Valentine's Day Meaning: Ihe mere ụfọdụ anaghị eji Valentine's Day kpọrọ ihe

Ụbọchị Valentine (Febrụwarị 14) nwere ndị ọ na-eme obi aṅụrị, mana ọ bụghị onye niile ka ọ na-amasị.

Ebe ndị ọzọ na-enye onyinye gụnyere ego, ihe nracha chọkọleti, flawa, ịkpọ ndị ọ dị ha n'obi apụ nlegharị anya na ihe ndị ọzọ, ndị nke a anaghị achọ iji ntị anụ maka 'Valentine' cha cha.

Nye ndị ahụ, ịhụ ebe ndị mmadụ na-enye onwe ha onyinye etu a nakwa ịhụ ebe ndị mmadụ na-eyikarị uwe na-acha ọbara ọbara nakwa/maọbụ nke ọcha agagharị (Kedụ onye kwudiri na ọ bụ agwa a ka ndị mmadụ ga na-eyi ụbọchị ahụ?) agbasaghị ha.

Mana gịnị mere e ji nwee ụfọdụ ndị ọ naghị amasị isonye n'emume a?

1) N'ihi ụdịrị ụka ha na-aga:

Maka nkwenye na mkpebi ụfọdụ ndị na-aga ụka, ha anaghị ekwe enwe aṅụrị emume ụbọchị Valentine.

N'ụka ndị ahụ, ha na-ahụta ya dịka ụbọchị 'akwamiko'; nke ha na-akọwa na akwụkwọ nsọ na-ekwu sị gbanarị.

Ha na-ahụta ya na ndị mmadụ (ọkachasị ndị agbabeghi akwụkwọ) na-eji n'ihi onyinye ha nyere ibe ha emetọsị onwe ha.

Ọmụmaatụ ụdịrị ụka a bụ ndị Ama Jehovah, bụ ndị na-ekwu na emume ndị a gụnyere ma ụbọchị ncheta ọmụmụ Kraịst bụ emume ndị ọgọmmụọ.

2) N'ihi enweghi 'ọdị gị n'obi':

Ụfọdụ ndị achọghị ịma na e nwere ihe dị ka ụbọchị Valentine n'ihi na ha na-eche na ha enweghi onye ha ga-egosi ịhụnanya.

Ha dị ihe Bekee na-akpọ 'single' ụfọdụ dịkwa 'single and searching', mana ha amaghị na ị nwekwara ike igosi ma nne na nna gị na ndị ọzọ ị hụrụ n'anya ịhụnanya, na ọ bụghị naanị ọdị gị n'obi.

Ndị ahụ na-ahụta ụbọchị Valentine dịka ụbọchị nkịtị chi fotere ka ụbọchị ndị ọzọ; ha achọghị ịma ihe mere a ga-eji kewapụta otu ụbọchị maka ngosi ịhụnanya.

Ụfọdụ bụkwa ndi enwebeghi onye gositụrụla ha ịhụnanya n'ụbọchị Valentine ọbụla.

3) N'ihi ọzụzụ ha:

N'ihi etu e si zụlite ụfọdụ ndị, emume dị ka nke a e ji egosi ịhụnanya anaghị amasị ha.

Ụfọdụ bụ ndị a dọrọ aka na ntị oge ha na-etolite ịsị ha na 'mmekọrịta na nnọkọrịta nwoke na nwaanyị adịghị mma'.

Ụfọdụ bụ ndị a gwara na nwoke na nwaanyị anaghị abụ enyi.

Ụdịrị ndị dị etu a anaghị eji ụbọchị dị etu a kpọrọ ihe n'ihi na a zụnyeghị ha ụdịrị omume ahụ n'ahụ.

4) N'ihi na ịhụnanya agwọọla ha ara:

Ụfọdụ ndị 'adapụla n'okwukwe' emume ụbọchị Valentine n'ihi etu ha si hushie anya n'ihe gbasara ịhụnanya.

Ndị a bụ ndị ọ na-amasịbu, mana n'ihi otu ihe maọbụ abụọ tara akpụ ha hụrụ n'aka ndị bụbụ ọdị n'obi ha, okwu gbasara ịhụnanya maọbụ ụbọchị ngosi ịhụnanya abụghị ha ka ị na-akọrọ.

Ha achọghị ịma ma Valentine na onwe ya osi n'ọnwụ kulie ụbọchị ahụ, n'ihi na ha achọghịkwa ịnwa aka ha n'ịhụnanya.

Akụkọ ndị a ga-amasị gị:

Ihe nkiri a maka mba ndị anaghị eme emume Valentine ga-amasị gị: