Etu nwaanyị si gbuo enyi ya nwoke maka ike ego ha nwetara na nwayo

Ndị uweojii Imo steeti anwụchiela otu nwaanyị maka ebubo igbu ọyị ya nwoke na steeti ahụ.

Ebubo ha boro ya bụ na ọ bụ esemokwu si n'ike ego ha nwetara na wayo ha gwụrụ mmadụ n'ịntanetị.

Nwaanyị ahụ kọrọ ndị uweojii etu ọyị ya nwoke si dubaa n'ọrụ igwu ndị mmadụ wayo a ma dịka 'Yahoo yahoo' na Naịjịrịa.

Ọ sị na ha na-aba mba maka etu nwoke ahụ esighi nye ya oke n'ime ego ruru 250m Rupiah (N22,578,000m) ha natara otu nwoke si mba Inodeneshia.

N'ihe onyonyo ebe ndị uweojii na-agba nwaanyị ahụ ajụjụ ọnụ, o kwuru na ọ bụ kemgbe afọ 2019 ka ya na nwoke ahụ o gburu bi n'otu ụlọ nakwa na ọ mụọrọla ya nwa.

Ọ sịkwa na o kuru nwa ya nwaanyị gbapụ ọsọ mgbe ọ sụchara nke nwoke mma n'ihi na ahụ adịghị ya nke mere o ji kuru ya gaa na nke nwanne nne maọbụ nna ya.

Ndị uweojii sị na ọ bụ mgbe ha na-ese okwu ka o ji mma sụọ ya n'ahụ ya.

Ha sịkwa na o dere "ịche na ị ga-eri ego m gbalaga, aga m achọta gị na ezinaụlọ gị ma nwa gị" ma tụsa ya n'ahụ nwoke ahụ iji kpuchi na aka ya dị n'ọnwụ ya.

Ndị uweojii sị na ọchịchọ na-aga n'ihụ ịchọta ego ahụ ma nyefee ya n'aka onye nwe ya.

"Anyị ga-akpụpụ nwaanyị ahụ dị afọ 27 ụlọikpe ma nyocha anyị gachaa" ka ha kwuru.