Manoj Mukund Naravane: लेफ्टनंट जनरल मनोज नरवणे भारताचे नवे लष्करप्रमुख

लेफ्टनंट जनरल मनोज मुकुंद नरवणे हे भारताचे नवे लष्करप्रमुख म्हणून पदभार स्वीकारतील. मनोज नरवणे हे भारतीय लष्कराचे उपप्रमुख म्हणून कार्यरत होते.

विद्यमान लष्करप्रमुख बिपीन रावत हे 31 डिसेंबर 2019 रोजी निवृत्त होत असून त्याच दिवशी मनोज नरवणे लष्करप्रमुखपदाचा कार्यभार स्वीकारतील. ते स्वातंत्र्योत्तर भारताचे 28 वे लष्करप्रमुख असतील.

लेफ्टनंट जनरल मनोज नरवणे यांचं सुरुवातीचं शिक्षण पुण्यातील ज्ञान प्रबोधिनी शाळेतून झालं. त्यानंतर राष्ट्रीय संरक्षण प्रबोधिनीतून (NDA) लष्कराचं शिक्षण घेतलं. तसेच, ते देहरादून येथील इंडियन मिलिटरी अकॅडेमीचेही माजी विद्यार्थी आहेत.

इंदौरच्या देवी अहिल्या विद्यापीठातून नरवणेंनी संरक्षण आणि व्यवस्थापन अभ्यासात एमफील केलं.

मनोज नरवणे यांचे वडील मुकुंद नरवणे हे हवाई दलात अधिकारी होते.

मनोज नरवणे यांच्या पत्नी शिक्षिका आहेत. नरवणे दाम्पत्याला दोन मुली आहेत.

लेफ्टनंट जनरल नरवणेंनी लष्करात पार पाडलेल्या जबाबदाऱ्या

जून 1980 मध्ये शीख लाईट इन्फन्ट्री रेजिमेंटमधून लेफ्टनंट जनरल नरवणे यांनी सैन्यात पाऊल ठेवलं. काश्मीर आणि ईशान्य भारतात कट्टरतावाद्यांविरोधातील मोहिमांचा मोठा अनुभव आहे. भारत आणि पाकिस्तान या दोन देशांमध्ये काश्मीर आणि कट्टरतावाद्यांच्या मुद्द्यांवरून तणावाचं वातावरण असताना लेफ्टनंट जनरल मनोज नरवणे यांची लष्करप्रमुखपदी नियुक्ती झाली आहे.

जम्मू-काश्मीरमध्ये एका राष्ट्रीय रायफल्स बटालियनचं नेतृत्व नरवणेंनी केलं होतं. शिवाय, मेजर जनरल म्हणून नरवणे आसाम रायफल्सचे ते इन्स्पेक्टर जनरलही होते.

दिल्लीत नियुक्ती होण्याआधी नरवणे कोलकात्यामध्ये पूर्व विभागाचे प्रमुख होते. भारत-चीनमधील चार हजार किलोमीटर सीमेची भारताकडून देखभाल हे विभाग करतं. शिवाय, नुकत्याच पार पडलेल्या पूर्व सीमेवरील सरावामागची कल्पना नरवणे यांचीच होती.

दिल्ली एरिया जनरल ऑफिसर म्हणूनही लेफ्टनंट जनरल मनोज नरवणे यांनी काम पाहिलंय. ऑपरेशन 'पवन'वेळी श्रीलंकेत पार पडलेल्या इंडियन पीस कीपिंग फोर्समध्येही नरवणे सहभागी होते. तसेच, म्यानमार दूतावासात तीन वर्षे नरवणेंनी काम केलंय.

लेफ्टनंट जनरल नरवणेंना मिळालेली पदकं

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)