Kungiyar IS ta yi sabon shugaba

Kungiyar IS ta tabbatar da mutuwar jagorata Abu Bakr al-Baghdadi kuma an bayyana magajinsa.

Kungiyar ta bayyana sunan Abu Ibrahim al-Hashemi al-Qurayshi a matsayin sabon jagoransu kuma "Khalifanta."

Wasu dakarun musamman na Amurka ne suka kai wa al-Baghdadi farmaki a gidansa da ke arewa-maso-yammacin Syria a karshen makon jiya.

Daga nan ne kuma sai jagoran IS din ya tsere zuwa wata mabuya ta karkashin kasa, inda ya kashe kansa.

A shekarar 2014 ne aka ayyana marigayin a matsayin jagoran IS lokacin da kungiyar ta karbe iko da wasu yankuna a kasashen Iraki da kuma Syria.

A wani sakon sauti, IS ta tabbatar da mutuwar kakakin kungiyar Abu al-Hasan al-Muhajir - wanda aka kashe a wani farmaki na daban, bayan wani hari da dakarun Amurka da hadin gwiwar dakarun Kurdawa suka kai masa.

Wasu suna ganin al-Muhajir wanda dan asalin Saudiyya ne a matsayin wanda aka tsara zai gaji al-Baghdadi.

Sabon kakakin kungiyar Abu Hamza al-Qurayshi ya yi kira ga Musulmi da su yi biyayya ga Abu Ibrahim al-Hashemi.