Onye ọkachamara agwaala ndị Naịjirịa ha dịrị njikere maka ihe isiike

Ugo Obi-Chukwu bụ onye ọnụ na-eru n'okwu n'ihe gbasara ego gwara BBC Igbo etu ego funarịrị ụlọahia ego Naịjirịa ga-esi metụta nwa amadi.

Obi-Chukwu kwuru na ihe isiike n'abịa n'oge adịghị anya maka na ihe butere mmefu ego a bụ mgbe ndị na-achụ nta ego si esi bata na-ewepu ego ha maka etu ọnọdụ Naịjirịa si dị.

O kwuru na ọdọ ahịa ndị Naịjirịa dabere n'ego na-abata ga-enwe nsogbu nke ga-eme na ọnụ ngwa ahịa ga-arị elu ebe a ga-achụkwa ụfọdụ mmadụ n'ọrụ.

N'ọnụ ya "Ndị nta ego na-atu egwu ugbua maka ha amaghị ọdịnihu Naịjirịa, ya mere ha ji ebupu ego ha".

O kwukwara na siite n'ọnwa Juun rue ụnyahụ bụ ụbọchị 12 nke septemba, ego ruru tarịị naịra abụọ n'ọma funarịrị ụlọahịa ego Naịjirịa.

Cheta na ọkpụrụkpụ ego ruru ijeri naira 432, funarịrị ndị tinyere ego n' ụlọahịa ego Naijirịa nke a kpọrọ 'Nigeria Stock Exchange n'ụbọchị Tuuzde.

Nke a bụ nfunarị kachasị kemgbe ọnwa asatọ gara aga.

Ndị ọkachamara kwuru na ego a furu n'ihi oke egwu banyere ndọrọndọrọ ọchịchị dịka ntuliaka 2019 na-abịa nso.

Ka a zụchara ahịa ụnyaahụ bụ Tuusde, ego niile dị n'ahịa nke a na-akpọ 'Market capịtalization' ji Ijeri naira 432 gbada rue tarịị Naira 11.789 nke pụtara na o ji pasent 3..46 were daa.

Cheta na, na nsonso otu jikọrọ ụlọahịa ego a kpọrọ 'Association of Stockbroking Houses of Nigeria (ASHON)' kwupụtara n'akwụkwọ ozi odeakwụkwọ ha bụ Sam Onuokwe binyere aka kwụrụ na alaodejiji na-ede maka ndọrọndọrọ ọchịchị 2019 butere na-emetụta ka ndị mmadụ si etinye ego n'ụlọahịa ego Naijiria.

Ha rịọrọ ka ndị ndọrọndọrọ ọchịchị jide onwe ha na ire ha aka iji mee ka obi kaa ndị na-etinye ego ha n'ụlọazụmahịa ego Naijiria ma kwalite akụnaụba Naijiria.

Akụkọ ndị ga-amasị gị: