शरद मोहोळ हत्या प्रकरणातील आरोपी गणेश मारणे पोलिसांच्या ताब्यात, पळून जाताना केली कारवाई

कुख्यात गुंड शरद मोहोळ खून प्रकरणात पुणे गुन्हे शाखेने महत्त्वाची कारवाई केली आहे. शरद मोहोळ खून प्रकरणातील महत्त्वाचा आरोपी गणेश मारणेला पुणे शहर गुन्हे शाखेचे अधिकारी व त्यांच्या पथकाने ताब्यात घेतलं आहे.

गणेश मारणे त्याच्या दोन साथीदारसह पुणे नाशिक रोड इथून पळून जात असताना त्यांना ताब्यात घेण्यात आलं.

त्यांच्यावर कोथरुड पोलिस स्टेशनमध्ये भारतीय दंड संहितेच्या कलम 302 ,307,201,120(ब),34, आर्म्स अॅक्टच्या कलम 3,7,25,27 आणि मोक्का कायद्याच्या कलम 3(1)(i), 3(2),3(4) अंतर्गत ताब्यात घेण्यात आलं आहे.

शरद मोहोळ प्रकरणात पुणे पोलिसांनी 12 जानेवारी 2024 ला तीन जणांना अटक केली आहे. यापूर्वी दोन वकिलांसह 10 जणांना अटक करण्यात आली होती.

नितीन अनंता खैरे (वय 34 वर्षे), आदित्य विजय गोळे (वय 24 वर्षे) आणि आणखी एक अशा तिघांना पुणे पोलिसांनी 12 जानेवारी 2024 ला अटक केली.

12 जानेवारीला अटक केलेल्या तिघांपैकी नितीन खैरे हा गुन्हा घडण्यापूर्वी 2022 मध्ये उत्तरार्धात सर्व आरोपींसोबत हडशी भागात गोळीबार सराव करण्यासाठी उपस्थित होता. तसंच, मुख्य आरोपीला आर्थिक मदतही नितीननं केली. याचा पूर्व इतिहास सुद्धा गुन्हेगारी स्वरूपाचा आहे.

दुसरा आरोपी आदित्य विजय गोळे हा सुद्धा 2022 च्या गोळीबार सरावात इतर आरोपींबरोबर सहभागी होता. तसंच, गुन्ह्याचा कट करण्याच्या मीटिंगमध्येही सहभागी होता. मुख्य आरोपींना आदित्यनेही आर्थिक मदत केली.

12 जानेवारीला अटक करण्यात आलेल्या तिसऱ्या आरोपीचे नाव कळू शकले नाही. मात्र, गुन्हा घडल्यानंतर मुख्य आरोपी आणि हा तिसरा आरोपी एकमेकांच्या संपर्कात होते.

शरद मोहोळच्या हत्या प्रकरणाचा तपास पुण्याचे सहाय्यक पोलीस आयुक्त (गुन्हे-1) सुनील तांबे हे करत आहेत.

पिस्तूल पुरणारेही जेरबंद

शरद मोहोळच्या हत्येसाठी पिस्तूल पुरवणाऱ्या धनंजय मटकर आणि सतीश शेंडगे यांना पोलिसांनी बेड्या ठोकल्या आहेत. एकाला कऱ्हाड तर एकाला मुळशी मधून अटक झाली असल्याचे पोलिसांनी सांगितले.

या गुन्ह्यात वकिलांना देखील अटक झाली असून त्यांना या हत्येची कल्पना होती अशी माहिती समोर येत आहे.

पुण्यातील कुख्यात गुंड शरद मोहोळ याच्यावर 5 जानेवारीला दुपारी दीड वाजण्याच्या सुमारास 3 ते 4 जणांनी गोळीबार झाला होता. त्यात शरद मोहोळचा मृत्यू झाला. कोथरूडमधील सुतारदरा भागात ही गोळीबाराची घटना घडली होती.

गोळीबाराच्या घटनेनंतर गंभीररित्या जखमी झालेल्या शरद मोहोळला तातडीने ससून हॉस्पिटलमध्ये उपचारासाठी नेण्यात आले होते. मात्र, तिथे उपचारादरम्यान त्याचा मृत्यू झाला.

शरद मोहोळच्या लग्नाचा 5 जानेवारीला वाढदिवस होता. त्यासाठी दोघे पती-पत्नी गणपतीच्या दर्शनाला जायला निघाले होतो. त्यावेळी मोहोळवर गोळीबार झाला.

40 वर्षीय शरद हिरामण मोहोळ हा पुण्यातील कोथरूड भागातील कुख्यात गुंड होता. त्याच्यावर दिवसाउजेडी गोळीबार आणि त्यात त्याचा मृत्यू झाल्यानं या भागात खळबळ उडाली.

आतापर्यंत अटक झालेले आरोपी

पोलिसांनी आतापर्यंत 13 आरोपींना पकडलं आहे. या आरोपींमध्ये दोन वकिलांचाही समावेश आहे.

पोलिसांनी सांगितला हत्येचा घटनाक्रम

पोलिसांनी हत्येच्या दुसऱ्याच दिवशी पत्रकार परिषद घेत दिलेल्या माहितीनुसार, मोहोळ याच्यावर हल्ला करणाऱ्यांमध्ये त्याचाच साथीदार असलेल्या साहिल उर्फ मुन्ना पोळेकर आणि इतर साथीदारांचा सहभाग होता. मुख्य आरोपी साहिल उर्फ मुन्ना पोळेकर हा मोहोळ गँगचा सदस्य असून तो शरद मोहोळसोबत राहत होता.

या प्रकरणात आरोपी शोधण्यासाठी पोलिसांनी नऊ पथकं रवाना केली होती. त्यानंतर काही तासांत आठ जणांना ताब्यात घेण्यात आलं होतं.

पुणे शहराच्या परिसरात आणि पुणे ग्रामीण, सातारा व कोल्हापूर परिसरात आरोपी मिळाले.

पुणे-सातारा रोडवर किकवी – शिरवळ दरम्यान तपासात निष्पन्न झालेल्या संशयित स्विफ्ट गाडीचा पाठलाग करून 8 आरोपींना ताब्यात घेतले. त्यांच्याकडून 3 गावठी पिस्टल, 3 मॅगझीन, 5 जिवंत काडतुसे, 8 मोबाईल फोन, रोख रक्कम असा 22,39,810 रुपयांचा माल हस्तगत करण्यात आला.

पोलिसांनी घेतलेल्या पत्रकार परिषदेत सह पोलिस आयुक्त रामनाथ पोकळे यांनी माहिती दिली की, "शरद मोहोळ आणि आरोपी पोळेकर याचं घर जवळ जवळ होतं. दोघेही सुतारदरा मध्येच राहत होते. मागच्या 20 ते 25 दिवसांपासून पोळेकर मोहोळच्या कार्यालयात कामाला जात होता."

पोलिसांनी पुढे सांगितलं की, "पोळेकरने गोळ्या झाडण्याआधी शरद मोहोळच्या घरचा पत्ता शोधून चौकशी केली. त्यावेळी तो घरी नसल्याचं समजलं. त्यामुळे दबा धरून बसलेल्या पोळेकरने संधी मिळताच मोहोळ याच्यावर गोळीबार केला. मोहोळ याच्यावर त्याच्या घराजवळच कोथरुडच्या सुतारदरा भागात चार राउंड फायर करण्यात आले."

त्यानंतर आरोपींनी घटना स्थळावरून पळ काढला. त्यापैकी दोघे जण घटनास्थळावरून दुचाकी घेऊन पळून गेले. पोळेकरकडे चारचाकी होती. ती खेड शिवापूरच्या मार्गाने जाताना दिसली.

मोहळ हत्या प्रकरणात दोन नामांकित वकिलांचाही सहभाग असल्याचं समोर आलं आहे. त्या वकिलांचा नेमका कशासाठी सहभाग होता हे तपासानंतर कळेल.

शरद मोहोळचा असा उदय झाला

गेल्या 10 ते 15 वर्षात शरद मोहोळ हे नाव पुण्यातील गुन्हेगारी विश्वात आहे. शरद मोहोळचा उदय नेमका कसा झाला, हे आम्ही वरिष्ठ पत्रकार राहुल खदळकर यांच्याकडून जाणून घेतलं. खदळकर यांनी पुण्यातील गुन्हेगारी विश्वाचं गेल्या अनेक वर्षांपासून वृत्तांकन केल आहे.

राहुल खदळकर सांगतात की, “पुण्यात टोळीयुद्ध भडकण्यास कारणीभूत ठरली ती संदीप मोहोळची हत्या. गणेश मारणे नावाच्या गुंडाने पौंड फाट्याजवळ संदीप मोहोळची हत्या केली होती. हे वर्ष होतं 2006-07 चं.”

संदीप मोहोळचा पुण्यातील गुन्हेगारी विश्वात दबदबा होता. संदीप हा मुळशी तालुक्यातल्या मुठा गावचा रहिवासी होता. शरद मोहोळ हा संदीपचा विश्वासू साथीदार होता.

संदीप मोहोळच्या हत्येचा वचपा काढण्यासाठी पिंटू मारणेची हत्या करण्यात आली. पिंटूची हत्या मिलन चित्रपटगृहाजवळील प्लॅटिनम बारमध्ये झाली. या हत्या प्रकरणात शरद मोहोळ आणि आलोक भालेराव यांना तुरुंगवास झाला. त्यांची रवानगी अंडा सेलमध्ये झाली.

“याच अंडा सेलमध्ये बॉम्बस्फोटातील संशयित दहशतवादी कातिल सिद्दिकी शिक्षा भोगत होता. या कातिल सिद्दिकीची कडेकोट सुरक्षा असलेल्या अंडा सेलमध्येच शरद मोहोळने हत्या केली. त्यामुळे शरद मोहोळ प्रचंड चर्चेत आला. याच काळात त्यानं ‘हिंदू डॉन’ म्हणून स्वत:ची ओळख तयार करण्याचा प्रयत्न केला,” असं राहुल खिदळकर सांगतात.

या कातिल सिद्दिकी हत्या प्रकरणात शरद मोहोळ आणि आलोक भालेराव यांची पुराव्यांअभावी निर्दोष सुटका झाली.

त्यानंतर मुळशीतल्या सरपंचाचं अपहरण झालं होतं. त्यातही शरद मोहोळ सामिल होता.

मोहोळ विरुद्ध मारणे संघर्ष

महाराष्ट्राची ‘सांस्कृतिक राजधानी’ म्हणवला जाणारा पुणे जिल्हा गँगवॉरचा आखाडा कसा बनला, याबाबत बीबीसी मराठीनं यापूर्वी सविस्तर वृत्त प्रकाशित केलं होतं. त्यात आम्ही ‘मोहोळ विरुद्ध मारणे’ संघर्षाबद्दल सांगितलं होतं. या संघर्षातील मोहोळवरच आता गोळीबार झाल्यानं ते इथे देत आहोत :

इंडियन एक्स्प्रेसने दिलेल्या बातमीनुसार, 2006 मध्ये मारणे गॅंगच्या सुधीर रसाळ यांची बाबा बोडके गँगच्या संदीप मोहोळने हत्या केली होती. सुधीर रसाळ यांच्या हत्येनंतर पुण्यात टोळीयुद्धाला सुरुवात झाली होती. या हत्येचं प्रत्युत्तर म्हणून मारणे गँगनं संदीप मोहोळची हत्या केली.

त्यानंतर या दोन टोळ्यांमधला संघर्ष तीव्र होत गेला. संदीप मोहोळच्या हत्येनंतर त्याचा नातेवाईक शरद मोहोळनं या हत्येचा कथित सूत्रधार किशोर मारणे यांची 2010मध्ये हत्या केली. या हत्येसाठी शरद मोहोळला न्यायालयाने जन्मठेपेची शिक्षा सुनावली.

मारणे गँग आणि नीलेश घायवळ गँगमध्ये देखील पुण्यात चकमकी उडाल्या आहेत. मारणे गँगच्या सदस्यांनी घायवळ यांच्यावर हल्ला केला होता. त्यातून ते थोडक्यात बचावले होते.

घायवळ गॅंग कोथरूड भागात होती आणि पौड रोड भागात वर्चस्व स्थापन करण्याचा या गॅंगचा प्रयत्न होता, असं इंडियन एक्स्प्रेसनं पोलीस अधिकाऱ्यांच्या हवाल्यानं म्हटलं आहे.

2018मध्ये बीबीसी मराठीनं त्याव सविस्तर वृत्त प्रकाशित केलं होतं. ते तुम्ही इथं सविस्तर वाचू शकता -

पुण्यामध्ये टोळीयुद्धं का सुरू झाली?

हेही नक्की वाचा

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify आणि Apple Podcasts इथे ऐकू शकता.)