Eolas do thuismitheoirí agus do mhúinteoirí ar 'Thart Orainn', áis tíreolaícohta atá dírithe ar pháistí 7-11 bliain d'aois
Físuirlis
Is pacáiste físe é seo atá furasta a úsáid agus a chuireann ar a chumas don úsáideoir físeáin ghearra a chruthú dó féin.
Is féidir leis an úsáideoir gearrthóga ó na 6 chás-staidéir a roghnú agus a chur in ord chomh maith le fortheidil a chumadh agus rian ceoil a roghnú. Is uirlis 'solúbtha' é seo a ligeann don úsáideoir aithris a dhéanamh ar a bhfuil foghlamtha aige ó na cás-staidéir, scéal úr a insint, nó físeán a chruthú faoina thaithí féin.
•Tá rogha ag an úsáideoir maidir le fad na ngearrthóg - idir gairid, meánmhéid nó fada - agus tá siad rangaithe de réir théama na gcás-staidéar. Is féidir gearrthóga a réamhfheicéail ach iad a tharraingt isteach i bhfuinneog na bhfíseán. Más mian leis an úsáideoir iad a chur sa tsraith, níl le déanamh ach iad a tharraingt ar an amlíne físe.
•Le fortheidil agus teidil a chur leis an fhíseán, caithfidh an t-úsáideoir cliceáil ar bhosca na bhfortheideal i dtús báire chun iad a chruthú. Ansin is féidir iad a tharraingt ar an amlíne físe agus a chur ar an ghearrthóg chuí.
•Le ceol a chur leis an fhíseán ar fad, cliceáiltear ar an phainéal dar teideal roghnaigh rian fuaime ag bun an scáileáin.
•Is féidir leis an úsáideoir a chuid oibre a shábháil ar an ríomhaire ar a bhfuil sé ag obair ach cliceáil ar an deilbhín 'sábháil'. Ní bheidh sé in ann an fhíseán seo a athlódáil ná a fheiceáil ar ríomhaire ar bith eile.
•Thig leis an úsáideoir treoracha céim-ar-chéim a fheiceáil faoi úsáid na Físuirlise ach cliceáil ar an aghaidh chairdiúil.
