'दानुष्काने सेक्स दरम्यान काँडम काढून टाकलं, माझा गळासुद्धा आवळला’
फोटो स्रोत, Getty Images
- Author, टिफनी टर्नबल
- Role, बीबीसी प्रतिनिधी
- Reporting from, सीडनी
श्रीलंकन क्रिकेटर दानुष्का गुणातिलके प्रकरणात आता नवीन माहिती समोर आली आहे. दानुष्काने सेक्स दरम्यान जबरदस्ती गळा आवळला आणि काँडम कढून फेकलं, असा आरोप पीडित महिलेनं केला आहे.
कोर्टातील सुनावणी दरम्यान हा आरोप करण्यात आला आहे.
दरम्यान पोलिसांना दिलेल्या जबाबात मात्र दानुष्काने त्याच्यावरचे आरोप फेटाळले आहेत. ऑस्ट्रेलियात सुरू असलेली टी-20 क्रिकेट वर्ल्ड कप स्पर्धा खेळण्यासाठी श्रीलंकन टीम तिथं गेली होती. त्यावेळी दानुष्काला रविवारी (6 नोव्हेंबर) सिडनीतून अटक करण्यात आली आहे. 29 वर्षीय महिलेनं त्याच्यावर बलात्काराचा आरोप केला.
त्यानंतर श्रीलंकन क्रिकेट बोर्डाने दानुष्का गुणातिलकेला सर्व प्रकारच्या क्रिकेटमधून निलंबित केलं आहे.
आता सिडनी कोर्टानं त्याला जामीन नाकारला आहे. तो ऑस्ट्रेलिया सोडून पळून जाण्याची भीती पोलिसांनी व्यक्त केली आहे. कोर्टात देण्यात आलेल्या माहिती नुसार दानुष्का आणि 29 वर्षीय पीडित तरुणी 29 ऑक्टोबरला टिंडरवर भेटले. त्यानंतर 2 नोव्हेंबरला सीडनीमध्ये डिक्स आणि डिनरसाठी भेटले. त्यानंतर ते पीडितेच्या घरी आले. त्यावेळी दानुष्काने पीडित तरुणीवर सेक्स करण्यासाठी दबाव आणला. तसंच सेक्स दरम्यान तीन वेळा तिचा गळा आवळला आणि एकदा तर 30 सेकंदांसाठी तिचा गळा आवळला होता, असा दावा पोलिसांच्या अहवालात करण्यात आला आहे. पीडितेला तिच्या जीवाची भीती वाटत होती म्हणून ती पुढे येऊन बोलण्यास घाबरत होती, असा दावासुद्धा पोलिसांनी कोर्टात केला आहे.
फोटो स्रोत, Getty Images
सेक्स दरम्यान काँडम जमिनीवर पडलेलं पीडितेनं पाहिलं, ते घालण्यासाठी त्याला सांगण्यात आलं, पण त्यानं त्याकडे दुर्लक्ष केलंअसंसुद्धा पोलिसांच्या अहवालात म्हणण्यात आलं होतं. पीडितेनं घाबरत सर्व प्रकार तिच्या 2 मैत्रिणींना सांगितला.
त्यानंतर तिनं मानसोपचार तज्ज्ञांची मदत घेतली. शिवाय गळा दाबल्यामुळे काही दुखापत तर झाली नाही ना यासाठी तिने डॉक्टरांकडून तपासणी करून घेतली. त्यानंतर मग तिने पोलिसात तक्रार करण्यासाठी धाव घेतली. पीडित तरुणी आणि त्याच्यात सहमतीने सेक्स झाल्याचा दावा, दानुष्काने पोलिसांच्या जबाबात केला आहे. तसंच सेक्स दरम्यान कुठलीही हिंसा केली नसल्याचं त्याने पोलिसांना सांगितलं आहे.
पण, तरुणीची सहमती मिळवण्यासाठी दोघांमध्ये नेमका काय संवाद झाला असा सवाल पोलिसांनी केल्यावर मात्रा दानुष्काला समाधानकारक उत्तर देण्यात आलं नसल्याचं सांगण्यात आलं आहे.
फोटो स्रोत, Getty Images
ऑस्ट्रेलियातल्या न्यू साऊथ वेल्स मधल्या कायद्यांनुसार सेक्स करताना एकमेकांची सहमती मिळण्यासाठी काहीतरी संभाषण किंवा कृती करणं गरजेचं आहे. तशी सहमती नसेल तर कायद्यानुसार तो गुन्हा ठरतो.
तसंच तिथं जूनपासून एक नवा कायदा लागू करण्यात आला आहे. त्यानुसार ‘स्टेलथिंग’ म्हणजेच सेक्स दरम्यान विनासहमती काँडम काढणं गुन्हा ठरवण्यात आलं आहे.
दानुष्का आणि वाद
2017 मध्ये दानुष्कावर गैतवर्तणुकीवरून कारवाई करण्यात आली होती. तेव्हा त्याला 6 मॅचेससाठी निलंबित करण्यात आलं होतं. त्यावेळी स्वतःचं क्रिकेट किट न आणण्याचा आरोपसुद्धा त्याच्यावर करण्यात आला होता. पण नंतर ही कारवाई फक्त 3 मॅच पुरतीच करण्यात आली.
2018 मध्ये दानुष्कावर पुन्हा एकदा 6 मॅचेससाठी निलंबनाची कारवाई करण्यात आली. यावेळी त्याच्यावर टीम कर्फ्युचं पालन न केल्याचा ठपका ठेवण्यात आला होता.
2018 मध्ये त्याच्यावर पुन्हा एकदा निलंबनाची कारवाई करण्यात आली. जेव्हा त्याच्या जवळच्या मित्रावर नॉर्वेच्या एका महिलेवर बलात्काराचे आरोप झालेले.
2021 मध्ये UKमध्ये असताना कोरोना बायो बबलच्या नियमांचा भंग केल्यामुळे दानुष्कावर 1 वर्षाच्या निलंबनाची कारवाई करण्यात आलेली. सहा महिन्यांनतर मात्र त्याच्यावरची ही कारवाई मागे घेण्यात आली होती.
कोण आहे दानुष्का गुणातिलके?
डावखुरा दानुष्का आक्रमक बॅटिंग शैलीसाठी ओळखला जातो. 2015 मध्ये श्रीलंका 'अ' संघाच्या न्यूझीलंड दौऱ्यात त्याने चांगली कामगिरी केली. 2017 मध्ये गुणतिलकाने चॅम्पियन्स ट्रॉफी स्पर्धेत भारताविरुद्ध 72 बॉलमध्ये 76 रन्सची वेगवान खेळी साकारत श्रीलंकेला दिमाखदार विजय मिळवून दिला होता. गुणतिलके मूळ संघात नव्हता पण चामरा कपूगेडराला झालेल्या दुखापतीमुळे त्याला संधी मिळाली. दानुष्काने त्या संधीचं सोनं केलं. कुमार संगकाराला आदर्श मानणारा गुणतिलका ऑफस्पिन बॉलिंगही करतो. आक्रमक शैलीमुळे ट्वेन्टी20 प्रकारात श्रीलंकेच्या संघाचा तो अविभाज्य भाग आहे.
दानुष्काने आतापर्यंत 8 टेस्ट, 47 वनडे आणि 46 ट्वेन्टी-20 सामन्यात श्रीलंकेचं प्रतिनिधित्व केलं आहे. वनडे प्रकारात दानुष्काच्या नावावर दोन शतकंही आहेत. दानुष्काने 2017 मध्ये गॉल इथे भारताविरुद्ध पदार्पण केलं होतं. यंदाच्या वर्ल्डकपमध्ये श्रीलंकेचा संघ पात्रता फेरीपासून खेळतो आहे. दानुष्का गीलाँग इथे झालेल्या नामिबियाविरुद्धच्या लढतीत खेळला. त्यात त्याला भोपळाही फोडता आला नाही.
हॅमस्ट्रिंग दुखापतीमुळे दानुष्का स्पर्धेत पुढे खेळू शकणार नसल्याचं स्पष्ट झालं होतं. खेळू शकणार नसला तरी दानुष्का संघाबरोबर ऑस्ट्रेलियातच होता. तो मायदेशी परतला नव्हता.
हेही वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
