Hillary Clinton ta ce an matsa mata ta tsaya takara 2020

Hillary Clinton ta ce tana fuskantar matsin lamba ta fito takarar shugaban kasa domin kalubalantar Shugaba Donald Trump na Amurka a fadar White House.

Clinton, wadda Trump ya doke a 2016 ba ta bayyana cewa ba za ta karbi kiran ba, kamar yadda ta shaida wa BBC cewa "Ba za a taba yanke kauna ba."

Clinton mai shekara 72, ta ce a kullum takan yi tunanin irin shugabar da za ta kasance idan da ta doke Trump a zaben 2016.

'Yan takara da dama ne daga bangaren Democrats ke son fafata wa da Trump a zaben 2020.

An tambayi Clinton ko za ta sake tsayawa takara, kuma ta amsa cewa; "Tabbas zan yi tunani akai, nakan yi tunani a kullum, yadda zan iya da kuma hanyoyin samun nasara da kalubalen da ke gabana"

"Amma a yanzu haka da nake zaune da kai a nan muna tattaunawa, ba ya cikin tsarina."

Mrs Clinton ba ta yi karin bayani kan ko waye ke matsa mata lambar tsayawa takara a karo na ukun ba.

Hirar wacce aka nada a Landan na zuwa ne a yayin da take neman a san wani littafi mai suna "The Book of Gutsy Women," wanda suka rubuta shi ita da 'yarta, Chelsea Clinton.

Har yanzu dai ba a san ko wane ne zai yi nasara a jam'iyyar Democrat ba, da zai kasance shi ne wanda zai fafata da Mista Trump a watan Fabrairu, don ana ci gaba da kada kuri'ar jin ra'ayin jama'a ta jihohi.

Wa zai fafata da Trump a 2020?

Akwai sauran shekara daya kafin ranar zaben, amma tuni aka fara fafatwa don zaben wanda zai kalubalanci Mista Trump daga jam'iyyar Democrat.

Kuri'un farko-farko da aka kada na nuna cewa Ms Elizabeth Warren da Mista Joe Biden ne a kan gaba, yayin da Mista Bernie Sanders ma yake tashe sosai.

Sai dai yawancin sauran masu takarar ba a san su ba a sauran wurare kamar yadda aka san su a Birnin Washington.