Fiye da dalibai 50 sun kamu da kwalara a wata makaranta a Kaduna

Cutar amai da gudawa ta bulla a wata makarantar kwana ta 'yammata a cikin jihar Kaduna ta Najeriya, inda rahotanni ke cewa har dalibai biyu sun rasu.

Cutar dai ta kara kamari ne a safiyar ranar Litinin a makarantar GGSS Kawo.

Rahotanni sun ce kimanin dalibai sama da 50 ne suka kamu da cutar a makarantar.

Tuni dai aka garzaya da wadanda suka kamun zuwa wani babban asibiti a Kadunan.

Kwamishinan ilimi na jihar, Alh Jafaru Sani, ya tabbatar wa da BBC cewa, kimanin dalibai 55 ne suka kamu da cutar ta kwalara a makarantar.

Alhaji Jafaru ya ce, ba a yi wata-wata ba aka kwashesu aka kai su asibitin Kawo da ke jihar.

Kwamishina ya ce, daliba daya ce ta rasu a cikin wadanda suka kamu da cutar, akasin yadda ake rade-rade cewa dalibai biyu ne.

Alhaji Jafaru Sani ya ce, cutar ta bulla ne sakamakon karancin wutar lantarki da aka shafe kwana uku ba bu a makarantar sai aka rasa ruwa sha dana sauran amfani a makarantar.

Ya ce hakan ya sa daliban suka fara zuwa wata rijiya da ke kusa da wani rafi a kusa da makarantar suna dibar ruwa.

Kwamishinan ya ce, suna kyautata zaton a wannan ruwan rijiyar ne saboda ba shi tsafta sosai suka sami cutar.

Karin bayani akan cutar kwalara

A kan kamu da cutar da kwalara sakamakon ta'ammali da gurbataccen ruwan sha da abinci ko kuma kazanta.

Jihohi da dama a Najeriya ne ke fama da bullar amai da gudawa inda har hukumomin lafiya na duniya suka kaddamar da riga-kafin cutar wadda suka ce za ta karade kasashe da dama na Afirka.