Etu ndị ojiegbe si gbuo otu nwoke, tọro ndị ọchịchị APC abụọ n’Imo steeti

Akụkọ ọhụrụ si Imo steeti apụta taa bụ ụbọchị 20 nke ọnwa Ọgọst na-ekwu na ndị ojiegbe wakporo okporoụzọ a na-akpọ U-turn dị nso ahịa Nkwo Orji ma gbuo otu nwoke.

Ahịa a dị n'ụzọ Owerri gawa Okigwe, bụ ebe e kwuru na ndị ojiegbe a gbagburu otu nwoke na-arụ ụgbọala ma tọrọ mmadụ atọ nọ n’ime ụgboala o bu.

E kwuru na ihe a mere n’ụbọchị Fraịde.

Onye ogbo nwoke a na-achọghị ka a kpọọ aha ya gwara onye ntaakụkọ anyị taa bụ Satọdee:

“Ihe a mere bụ ihe mwute, nwoke a alụọla nwunye, nwunye ya na-ere ihe n’akụkụ ebe ọ na-emezi ụgbọala ndị mmadụ”

Onye ọzọ nọ ebe ahụ ihe a wee mee gbara ama sị na “Nwoke a bụ onye okporoọchịchị Ikeduru, ndị a gburu ya kwuru na ọ bụghị ya ka ha chọọ bịa mana ọ kweghị rubere ha isi nke mere ha ji gbaa ya egbe”.

E kwuru na ndị ojigbe ahụ gbara egbe aghara aghara dịka ha bu ndị a sị nọ n’ụgbọala ya gbaba ụzọ Okigwe.

Akụkọ ọzọ yiri nke a sịkwa n’akụkụ abụọ n’Imo steeti dapụta n’abalị Fraịdee dịka e kwuru na ndị ojiegbe tọọrọ ndị ọchịchị a sị bụ ndị otu pati All Progressive Congress (APC) abụọ.

Otu onye na-achọghị ka a kpọọ aha ya gwara onye ntaakụkọ anyị na a tọọrọ Godson Obijiaku n’obodo ya bụ Amauzairi, ebe a tọọrọ onye ọchịchị APC nke ọzọ e ji ‘Ability’ mara n’ụlọọrụ ebe a na-ere ọgwụ n’Amaraku.

E kwuru na ndị ojiegbe ahụ bu ụgbọala wụbata ebe a na-ere ọgwụ bagide Ability ma gbaa egbe aghara aghara ebe ahụ tupu ha a tọọrọ ya.

Mbọ niile BBC Igbo gbara iji nụ olu ọnụ na-ekwuru ndị uweojii n’Imo steeti bụ Michael Abattam amịtaghị mkpụrụ dịka ọ zaghị ozi e zitere ya.

Imo steeti so n’akụkụ Ọwụwa anyanwụ Naịjirịa ebe enweghị ezi nchekwa na-enye nsogbu ugbua.

Ọtụtụ otu ndị ojiegbe dị iche iche na-awakpo ndị mmadụ, na-atọrọ ma na-egbu ụfọdụ. Gọọmentị Imo steeti aṅwụla iyi ibelata ihe ndị a na-eme na steeti ahụ site n’izibata ndị uweojii, ndị agha Naịjirịa nakwa otu nchekwa pụrụiche bụ Ebubeagu. Na nso nso o gọvanọ Hope Uzodinma zụtara ụgbọala pụrụiche 10 e ji ebu agha iji kwado ndị ọrụ nchekwa n'ọrụ ha.