Gịnị ga-eme ka a lụọ nwaanyị n'ozu n'ala Igbo?

Ndị na-ebe akwa n'akwamozu — Nkọwa foto, Onye n'alụghị na ndụ, ọ lụ ọ n'ọnwụ, bụ usoro ọtụtụ obodo si eme

4 Septemba 2024

Oge e ji agụ akụkọ nkeji 3

A na-enwetakarị ndị ntoroọbịa na agbọghọbịa hụrụ onwe ha n'anya, ma kwekọrịtara ibikọta ọnụ dịka di na nwunye, mana ha emeghị omenala alụmdinanwunye dịka ha kwesịrị.

A na-ahụtakwa mgbe ụfọdụ ihe mberede dị iche iche n'ọnọdụ a, ọkachasị nwaanyị ịnọ n'ụlọ nwoke ahụ nwụọ na-enweghị mmemme alụm ọbụla e mere n'ụzọ omenala.

Skip Akụkọ ndị ọzọ gbasara ụmụnwaanyị BBC Igbo mere and continue readingAkụkọ ndị ọzọ gbasara ụmụnwaanyị BBC Igbo mere

Ezenwaanyị, Ugoeze, Iyom na echichi ndị ọzọ a na-echi ụmụnwaanyị n'ala Igbo15 Jenụwarị 2023
Ihe ise masịrị ụmụnwaanyị12 Maachị 2018
Gịnị mere ụmụnwaanyị jị anọte aka n'usekwu n'oge mmemme?26 Disemba 2018

End of Akụkọ ndị ọzọ gbasara ụmụnwaanyị BBC Igbo mere

Ka o sila dị, nke a na-etinyekarị ezinaụlọ dị iche iche na gbagharịa.

N'ihi ajọ ọnọdụ a, ụfọdụ obodo dị n'ala Igbo, mere ya ka ọ bụrụ iwu na nwoke ga-alụ nwaanyị ya na ya bi n'ozu, bụ nke ọ na-emeghị mgbe ọ dị ndụ.

Skip content and continue reading

Ihe omimi dị n'ichi ọzọ n'ala Igbo31 Jenụwarị 2021

End of content

Ihe ga-eme ka alụọ nwaanyị n'ozu:

Nwoke na nwaanyị jikọ aka — Nkọwa foto, Igbo adịghi anabata nwoke na nwaanyị ibi na-alụghị alụ

N'ala Igbo, anaghị ekweta na nwoke alụọla nwaanyị, maọbụrụ na o mezubeghị ihe n'isi ya.

Ọ bụrụgodu na o mere nke ụlọikpe, a tụrụ anya na ọ ga-abịa mekwaa ihe dịka ndị nwe nwa siri chọọ.

Dịka ọkachamara n'okwu gbasara omenala bụ Nze Olueze Ụkaejuoha (Duruagwụ nke abụọ) n'Ụmụakara, Isu dị na Nwangele nke Imo steeti siri gwa BBC Igbo, iwu a dị ezigbo ire n'obodo ha, bụkwa nke nwere ntaramahụhụ dị iche iche so ya.

Mana n'obodo Akọkwa dịkwa n'Imo steeti, atụmatụ a adịghị ire ọbụla, ebe ezinaụlọ mụrụ nwaanyị na-abịa eburu ozu nwa ha ma gaa lie n'ụlọ ha.

Skip Akachasị Gụọ and continue reading

Akachasị Gụọ

End of Akachasị Gụọ

Usoro esi alụ nwaanyị n'ozu:

Onye ahụ ga-abịa gwa ndị mụ nwa na nwa ha nwere ahụ ọkụ (ọ gaghị ebu ụzọ agwa ha na ọ nwụọla).
Ha ga-eso ya gaa 'leta' nwa ha, mgbe ha hụrụ ozu ya, ha ga-ebo nke nwoke ebubo na ọ bụ ya gburu nwa ha, nke ga-eme ka ọ gọwa ụkwụ na aka ya
Iji gosi na ọ bụghị ya gburu ya ọ ga-ekwenye ịlụ ozu nwaanyị ahụ
Ọ ga-abịa lụọ ya
Ọ ga-abịaghachị gwazie ndị mụ nwa na nwunye ya anwụọla
Nwoke ahụ ga-agazi n'ihu mee mmemme akwamozu ya.

Ihe ga-eme onye jụrụ ịlụ nwaanyị n'ozu:

Dịka Nze Ụkaejuọha siri kọwaa, ihe ndị a bụ ihe ga-eme onye jụrụ ịlụ nwaanyị omeghị ihe isi ya n'ozu:

Onye ahụ ga-enweta ntaramahụhụ n'ụzọ dị iche iche
Ihe ọjọọ dịkwa iche iche na-ezute onye ahụ
Ihe anaghị agara onye dị otu a nke ọma
Onye ahụ nwekwara ike ịnwụ ọnwụ ihere

Mana onye ahụ nwere ike ichegharị, tụmadụ ma ọ bụrụ na ihe ndakwasị niile a bido ịdakwasị ya.

Ihe onye ahụ ga-eme ma o chegharịa

Ọ bụrụ na nwoke ahụ kpọchiri ntị ma mechaa chegharịa n'ihi ihe mkpọbi ụkwụ ọ na-enweta, ihe ndị a ka ọ ga-eme:

Onye ahụ ga-ezite ndị okenye obodo ha ka ha bịa mee ka ala daa jụụ
A ga-enye ya ntaramahụhụ site n'ịhụ na o mezuru ihe ndị o kwesịrị ime n'ụzọ okpuku abụọ.