ऑस्ट्रेलिया दौऱ्यासाठी टीम इंडियाची घोषणा, एकदिवसीय संघाच्या कर्णधारपदी शुबमन गिलची वर्णी

ऑस्ट्रेलियाविरुद्ध एकदिवसीय आणि टी-20 आंतरराष्ट्रीय मालिकेसाठी भारतीय संघाची घोषणा करण्यात आली आहे. महत्त्वाचे म्हणजे रोहित शर्माच्या जागी शुबमन गिलला एकदिवसीय संघाचा कर्णधार म्हणून नियुक्त करण्यात आले आहे.

तर, श्रेयस अय्यरकडे उपकर्णधारपदाची जबाबदारी सोपवण्यात आली आहे. रोहित शर्मा आणि विराट कोहली यांचाही संघात समावेश आहे.

ऑक्टोबर महिन्यापासून सुरू होणाऱ्या या दौऱ्यात भारत आणि ऑस्ट्रेलिया यांच्यात तीन वनडे आणि पाच टी-20 सामन्यांची मालिका खेळवली जाणार आहे.

भारतीय वनडे क्रिकेट संघ : शुबमन गिल (कर्णधार), रोहित शर्मा, विराट कोहली, श्रेयस अय्यर (उप-कर्णधार), अक्षर पटेल, के.एल. राहुल (यष्टीरक्षक), नितीश कुमार रेड्डी, वॉशिंग्टन सुंदर, कुलदीप यादव, हर्षित राणा, मोहम्मद सिराज, अर्शदीप सिंह, प्रसिद्ध कृष्णा, ध्रुव जुरेल (यष्टीरक्षक), यशस्वी जैस्वाल.

भारतीय टी-20 क्रिकेट संघ : सूर्यकुमार यादव (कर्णधार), अभिषेक शर्मा, शुबमन गिल (उप-कर्णधार), तिलक वर्मा, नितीश कुमार रेड्डी, शिवम दुबे, अक्षर पटेल, जितेश शर्मा (यष्टीरक्षक), वरुण चक्रवर्ती, जसप्रीत बुमराह, अर्शदीप सिंह, कुलदीप यादव, हर्षित राणा, संजू सॅमसन, रिंकू सिंह, वॉशिंग्टन सुंदर.

बीबीसीने शुबमन गिलचा क्रिकेट प्रवास सांगणारी बातमी केली होती. ती यानिमित्ताने पुन्हा प्रसिद्ध करत आहोत.

"प्रतिभाशक्ती हा एक भाग आणि शुबमन गिल दुसरा विषय. दमदार वाटचाल कर आणि युवा पिढीचं नेतृत्व कर. देव तुझं कल्याण करो", असं विराट कोहलीने शुबमन गिलच्या पहिल्यावहिल्या आयपीएल शतकानंतर इन्स्टाग्राम स्टोरीत म्हटलं होतं.

विराटला आदर्श मानणाऱ्या शुबमनने त्याचा सल्ला ऐकला आणि कोहलीच्याच बंगळुरूविरुद्ध शतकी खेळी साकारली.

क्रिकइन्फो या प्रसिद्ध संकेतस्थळाने गिलच्या शतकी खेळीचं वर्णन करताना म्हटलं की या शतकी खेळीद्वारे भारतीय क्रिकेटची मशाल कोहलीकडून गिलकडे सुपुर्द झाली.

कोहलीच्या शतकाला प्रत्युत्तर देत गिलने शतकी खेळी साकारली आणि एकाक्षणी अवघड असणारा विजय प्रत्यक्षात साकारला.

आयपीएलच्या 16व्या हंगामाच्या शेवटच्या लीग लढतीत शुबमन गिलच्या शतकाच्या बळावर गुजरात टायटन्स संघाने रॉयल चॅलेंजर्स बंगळुरू संघावर शानदार विजय मिळवला.

शुबमन गिलचं हे सलग दुसऱ्या सामन्यातलं शतक आहे. टेस्ट, वनडे, ट्वेन्टी20 आणि आयपीएल अशा चारही प्रकारात शतक झळकावणाऱ्या मोजक्या फलंदाजांमध्ये गिलचा समावेश झाला आहे.

IPLच्या एकाच हंगामात 3 शतकं

शुबमन गिलने 15 मे रोजी अहमदाबाद इथे सनरायझर्स हैदराबाद संघाविरुद्ध आयपीएल स्पर्धेतलं पहिलंवहिलं शतक झळकावलं. शुबमन गिल हा गुजरात टायटन्स संघातर्फे शतक झळकावणारा पहिला फलंदाज ठरला.

शुबमनने 58 चेंडूत 13 चौकार आणि एका षटकारासह 101 धावांची खेळी केली. टी.नटराजनच्या चेंडूवर एक धाव घेत गिलने आयपीएल स्पर्धेतल्या पहिल्यावहिल्या शतकाला गवसणी घातली.

18 जानेवारी 2023 रोजी शुबमनने शानदार दुसरं शतक झळकावलं. वनडेत द्विशतक झळकावणारा शुबमन सगळ्यात लहान वयाचा फलंदाज ठरला. शुबमनने 149 चेंडूत 19 चौकार आणि 9 षटकारांसह 208 धावांची मॅरेथॉन खेळी केली.

हे वनडे क्रिकेटमधलं दहावं वैयक्तिक द्विशतक आहे. वनडे क्रिकेटमध्ये द्विशतक झळकावणाऱ्यांच्या यादीत रोहित शर्मा, सचिन तेंडुलकर, वीरेंद्र सेहवाग, इशान किशन यांचा समावेश आहे.

भारतीय संघाचा कर्णधार रोहित शर्माच्या नावावर तर तीन द्विशतकं आहेत. वनडे क्रिकेटमध्ये सगळ्यात पहिलं द्विशतक झळकावण्याचा मान मास्टर ब्लास्टर फलंदाज सचिन तेंडुलकरकडे जातो.

शुबमन गिलचा दिमाखदार फॉर्म या IPLमध्ये कायम आहे. मुंबई इंडियन्सविरुद्धच्या अटीतटीच्या उपांत्य लढतीत शुबमनने शतक ठोकत गुजरातला मोठा धावडोंगर उभारायला मदत केली आहे.

हे शुबमनचं याच हंगामातलं तिसरं शतक आहे. यापूर्वी त्याने रॉयल चॅलेंजर्स बंगळुरू आणि हैदराबादविरुद्ध दोन शतकांना गवसणी घातली आहे.

या तिसऱ्या शतकासह त्याच्या याच हंगामातलं वैयक्तिक धावा 800पेक्षा जास्त झाल्या आहेत.

हा उपांत्य सामना जिंकणाऱ्याला अंतिम फेरीत चेन्नई सुपर किंग्सचा सामना करायचा आहे.

2022 सरताना गिलने टेस्ट क्रिकेटमध्ये शतकी शुभारंभ केला. त्याने बांगलादेशविरुद्ध शतकी खेळी केली होती.

यंदाच्या वर्षी अहमदाबाद इथे ऑस्ट्रेलियाविरुद्ध खेळताना गिलने 128 धावांची खेळी साकारली होती. ट्वेन्टी20 आणि वनडे प्रमाणे टेस्ट प्रकारातही गिलची घोडदौड सुरू आहे.

कोण आहे शुबमन गिल?

शुबमन गिलचा जन्म पंजाबमधल्या फझिलका जिल्ह्यातील चक खेरेवाला गावातला. त्याचे वडील लखविंदर यांना क्रिकेटपटू व्हायचं होतं. शुबमनच्या माध्यमातून त्यांचं स्वप्न साकार होतं आहे.

लखविंदर यांनी शेतात क्रिकेटचं पिच तयार केलं जेणेकरुन शुबमनला सरावाला अन्यत्र कुठे जावं लागणार नाही.

शुबमनच्या करिअरच्या दृष्टीने लखविंदर यांनी गावातून मोहाली अर्थात चंदीगढ इथे स्थायिक होण्याचा निर्णय घेतला.

डोमेस्टिक क्रिकेटमध्ये पंजाबसाठी खेळतानाही शुबमनची कामगिरी उत्तम अशीच आहे. 42 प्रथम श्रेणी सामन्यांमध्ये शुबमनने 52.80च्या सरासरीने 3432 धावा केल्या आहेत. यामध्ये 10 शतकं आणि 16 अर्धशतकांचा समावेश आहे.

2018 ते 2021 अशी 4 वर्ष शुबमन कोलकाता नाईट रायडर्स संघाचा भाग होता.

संघाचा प्रमुख फलंदाजांपैकी एक आणि सलामीवीर ही दुहेरी भूमिका गिलने चोख बजावली.

गिलच्या रुपात भविष्यातला कर्णधारपदाचा पर्याय कोलकाता संघव्यवस्थापनासमोर होता.

मात्र त्यांनी वेंकटेश अय्यर, सुनील नरिन, आंद्रे रसेल आणि वरुण चक्रवर्ती यांना रिटेन करण्याचा निर्णय घेतला. याचा अचूक फायदा उठवत गुजरात टायटन्स संघाने गिलला आपल्या ताफ्यात समाविष्ट केलं.

धावांच्या राशी आणि युवा संघाचं नेतृत्व

प्रतिभेला अविरत मेहनतीची जोड दिली तर काय होऊ शकतं याचा वस्तुपाठ शुभमन गिलच्या रुपात टीम इंडियाच्या चाहत्यांसमोर आहे.

2020 मध्ये बॉक्सिंग डे दिवशी शुभमनने भारतीय कसोटी संघात पदार्पण केलं होतं. मिळालेल्या प्रत्येक संधीचं सोनं करत शुभमनने प्रयत्नपूर्वक ही संधी मिळवली आहे.

2018 मध्ये U19 वर्ल्डकप स्पर्धेत शुभमनने सर्वाधिक रन्स करत ‘मॅन ऑफ द सीरिज’चा पुरस्कार पटकावला होता.

सरळ बॅट, डोकं स्थिर स्थितीत, हाय बॅकलिफ्टसह उंचावर जाणारा कोपरा, उसळत्या चेंडूवर पकड मिळवण्याची खुबी यामुळे शुभमन ज्या संघाकडून खेळतो तिथले प्रशिक्षक, कोचिंग स्टाफ, वरिष्ठ खेळाडू यांचं लक्ष वेधून घेतो.

2018-19 रणजी हंगामात शुभमनने 9 डावात 104च्या सरासरीने 728 धावांची लूट केली. चांगल्या संघांविरुद्धची ही कामगिरी लक्षात घेऊन भारतीय अ संघाचे प्रशिक्षक राहुल द्रविड यांनी त्याला संघात समाविष्ट करुन घेतलं.

टीम इंडियाचा माजी खेळाडू युवराज सिंगने शुभमनच्या खेळाचं कौतुक केलं होतं. 2019 वर्ल्ड कपनंतर या मुलाला भारतीय संघात घ्यायला हवं असंही युवराज म्हणाला होता.

वर्षभरात शुभमनचं टीम इंडियासाठी खेळण्याचं स्वप्न साकार झालं. न्यूझीलंड दौऱ्यात शुभमनने वनडे पदार्पण केलं.

त्याच वर्षी शुभमनने भारतीय अ संघाच्या वेस्ट इंडिज दौऱ्यात धावांची टांकसाळ उघडली आणि मॅन ऑफ द सीरिजचा पुरस्कार पटकावला. या दौऱ्यात त्याने 204 धावांची मॅरेथॉन खेळी साकारली होती.

मायदेशी परतल्यानंतर भारतीय अ संघाच्या दक्षिण आफ्रिकेविरुद्धच्या मालिकेत मुख्य बॅट्समन आणि कर्णधारपद अशा दोन्ही भूमिका शुभमन गिल याने समर्थपणे सांभाळल्या होत्या.

2018 मध्ये आयपीएलमधल्या कोलकाता नाईट रायडर्स संघाने 1.8 कोटी रुपये खर्चून शुभमनला संघात समाविष्ट केलं. ओपनर आणि भविष्यातील कॅप्टन म्हणून केकेआर संघ शुभमनकडे पाहतो आहे.

शुभमननेही सातत्याने चांगल्या खेळी करत संघव्यवस्थापनाचा विश्वास सार्थ ठरवला आहे. 2019 हंगामात शुभमनची इमर्जिंग प्लेयर ऑफ द इअर म्हणून निवड झाली. काही महिन्यांपूर्वी आटोपलेल्या आयपीएलच्या 13व्या हंगामात शुभमनने 440 रन्स केल्या.

तब्बल 8 कोटी रुपये खर्चून गुजरातने त्याला ताफ्यात समाविष्ट केलं. शुबमनने संघाचा विश्वास सार्थ ठरवत दमदार कामगिरी करतो आहे.

(बीबीसीसाठी कलेक्टिव्ह न्यूजरूमचे प्रकाशन)

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)