातील गेल्या काही वर्षांतील मनरेगाच्या कामांची यादी दिसून येईल.

पण, समजा तुम्हाला 2020-21 या एकाच वर्षातील कामे पाहायची असेल तर फायनान्शियल ईयर समोर 2020-21 हा पर्याय निवडायचा आहे.

यानंतर तुमच्यासमोर एक टेबल ओपन होईल. यात सुरुवातीला कामाचं नाव, कामाचं स्टेटस, आर्थिक वर्ष, कामाचा प्रकार इत्यादी माहिती दिलेली असेल.

सदरील काम मंजूर झालं असेल तर अप्रूव्ह, सुरू असेल तर ऑनगोईंग आणि पूर्ण झालं असेल तर कम्प्लिटेड अशा प्रकारचं स्टेटस तिथं तुम्हाला पाहायला मिळेल.

जॉब कार्ड कसं पाहायचं?

जॉब कार्ड पाहण्यासाठी तुम्हाला Gram Panchayat Reports नावाच्या पेजवर परत यायचं आहे, जिथं R1 ते R6 असे रकाने दिलेले आहेत.

यातील R1 या रकान्यातील Job card/Employment Register या पाचव्या क्रमाकांवर तुम्हाला क्लिक करायचं आहे.

यानंतर तुम्हाला स्क्रीनवर तुमच्या ग्रामपंचायतीत मनरेगाचे जितके जॉब कार्ड रेजिस्टर आहे, नोंदणी झालेली आहे ते तिथं येतील.

इथं जॉब कार्डचा नंबर आणि ते कुणाच्या नावावर आहे, हेसुद्धा दिसेल. त्यानंतर तुम्हाला ज्या व्यक्तीचं जॉब कार्ड पाहायचं आहे त्या व्यक्तीच्या नावासमोरील नंबरवर क्लिक करायचं आहे.

त्यानंतर संबंधित व्यक्तीचं जॉब कार्ड ओपन होईल. यावर सुरुवातीला संबंधितांचं नाव, पत्ता, ही माहिती दिलेली असेल.

त्यानंतर Requested Period of Employment या रकान्यात या व्यक्तीनं रोजगारासाठी कधी विनंती केली ते दिलेलं असेल.

Period and Work on which Employment Offered मध्ये या व्यक्तीला रोजगार कधी ऑफर करण्यात आला आणि त्या कामाचं नाव काय आहे, याची माहिती दिलेली असते.

मनरेगाचं पेमेंट कसं पाहायचं?

आता रोजगार हमी योजनेंच पेमेंट खात्यावर जमा झालं की नाही हे कसं पाहायचं, ते पाहूया.

तर यासाठी तुम्हाला ज्या कामासाठी रोजगार मिळाला, त्या कामाचं जे नाव आहे, त्याच्यावर क्लिक करायचं आहे.

यानंतर एक नवीन पेज तुमच्यासमोर ओपन होईल. ज्यात हे काम कधी सुरू करण्यात आलं आहे, त्याचं स्टेटस काय आहे इत्यादी माहिती सांगितलेली असेल.

यानंतर पुढे असलेल्या Distinct Number of Muster Rolls used(Amount) या रकान्यात हजेरी पट क्रमांक दिलेली असतील.

या हजेरी पट क्रमांकावर क्लिक केलं की, हजेरीपट क्रमांकावरील काम, त्याचा दिनांक आणि नाव तिथं दाखवलं जाईल.

त्यानंतर Measurement Book Detail या रकान्यात या कामासाठी रोजगार मिळालेल्या व्यक्तींची नावं, त्यांना किती दिवसांची मजुरी केली , प्रतिदिन किती रुपये मजुरी मिळाली आणि एकूण मजुरीची रक्कम संबंधितांच्या नावासमोर दिलेली असेल. त्यानंतर पुढे Status या रकान्यात मजुरीची रक्कम खात्यावर जमा झाली हे नमूद केलेलं असेल.

Status समोर Credited असं नमूद असेल तर मजुरीची रक्कम खात्यात जमा झाली असा त्याचा अर्थ होतो. पुढे A/c Credited Date या रकान्यात संबंधितांच्या खात्यात ते पैसे किती तारखेला जमा झाले, याची माहिती दिलेली असते.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)