Merry Christmas: Lee ihe ndị ị nwereike iji gbaara onwe gị ekeresimesi

I lezie anya nke ọma i nwereike ịhụ na ekeresimesi nke afọ a adabachaghị ka i si tụọ anya ya.

Nke a mere na i nweghi ohere maọbụ ikike isonye ezinaụlọ gị, ndị enyi, ndị ikwu maọbụ ndị ibe gbaa ekeresimesi.

Ka ọ ghara ịmapụ gị obi, n'ihi na i nwereike ịkpori ndụ naanị gị karịa mgbe gị na ndị ọzọ nọ.

Ndị ọkachamara na-ahụ maka ahụike ụbụrụ tụnyere arọ etu i nwereike iji gbaa ekeresimesi a.

Gbanwe ihe ndị ị na-atụ anya ha

O nwereike ị haziela ụzọ ị ga-eji gbaa ekeresimesi ka ọ tọọ gị gwogwo dịka ihe ị ga-eri, mmanya ị ga-aṅụ, onyinye a ga-enye gị gdz.

Mana ebe ọ na-adabaghị etu ahụ, were obi ọma nabata ya ma chọọ ihe ọzọ were mee onwe gị obi ụtọ.

Ọ bụ ụbọchị anụrị, e kwela ka ihe maọbụ mmadụ ọbụla mee gị obi ọjọọ.

Hazie onwe gị nke ọma

E tela n'ụra n'ụbọchị ekeresimesi na-amaghị ihe ị ga-eme, hazie onwe gị maka ihe ị ga-eri n'ụtụtụ, ehihie nakwa n'abalị.

Gbaa mbọ hụ na i nwere nri dị mma ị ga-eri, o nwere ndị mmadụ i nwereike ịkpọ n'ekwentị ị kpọọ ha.

I nwekwara ike chọọ ụlọ gị mma n'ụzọ pụrụiche, tinye foto ekeresimesi dị iche iche.

Nke kachasị nke bụ chọọ ihe ị ga-eji mee onwe gị obi ụtọ.

Mee ihe ahụ na-enye gị obi anụrị

Ihe ọbụla ị maara na-enye gị obi ụtọ mee ya. O nwereike ịbụ ikiri onyonyo, ịgba egwu, ige egwu dgz.

I nwereike zụọrọ onwe gị ihe onyinye maọbụ ihe ahụ na-agụ gị agụụ.

A nọla na-eche ka mmadụ zụọrọ gị ya.

Kpọọ ndị enyi gị n'ekwentị

Ọ bụrụ na o nwere ndị enyi gị ị chọrọ ịkwa okwu, chọọ ụzọ kpọọ ha n'ekwentị maọbụ ihe onyonyo. Maọbụ gị na ha ekirie ihe onyonyo.

I nwekwara ike ikpagharịtụ maka ụkwụ ọzịza ma ọ bụrụ na ịnọ naanị agwụla gị ike.

Ikwe ndị mmadụ ekele dị ka 'Merry Christmas' na-enye ezigbo aka.

Rie nri ahụ gụrụ gị agụụ

O nweghi iwu sị lekwa ụdị nri mmadụ kwesịrị iri n'ụbọchị ekeresimesi.

Ọ bụrụ na ọ bụ akpụ, osikapa, ji, ede maọbụ agwa na-agụ gị, biko rie ya na-eleghị mmadụ anya n'ihu.

Ọ bụrụ naanị ịta anụ ọkụkọ, nke ewu, nke ehi na-agụ gị, gbaa mbọ taa ya.

Na nchịkọta, i nwereike ikpebi na ị gaghị agba ekeresimesi nke afọ a.

Were ya ka ọ bụ ụbọchị ndị ọzọ n'afọ, nke ga-eme ka ọ dịrị gị mfe ichefu na ọ bụ ekeresimesi.

Ihe kachasị mkpa bụ na i nwere obi ụtọ na ojuju afọ n'ime onwe gị.

Maka na Igbo na-atụ ilu sị na "anụ laa taa na echi bụ nta", n'ụbọchị ntaa a chụọ n'owere nchi".