कोरोना: नरेंद्र मोदी यांच्या पुणे येथील सिरम इन्स्टिट्यूटच्या भेटीचा अर्थ काय?

भारताचे पंतप्रधान नरेंद्र मोदी यांनी सिरम इन्स्टिट्यूटला आज (28 नोव्हेंबर) भेट देऊन आढावा घेतला. सिरम इन्स्टिट्यूटमध्ये कोरोनावरील ऑक्सफर्ड विद्यापीठाच्या कोविशिल्ड या लशीचे उत्पादन करण्यात येत आहे. याबाबतची माहिती पंतप्रधान नरेंद्र मोदी घेतली.

मोदींच्या सिरम इन्स्टिट्यूटच्या भेटीकडे सगळ्यांचेच लक्ष होतं. त्यांच्या या भेटीचे राजकीय आणि आंतरराष्ट्रीय दृष्टिकोनातून विविध अर्थ लावले जात आहेत.

सिरम इन्स्टिट्युट ही जगातील लस निर्मितीमधील एक महत्त्वाची संस्था आहे. कोविशिल्ड ही लस कमी किंमतीत आणि साठवणूक करण्यासाठी सोपी असल्याचा दावा कंपनीकडून करण्यात येत आहे. ही लस 60 ते 70 टक्के परिणामकारक असल्याचे इंग्लंड आणि ब्राझिलमध्ये करण्यात आलेल्या चाचण्यांमधून समोर आले होते. भारतातील चाचण्यांचे निकाल डिसेंबरमध्ये येण्याची शक्यता वर्तवण्यात येत आहे.

लस आवाक्यात आली आहे याची वातावरण निर्मिती

"एखाद्या गोष्टीचा इव्हेंट करणे हे मोदींच्या नेतृत्वाचे वैशिष्ट्य आहे. भारतात कोव्हिडनंतर एक अनिश्चितता आहे. अर्थव्यवस्थेला सुद्धा मरगळ आल्याचे चित्र आहे. दिवाळीत काहीशी उभारी दिसली असली तरी ती पुढे कायम राहील असे दिसत नाही. त्यामुळे ही मरगळ, कोरोनामुळे आलेलं नैराश्य झटकायचं असेल तर लस लवकर येत आहे हा विश्वास लोकांना देणे गरजेचं आहे. त्यामुळे लोकांमध्ये धास्ती कमी होऊन काम करायला उभारी येईल. मोदींनी सिरमला भेट देणे म्हणजे कोरोनावरील लस आता आवाक्यात आली आहे अशी वातावरण निर्मिती करणे असे असू शकते," असे मत लोकमतचे पुण्याचे संपादक प्रशांत दीक्षित यांनी बीबीसी मराठीशी बोलताना व्यक्त केले.

"आंतरराष्ट्रीय स्तरावर अनेक देशांच्या कंपन्यांमध्ये कोरोना लशीबाबत स्पर्धा दिसून येत आहे. पुढे ही स्पर्धा अधिक तीव्र होणार आहे. ऑक्सफर्डने म्हंटलय आमची लस स्वस्त आणि साध्या फ्रिजमध्ये ठेवता येते. जगभरातील अनेक देशांसाठी ही गोष्ट महत्त्वाची आहे. सिरमची लस जगभर जाणार आहे. त्यामुळे यात भारतीय कंपनीचे ब्रॅंण्ड मार्केटिंगचा देखील मोदींचा प्रयत्न असू शकतो," असंही दीक्षित पुढे म्हणतात.

कोविशिल्डचे भारतातील निकाल मोदींना सांगितले जातील?

"कोविशिल्डच्या लशीच्या परिणामकारकतेचे इंग्लंड आणि ब्राझीलमधील निकाल जाहीर करण्यात आले आहेत. भारतातील निकाल अद्याप जाहीर करण्यात आलेले नाहीत. भारतातील या लसीच्या परिणामकारकतेचे निकाल मोदींना सांगितले जातील असा तर्क सुद्धा या भेटीतून लावला जावू शकतो," असे देखील दीक्षित यांना वाटते.

तसेच भारत हा लशीच्या निर्मितीला आणि वितरणाला सज्ज होतोय हे जगाला आणि देशाला लक्षात आणून देण्याचा मोदींचा प्रयत्न असल्याचेही ते म्हणतात.

26 जानेवारील लशीबाबतची घोषणा?

या भेटीचे विष्लेषण करताना सकाळचे संपादक सम्राट फडणीस म्हणतात, "लसीची तयारी कुठपर्यंत आली आहे हे पाहण्यासाठी मोदी सिरम इन्स्टिट्युटला भेट देत असावेत. त्या अनुषंगाने 26 जानेवारीला लशीबाबत काही घोषणा करता येईल का? या दृष्टीने देखील मोदींची चाचपणी सुरु आहे. खरंतर अशी भेट मोदींनी किंवा केंद्रीय आरोग्य मंत्र्यांनी यापूर्वी द्यायला हवी होती."

"आशियामध्ये सिरम इन्स्टिट्युट ही एकमेव कंपनी इतक्या मोठ्या प्रमाणात संशोधन आणि लशीची निर्मिती करत आहे. मोदी हे नेहमी स्वतः लीड घेऊन मार्केटिंग करतात. मोदी जगाला भारतातील सिरम इन्स्टिट्युट आणि भारत बायोटेक या दोन संस्थांची उदाहरणे देऊन भारताचे मार्केटिंग जगात करु पाहत आहेत," अशी शक्यता फडणीस व्यक्त करतात.

सिरम इन्स्टिट्यूट ऑफ इंडियाच्या दाव्यानुसार, दर महिन्याला 50 ते 60 दशलक्ष लशीचे डोस तयार करण्याच्या स्थितीत असल्याचं कंपनीचं म्हणणं आहे. फेब्रुवारी 2021 पर्यंत 100 दशलक्ष लशीचे डोस दर महिन्याला तयार होऊ शकतील असं कंपनीने स्पष्ट केलं आहे. सीरम इन्स्टियूट ऑफ इंडियाचे मुख्य कार्यकारी अधिकारी आदर पुनावाला यांनी सरकारने जुलै 2021 पर्यंत 100 दशलक्ष लशीच्या डोसची मागणी केल्याचं सांगितलं. जुलै 2021 पर्यंत केंद्र सरकारने 300 दशलक्ष लशीचे डोस जनतेपर्यंत पोहोचवण्याचा निर्धार केला आहे.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)