Gabon Camp: 'Anyị enweghị ọkụ, okporo ụzọ, ụlọọgwụ maọbụ ụlọakwụkwọ kamgbe afọ 1970
Otu obodo nọ n'Emene Enugwu steeti a kpọrọ "Gabon Community" akwaala arịrị na gọọmentị Enugwu agbahapụla ha n'ihe banyere akụrụngwa eji ebi ndụ.
Ha sị na ha enweghi mmiri ọṅụṅụ, ụlọọgwụ, ụlọakwụkwọ, ezi okporo ụzọ, ezi ụlọ obibi kama na ha niile bụ ụlọ aja.
Eze na-achịkọta obodo a bụ Igwe John Nomeh gwara BBC na ha si n'Ezza dị n'Ebonyi Steeti bịa biri n'ime ọhịa dị n'azụ ọdụọgbọelu Akanu Ibiam, Enugwu.
O Kwuru na ọ bụ kamgbe afọ 1970 alụchara agha Biafra ka nna ya na ndị ọzọ ya na-akọ ụgbo bịara n'obodo a ịchọ ihe afọ ga-eri ma biri zie ebe a.
Ọ sị na ụlọ dị n'obodo a ugbua ruru otu narị na iri ise, ebe ọnụọgụgụ ndị obodo karịrị otu puku, gụnyere ụmụnwaanyị na ụmụaka.
Igwe Nomeh sị na ihe mere eji a kpọ ha 'Gabon Community' bụ afọ ndị gara aga na ụfọdụ ụmụaka a mụrụ n'obodo gara Panya dị na mba Gabon ịkpata ego.
Mana ha mechara gbara aka lọta nke mere onye ọbụla ji kwekọrịta ịkpọ ebe ahụ 'Gabon Community'.
Igwe Nomeh na ndu obodo bụ John Nweke sị na ihe mere ha enweghi ụlọ Simentị bụ na ndị obodo Nike gwara ha ka ha ghara ịrụ ụlọ simentị maka na ha azụghị ala azụ.
Ihe dịka ọgụ afọ gara aga ka ndị agha ụgbọelu Naịjirịa zụrụ ala ma gwa ha ka ha arụla ụlọ simentị na ya.
Onyeisi ndị nche bụ Chinedi Nwaofia rịọrọ gọọmenti Enugwu ka e nye ha ọkụ, mmiri na ụlọọgwu iji chekwaa ndụ ha.
O kwuru na kwa mgbe kwa mgbe ka ụmnwaanyị ha na-anwụ ebe ha na-amụ nwa n'ihi enweghi ụlọọgwụ n'obodo a.
Ndị obodo sị na ugbua na ọ bụ naanị mmiri Ekulu ka ha sị enweta mmiri ọṅụṅụ.
Ihe eji mara 'Gabon Community' bụ ịkọpụta nrị dị iche iche dịka ji, akpụ nakwa akwụkwọ nrị ha na-erisi ndị bi n'Enugwu.
Ụfọdụ ndị obodo 'Gabon Community' dịka Nwaofia Chinedu na Monica Chima kwara arịrị sị na gọọmentị na-echeta ha ma oge ntuliaka ndị ndọrọndọrọ ọchịchị ruo.
Mana ngwa ngwa nke a ga-achara na ndị ndọrọndọrọ ọchịchị a na-echefu ha na-eleghi anya n'azụ.
Igwe Nomeh kwuru na ọ bụ eziokwu na ha bụ ndị ọbịa n'Enugwu mana ọ rịọrọ ka gọọmentị biko nye ha ọkụ Latrik, ụlọọgwụ, ụlọakwụkwọ na mmiri ọṅụṅụ.
Ọ gara n'ihu rịọ ka gọọmentị Enugwu Steeti nyere ha aka n'okwu banyere ịnapụ ha ala ma gbatara ha ọsọ enyemaka site n'izi ha ebe ọzọ ha ga azụ ala biri.
