महाराष्ट्रात लॉकडाऊन लागू करण्यासंदर्भात उद्धव ठाकरे काय निर्णय घेणार?

महाराष्ट्रात आगामी काही दिवसांत पूर्ण लॉकडॉऊन लागू करण्यासंदर्भात आज (11 एप्रिल) महत्त्वाची बैठक झाली. मुख्यमंत्री उद्धव ठाकरे आणि कोव्हिड टास्क फोर्स समिती यांच्यात ही बैठक झाली असून चर्चेनंतर लॉकडॉऊनसंदर्भातील अंतिम निर्णय घेतला जाण्याची शक्यता आहे.

कोव्हिड टास्क फोर्स ही तज्ज्ञ डॉक्टरांची एक समिती आहे. कोरोना आरोग्य संकटाच्या पार्श्वभूमीवर गेल्यावर्षी ही समिती स्थापन करण्यात आली होती.

शनिवारी (10 एप्रिल) मुख्यमंत्री उद्धव ठाकरे यांनी सर्वपक्षीय नेत्यांसोबत चर्चा केली. या बैठकीत एक आठवडा ते पंधरा दिवस लॉकडॉऊन लागू करण्याबाबत सकारात्मक चर्चा झाली.

"कोरोनाचे अनर्थचक्र थांबवायचे असेल तर काही काळासाठी का होईना पण कडक निर्बंध लावावेच लागतील. आपल्याला प्रथम जीव वाचविण्याला प्राधान्य द्यावे लागेल. ही जर आरोग्याची आणीबाणी असेल तर प्राधान्य हे नागरिकांच्या आरोग्याला आणि जीवाला असले पाहिजे," अशी भूमिका मुख्यमंत्री उद्धव ठाकरे यांनी शनिवारच्या बैठकीनंतर मांडली.

मुख्यमंत्री उद्धव ठाकरे यांनी 8 एप्रिल रोजी दिलेल्या माहितीनुसार,

अशा सर्व माहितीच्या आधारावर कोरोना विषाणू संसर्गाची साखळी तोडण्यासाठी किती दिवसांचा लॉकडॉऊन लागू करणे आवश्यक आहे? याबाबत या बैठकीत चर्चा होईल.

सरकार समोर आव्हान?

कोरोनाची रुग्णसंख्या राज्यात उच्चांक गाठत असताना संपूर्ण लॉकडॉऊन लागू केल्याशिवाय संसर्गाची साखळी तुटणार नाही याबाबत सर्वपक्षीय बैठकीत एकमत दिसून आले.

असं असलं तरी उद्धव ठाकरे सरकारला व्यापारी वर्ग, कामगार वर्ग आणि नोकरदारांच्या तीव्र नाराजीला सामोरं जावं लागू शकतं.

फेडरेशन ऑफ रिटेल ट्रेडर्स वेलफेअर असोसिएशनने (FRTWA) व्यापाऱ्यांसाठी पॅकेजची घोषणा करण्याची मागणी केली आहे.

संघटनेचे अध्यक्ष वीरेन शाह सांगतात, "सरकार संपूर्ण लॉकडॉऊन जाहीर करणार असेल तर त्यांनी आजच्या बैठकीत व्यापाऱ्यांसाठी काय पॅकेज (आर्थिक मदत) देणार हे सुद्धा स्पष्ट करणं गरेजेचे आहे. आमच्या कर्मचाऱ्यांचे पगार आणि कर सवलत याबाबतही धोरण हवे."

शिवाय, ऑनलाईन विक्रीसाठी परवानगी देण्यालाही व्यापारी संघटनेचा विरोध आहे.

"आमचा कोट्यवधी रुपयांचा माल दुकानांमध्ये पडून आहे. अशा परिस्थितीत अत्यावश्यक सेवेत नसतानाही ऑनलाईन व्यापाऱ्यांना विक्रीची परवानगी दिल्यास आम्ही विरोध करू," असा इशाराही संघटनेकडून देण्यात आला आहे.

5 एप्रिलपासून लागू करण्यात आलेल्या निर्बंधांमध्ये कामगारांसाठी सरकारने काही नियम जाहीर केले. त्यानुसार, बांधकामे सुरू असलेल्या ठिकाणी मजूर, कामगारांनी राहणे गरजेचे आहे. केवळ साहित्याची वाहतूक करण्यासाठी परवानगी देण्यात येईल. कोणत्याही कामगारास कोव्हिडची लागण झाल्यामुळे त्याला काढून टाकता येणार नाही. संबंधित कर्मचाऱ्याला आजारपणाची रजा द्यावी लागेल. तसंच त्यादरम्यान त्याला पूर्ण पगार देणं बंधनकारक आहे. कामगारांची आरोग्य तपासणी करण्याची जबाबदारी ठेकेदाराकडे असेल.

गेल्या वर्षभरात नोकरदार वर्गालाही पगार कपातीसह नोकरी गमावण्यापर्यंत संकटांचा सामना करावा लागला आहे. त्यामुळे आता पुन्हा संपूर्ण लॉकडॉऊन लागू करत असताना सरकारला नोकरदार वर्गाचाही विचार करावा लागणार आहे.

त्यामुळे एकाबाजूला गेल्या वर्षभरापासून तोटा सहन करणारा व्यापारी वर्ग आणि दुसऱ्या बाजूला आर्थिक कोंडीमुळे हैराण झालेला नोकरदार वर्ग अशा दोन्ही वर्गांची नाराजी दूर करण्याचे आव्हान मुख्यमंत्री उद्धव ठाकरे यांच्यासमोर आहे.

रेल्वे वाहतूक बंद करण्याचा निर्णय घेणार?

मुंबईत पश्चिम, हार्बर आणि मध्य रेल्वेची 95 टक्के सेवा सध्या सुरू असून विशिष्ट वेळेत सर्वसामान्य प्रवाशांनाही प्रवास करण्याची परवानगी आहे.

पण लॉकडॉऊन लागू झाल्यास केवळ अत्यावश्यक सेवेतील कर्मचाऱ्यांनाच रेल्वेतून प्रवास करण्याची मूभा दिली जाऊ शकते.

पश्चिम रेल्वेचे जनसंपर्क अधिकारी रवींद्र भाकर यांनी बीबीसी मराठीशी बोलताना सांगितलं, "सध्या निर्धारित वेळेत रेल्वे प्रवास सर्व प्रवाशांसाठी खुला आहे. यात बदल करण्यासंदर्भात अद्याप कोणतीही चर्चा झालेली नाही."

तसंच लांब पल्ल्याच्या रेल्वे गाड्यांच्या वेळापत्रकातही सध्या कोणताही बदल करण्यात आलेला नाही.

मुंबईच्या महापौर किशोरी पेडणेकर यांनी बीबीसी मराठीशी बोलताना सांगितलं, "मुंबई लोकलमध्ये गेल्या वर्षीप्रमाणे केवळ अत्यावश्यक सेवेतील कर्माचाऱ्यांनाच परवानगी देण्याचा निर्णय होऊ शकतो. तसंच बाहेरगावी जाणाऱ्या प्रवाशांना फटका बसू नये म्हणून काही लांब पल्ल्याच्या गाड्या तातडीने बंद केल्या जाणार नाहीत. अंतिम निर्णय येईपर्यंत मात्र प्रतीक्षा करावी लागेल."

फेब्रुवारीत पश्चिम रेल्वेने प्रवास करणाऱ्या प्रवाशांची संख्या साधारण 18 लाख एवढी होती. ती आता कमी होऊन 15-16 लाखांवर आली आहे.

तर मध्य आणि हार्बर रेल्वेने दर दिवशी जवळपास 40 लाख प्रवासी प्रवास करत असतात, पण कोरोना काळात 20 लाख प्रवासी प्रवास असल्याची माहिती रेल्वेच्या जनसंपर्क कार्यालयाने बीबीसी मराठीशी बोलताना दिली.

मध्य रेल्वेत 90 टक्के (1600) तर पश्चिम रेल्वेच्या 95% रेल्वे गाड्या सुरू आहेत.

राज्यात काय सुरू? काय बंद?

राज्यात 5 एप्रिलपासून कडक निर्बंध लागू करण्यात आले आहेत. तसंच शनिवार आणि रविवारी पूर्ण लॉकडॉऊन लागू करण्यात आले आहे. त्यानुसार आताच्या घडीला राज्यात काय बंद आणि काय सुरू आहे ते पाहूया,

काय बंद?

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.रोज रात्री8 वाजता फेसबुकवर बीबीसी मराठी न्यूज पानावर बीबीसी मराठी पॉडकास्ट नक्की पाहा.)