कोरोना व्हायरस : खासगी हॉस्पिटल्सवर लाखो रुपये फी उकळत असल्याचे आरोप

- Author, मयांक भागवत
- Role, बीबीसी मराठीसाठी
10 जून 2020

खासगी रुग्णालयांच्या नफेखोरीवर चाप बसावा यासाठी राज्य सरकारने उपचारांचे दर निश्चित केले आहेत. तसंच राज्यातील सर्व रुग्णालयांना सरकारी आदेशाचं पालन बंधनकारक करण्यात आलं आहे.

मात्र, असं असूनही काही रुग्णालयं कोव्हिडच्या नावाखाली रुग्णांकडून लाखो रूपये वसूल करत आहेत अशा तक्रारी समोर येत आहेत.

त्यामुळे खासगी रुग्णालयं सरकारी आदेशानंतरही नफेखोरी करत आहेत का? त्यांच्यावर सरकार अंकुश कधी लावणार? असा प्रश्न उपस्थित झालाय.

१२ दिवसांत ७ लाखांचं बिल

मुंबईच्या कुर्ला परिसरात राहणाऱ्या सागर कोचाळेंची आई बेलापूरच्या एका खासगी रुग्णालयात २५ मेपासून उपचारासाठी दाखल आहे. सागर यांची आई कोरोनाग्रस्त असण्यासोबत किडनीच्या आजारने ग्रस्त आहे.

बीबीसीशी बोलताना सागर म्हणतात, "१२ दिवसांत आईच्या उपचारांचं बिल ७ लाख झालंय. डॉक्टर म्हणतात, अजून १० दिवस रहावं लागेल. बिलामध्ये कधी ५० हजार तर कधी १ लाख रूपयांची भर पडते. रुग्णालय प्रशासनाने तात्काळ ४ लाख रूपये भरा असा तगाधा लावलाय. कुठून आणणार ऐवढे पैसे? घरातलं सर्वकाही दिलं तर पुढे काय करायचं? सरकारने दर निश्चित केले मात्र आदेशाचं योग्य पालन होतं का? यावर कोण लक्ष देणार?"

अचानक एवढे पैसे कुठून उभे करायचे असा प्रश्नही ते विचारत आहेत.

"मी एका खासगी कंपनीमध्ये काम करतो. घरी भाऊ आणि वडील आहेत. आईच्या उपचारासाठी आता मित्र-नातेवाईक यांच्याकडून पैसे जमा करण्याचा प्रयत्न करतोय. येत्या काही दिवसात रुग्णालयाचं बिल आणखी वाढेल त्याचं काय? काय करणार? रुग्णालयातून रोज फोन येतो. पण, अचानक एवढे पैसे कसे उभारायचे? काय करावं असा प्रश्न पडलाय," असं सागर पुढे म्हणाले.

Skip सर्वाधिक वाचलेले and continue reading

सर्वाधिक वाचलेले

End of सर्वाधिक वाचलेले

'पैसे दिल्यानंतरच मृतदेह दिला'

खासगी रुग्णालयांकडून रुग्णांची आर्थिक लूट होण्याच्या तक्रारी मोठ्या प्रमाणावर पालिका आणि सरकारकडे येत आहेत. अशीच एक घटना उत्तर मुंबईच्या बोरीवली परिसरात घडली.

बिलाचे संपूर्ण पैसे भरल्याशिवाय रुग्णालयानं मृतदेह दिला नाही, असा आरोप रुग्णाच्या नातेवाईकांनी केला आहे.

सुपारीचा व्यवसाय करणाऱ्या आमीर शेख यांचे वडील कोरोनाग्रस्त होते. उपचारांसाठी त्यांना बोरीवलीच्या खासगी रुग्णालयात दाखल करण्यात आलं होतं.

आमीर म्हणतात, "माझे वडील रुग्णालयात दाखल झाल्यापासूनच रुग्णालयाने पैसे भरा असा तगाधा लावला होता. ६ लाखांपेक्षा जास्त बिल झालं. कसेबसे जमा करून ४ लाख रूपये आम्ही भरले होते.

वडीलांच्या मृत्यूनंतर रुग्णालयाने बिलाचे संपूर्ण पैसे भरल्याशिवाय मृतदेह देणार नाही असा पवित्रा घेतला. वडीलांचा मृत्यू सकाळी झाला. त्यानंतर दुपारपर्यंत आठ तास आम्हाला मृतदेह देण्यात आला नाही. उरलेले २ लाख रूपये भरल्यानंतर आम्हाला रुग्णालयाने मृतदेह दिला."

आमीर यांच्या आरोपांनुसार, रुग्णालयाने पैशासाठी खूप लगाधा लावला होता. घरातील इतर सदस्य क्वॉरन्टाईन असल्यामुळे कोणीच रुग्णालयात जावू शकत नव्हतं. त्यामुळे वडीलांबाबत काहीच माहिती मिळत नव्हती.

आमीर म्हणतात, आम्ही आरोग्य मंत्र्यांच्या कार्यालयाकडे तक्रार केली आहे. रुग्णालयाविरोधात मी आता पोलिसात तक्रार करण्याचा विचार करतोय. रुग्णालयाकडून होणारी लूट थांबवली पाहिजे.

सरकारकडे वाढत्या तक्रारी

खासगी रुग्णालयांकडून जास्तीच्या बिलाची आकारणी, रुग्णांसाठी बेड न मिळणं अशा ४७ तक्रारी महात्मा ज्योतिबा फुले जनआरोग्य योजनेच्या अधिकाऱ्यांना मिळाल्या आहेत.

याबाबत बीबीसी मराठीशी बोलताना महात्मा ज्योतिबा फुले जन आरोग्य योजनेचे मुख्य कार्यकारी अधिकारी डॉ. सुधाकर शिंदे म्हणाले, "महामारीच्या काळात कोव्हिड रुग्ण असो किंवा नसो लोकांना परवडणाऱ्या दरात उपचार मिळाले पाहिजेत. यासाठी सरकारने उपचारांची दर निश्चिती केली आहे.

शहरी भागात पालिका आयुक्त आणि जिल्हा स्तरावर जिल्हाधिकाऱ्यांना याबाबाबत तात्काळ कारवाई करण्याचे आदेश देण्यात आले आहेत. आत्तापर्यंत ज्या रुग्णालयांबाबत तक्रार मिळाली त्यांना कारणे दाखवा नोटीस बजावण्यात आली."

"शहर आणि जिल्हा स्त्ररावर अधिकाऱ्यांनी यासाठी कार्यप्रणाली विकसीत करावी. डिजिटल प्लॅटफॉर्म तयार करून तक्रारींवर लक्ष ठेवावं. मुंबईत खासगी रुग्णालयांवर लक्ष ठेवण्यासाठी पाच आयएएस अधिकाऱ्यांना नियुक्त करण्यात आलं आहे. जेणेकरून रुग्णांच्या तक्रारींवर तात्काळ चौकशी करून कारवाई केली जाईल," असं शिंदे पुढे म्हणाले.

काही दिवसांपूर्वी आरोग्यमंत्री राजेश टोपे यांनी मुंबईतील चार प्रतिष्ठीत रुग्णालयांना अचानक भेट देऊन, सरकारी आदेशाचं पालन न केल्याबाबत कारणे दाखवा नोटीसही बजावली होती. तरीही, मुंबईतील खासगी रुग्णालयांकडून लाखो रूपयांचं बिल देण्यात आल्याबाबत अनेक तक्रारी समोर येत आहेत.

रुग्णालयांना भेट दिल्यानंतर आरोग्यमंत्री राजेश टोपे म्हणाले होते, "रुग्णालयांचे चार्ज टीपीए किंवा इन्शुरन्सच्या पॅकज प्रमाणे असतील. वाटेल तो चार्ज सहन केला जाणार नाही. रुग्णालयात डॉक्टर आणि कर्मचारी उपस्थित होत नसतील तर त्यांना मेस्मा लावा, पण रुग्णांना बेड मिळालाच पाहिजे."

आयएएस अधिकाऱ्यांची नियुक्ती

मुंबईतील खासगी रुग्णालयांकडून ज्यादा पैसे आकारल्याच्या किंवा बेड नाकारल्याच्या तक्रारी मुंबई महापालिकेकडे येत आहेत. यावर कारवाईसाठी पाच आयएएस अधिकाऱ्यांची नियुक्ती करण्यात आली. यावरून स्पष्ट आहे, मुंबईत खासगी रुग्णालयांकडून सरकारी आदेशानंतरही नफेखोरी होत आहे.

१) मदन नागरगोजे