Ebele Obiano and Bianca Ojukwu: Ihe mere Bianca Ojukwu jiri 'maa mụ ụra' - Ebele Obiano

Ebelechukwu Obiano bụ nwunye Willie Obiano nke bụbu gọvanọ Anambra steeti, ekwuola na ọ bụ ekele ka ọ gara ikele Bianca Ojukwu mere O ji 'maa ya ụra'.

Obiano kwuru na o riri ya ọnụ ihe mere Ojukwu ga-eji 'maa ya ụra', nke na-efegharị n'ihe onyonyo mgbe a na-edu Charles Soludo n'iyi ọrụ dịka Gọvanọ ọhụrụ Anambra Steeti n'ụbọchị 17 nke ọnwa Maachị afọ 2022.

Ọ bụ n'akwụkwọ ozi o si n'aka Chidiebele Obika bụ otu ọnụ na-ekwuru ya depụta n'ụbọchị 19 nke ọnwa Maachị, ka o kwuru nke a wee sị, "Agara m ikele Bianca Ojukwu dịka mụ na ya na-ekele na mbụ, o jiri 'maa mụ ụra' ma kwaa m aka", na-enweghi ihe m mere ya iji kpasuo ya iwe."

O kwuru sị, "Aghọtaghị m ihe mere onye bụbu onnye nnọchiteanya anya Naijirịa ga-eji nwee ụdịrị iwe na ekworo dị etu a n'obi ya".

Obiano kwuru na ọ baghị ya n'obi ịzaghachi Ojukwu, kama na o si ebe ahụ pụọ dịka ihe merenu gbara ya gharịị.

Gịnị na-esere ha?

Okwu a kpụ n'ọnụ kemgbe Tọzde 17 Maachị, 2022 bụ esemokwu dapụtara n'etiti Ebele Obiano na Bianca Ojukwu n'oge a na-edu gọvanọ Charles Soludo n'iyi ọrụ n'Awka, Anambra Steetị.

E nweghi onye maara kpọmkwem ihe butere esemokwu n'etịtị ụmụada Igbo abụọ a.

Ihe onyonyo fegharịrị na soshal midia ụbọchị Monde gosiri ka Ebele Obiano biliri n'oche ya gakwuru Bianca n'ebe ọ nọ, mana a maghị kpọmkwem ihe Ebele gwara Bianca.

Bianca kwụrụ n'ozi o nyere Ụlọntaakụkọ Arise Ụbọchị Tuzde na ọ bụ Ebele Obiano bịara ebe ọ nọ ala ịkwa ya emo, jụọ ya, "Gịnị ka ị bịara ime ebe a, ọ kwa ị sị na ịgaghị abịa emume ndị pati APGA ọzọ"

O kwuru na ya gbara ya nkịtị dịka ndị nọ nso dụrụ ya ọdụ ya gba ya nkịtị mana o bidoro dụwa ya aka n'ubu.

" Agwara m ya ya emetụzịla m aka mana ọ gara n'ihu dụkwa m aka ma chọọ iwepụ ịchafụ m, were kunie nye ya ụra chara ọkụ iji kwụsị ya."

Kedụ mgbe esemokwu a malitere?

Mana tupu ụbọchị idu Soludo n'iyi ọrụ eruo, e nweela esemokwu dị n'etiti Bianca Ojukwu na ụfọdụ ndị ndu pati APGA, ọkachasị oge Willie Obiano na-achị Anambra Steetị.

Otu onye ọnụ na-eru n'okwu ndọrọ ndọrọ n'Anambra na-achọghị ka a kpọọ aha ya sị na ọ malitere n'afọ 2018/2019.

Na ọ bụ mgbe Bianca Ojukwu chọrọ ịzọ ọkwa sịnetọ ga-anọchiteanya Anambra South na nwunye Ebele Obiano kpọpụtara onye a kpọrọ Prince Nicholas Ukachukwu ka ọ zọsị Bianca ọkwa ahụ.

Na oge a na-eme ntuliaka ime ụlọ n'Ekwulobia, na ọ gbaghara dapụtara nke mere APGA jiri nye Nicholas Ukachukwu ọkọlọtọ.

"Kamgbe ahụ ka esemokwu dị n'etiti Ebele na Bianca biri ọkụ nke mere ha jiri na-akatọ onwe ha, tinyekwuoro ndị nkwado ha.

N'otu ihe onyonyo wepụtara n'afọ 2018, Bianca Ojukwu katọrọ ndị ndu APGA maka etu ha sị akpa agwa bụ nke ọ sị na ọ jọgburu onwe ya.

Ọ sị na "ndị APGA kparịrị ndị Igbo. A ga-ekwe nwata aka maka ịgbahapụ nne ya na ụmụnne ya mgbe nna ha nwụrụ?"

A ka na-ekwu ya "APGA anara ụmụnne ha ego n'Imo Steeti n'aha ime ntuliaka ime ụlọ mana ha emechaghị mee ya kama ha tinyere ndị masịrị ha n'ọkwa."

Nke a butere esemokwu n'etiti ya na ndị ndu APGA bụ nke Gọvanọ Willie Obiano na-achị Anambra n'oge ahụ bụ otu n'ime ha.

Akụkọ kwuru na ọ bụ n'ihi esemokwu ahụ mere APGA enyeghi Bianca Ojukwu ọkọlọtọ ịzọ ọkwa Sịnetọ n'afọ 2019.

N'isi ụtụtụ ụbọchị 17 Maachị, 2022 bụ mgbe Obiano ga-arịtu n'ọkwa, Bianca dere ọtụtụ ihe n'akara Facebook ya nke gosiri na obi dị ya mma na onye ọzọ na-abanye n'ọchịchị Anambra Steeti nakwa APGA.

Bianca sị "Ụbọchị ọhụrụ abịala, ụbọchị nwereonwe, anyị ga-abụ abụ mgbapụta. Anambra ga-aka mma".

Ọ sị na ọ dịka ụbọchị ndị Izrelụ nwereonwe ha site n'aka ndị Ijiptu ka e dere ya n'akwụkwọ nsọ.

Bianca sị na ụbọchị a gosiri na o nweghi onye ga-anọ n'ọgbọ ruo ebighi ebi.

O doghi anya ma ọ bụ ihe ndị ahụ ka nwunye Willie Obiano bụ Ebele hụrụ mere o jiri gakwuru Bianca n'oge emume idu n'iyi ọrụ ahụ.

Onye bụ Bianca Ojukwu

Onye bụ Ebelechukwu Veronica Obiano?