Sabuwar dokar Taliban da ta haramta jin muryar mata a bainar jama'a
Asalin hoton, Getty Images
- Marubuci, Ali Hussaini
- Sanya sunan wanda ya rubuta labari, BBC News Persian
- Lokacin karatu: Minti 5
Ƙungiyar Taliban ta Afghanistan ta amince da wasu sabbin dokoki a makon jiya, waɗanda ta ce, "za su taimaka wajen gyara tarbiyya da rage ayyukan baɗala," da suka ƙunshi hana mata ɗaga murya a bainar jama'a da bayyana fuskokinsu a waje.
Majalisar Ɗinkin Duniya ta yi Allah-wadai da waɗannan dokoki, sannan ta nuna damuwa a kan ɗabbaƙa su.
Wani babban jami'in MDD ya yi gargaɗi a ranar Lahadi cewa sabbin dokokin, "suna tarnaƙi ga ci gaban Afghanistan."
Tuni jagoran Taliban, Haibatullah Akhundzada ya tabbatar da dokokin.
Ma'aikatar Gyara Tarbiyya - wadda a da ake kira da Ma'aikatar Yaɗa Abubuwa masu Kyau da Hana Assha - ta nanata cewa babu wanda aka ɗaga wa ƙafa a wannan sababbin dokokin.
Ƙarƙashin sabbin dokokin, an ba ƴansandan gyaran tarbiyya na Taliban, "Mohtasabeen" damar bibiyar rayuwar mutanen Afghanistan - tun daga irin tufafinsu da yadda suke fitowa da abincinsu da ruwan da suke sha.
A ƙarƙashin sabuwar dokar, muryar mata ta zama "haramun" a bainar jama'a. Dokokin sun ce, "duk lokacin da mace wadda ta balaga ta bar gidanta domin yin wani abu mai muhimmanci, dole ne ta rufe muryarta da fuskarta da jikinta."
Dama can ma'aikatar tana ɗora irin waɗannan dokokin bisa la'akari da shari'ar Musulunci, sannan ta ce ta kama dubban mutane da suka karya dokokin.
Dokokin, kamar yadda Taliban ta bayyana, sun yi daidai da fahimtarsu ta shari'ar Musulunci, kuma Ma'aikatar Gyara Tarbiyya ce za ta ɗabbaƙa, kuma an yi su ne bisa dogaro da ƙudurin da shugaban addini na Taliban ya rubuta a 2022, inda yanzu aka tabbatar da shi, ya zama doka.
Me dokar ta ce a game da mata?
Dokar ta fayyace yadda mata za su rufe jikinsu, ciki har da fuskokinsu, "domin gudun jan hankalin maza da kuma baɗala."
Dokar ta ce:
- Dole mace ta rufe jikinta baki ɗaya
- Dole mace ta rufe fuskarta domin gudun "jan hankalin maza."
- Muryar mata "al'aura" ce a sabuwar dokar, don haka dole a daina jin su a bainar jama'a. Al'aura na nufin ɓangaren jiki da dole a rufe.
- Dole ba za a ji mata suna waƙa da ɗaga murya wajen karatu ba, ko da kuwa daga cikin gidansu ne.
- Kada tufafin mata su zama matsattsu, shara-shara ko gajeru.
- Dole mata su rufe fuskokinsu da jikinsu daga mazan da ba muharramansu ba.
Haka kuma an haramta wa maza kallon jiki da fuskokin mata, haka kuma an hana mata waɗanda suka balaga daga kallon maza.
Sababbin dokoki ga maza
Sababbin dokokin gyara tarbiyyar sun kuma ɗora wasu sharuɗa a kan maza.
Daga ciki akwai rufe jikinsu daga cibiya zuwa gwiwa idan suna waje, domin waɗannan wuraren al'aura ce.
Ba a amince maza su yi askin 'banza' ba, irin wanda ya saɓa da shari'ar Musulunci. Taliban ɗin ta hana masu sana'ar aski saisaye da aske gemu, inda suka ce hakan ya saɓa dokokin shari'ar Musulunci. A ƙarkashin sabuwar dokar, dole gemu ya zama yana da tsawo. Haka kuma an haramta wa maza sanya nakatayel.
Su wane ne Mohtasabeen?
Asalin hoton, Getty Images
Mohtasabeen su ne suke da alhakin tabbatar da dokokin, kuma suna aiki ne a kowace gunduma a ƙasar. Suna bibiya tare da tabbatar da ana amfani da dokokin, sannan suna kamawa tare da tuhumar waɗanda suka karya dokokin a kotu.
Bayan samar da dokar, an ƙara musu ƙarfi, musamman ganin suna da goyon bayan shugaban addini na Taliban.
Haka kuma dokar ta bai wa ƴansandan gyaran tarbiyyar damar hana direbobin tasi ɗaukar mata idan ba tare suke da wani namiji ba, kamar mahaifi da wani ɗan'uwa babba, ko kuma waɗanda suka fito ba tare da niƙabi ba.
An kuma hana maza da mata zama a kusa da juna a cikin mota.
Babu ɗaukar hoton abubuwan masu rai
Asalin hoton, QUDRATULLAH RAZWAN/EPA-EFE/REX/Shutterstock
Sabuwar dokar ta kuma ce haramun ne wallafa hotunan abubuwa masu rai, wanda ya ƙunshi zana tsuntsu, ko wata dabba ko wani mutum.
Haka kuma an haramta saya da sayar da mutum-mutumi.
Haka kuma ƴansandan gyara tarbiyyar za su bibiya tare da taƙaita amfani da rediyo, kamar jin waƙoki waɗanda "haramun" ne a shari'ar Musulunci. Haka kuma ɗauka da kallon hotunan abubuwa masu rai haramun ne.
Sai dai kuma a wani abu mai kama da tufka da warwara, ana ganin kusan dukkan jami'an gwamnatin Taliban ɗin, ciki har da Mohammad Khaleed Hanafi, wanda shi ne Ministan Ma'aikatar Gyara tarbiyyar a talabijin.
Mene ne hukunci?
Asalin hoton, Getty Images
Dokar ta ce idan mutum ya aikata "laifi" zai iya fuskantar hukunce-hukunce daban-daban, daga "nasiha a kan tsoron Allah" zuwa cin tara da zaman gidan yari na kwana uku.
Sai dai dokar na fuskantar suka.
Roza Otunbayeva, shugaban aikin agaji na MDD a Afghanistan ya ce, "Bayan gomman shekaru ana yaƙi da kuma hali na tsanani da mutane suka faɗa ciki, ai mutanen Afghanistan sun cancanci abubuwa masu kyau ne, ba barazanar zuwa kurkuku ba idan sun yi jinkirin zuwa sallah ko namiji ya kalli mace ko mace ta kalli namijin da ba muharramai ba, ko kuma don mutum ya ajiye hoton wanda yake ƙauna."
Sababbin dokokin da ba a riga an fara amfani da su ba
Gwamnatin Taliban ɗin ta ƙaƙaba dokoki, kuma babu abin da zai sa su janye daga ɗabbaƙa su a hukumance, amma sai dai a wasu sassan ƙasar, ciki har da Babban Birnin Ƙasar Kabul, har yanzu ba a ɗabbaƙa dokar sosai ba.
Wata majiya daga Ma'aikatar Gyara Tarbiyyar ta shaida wa BBC sashen Pashto cewa suna aiwatar da wasu tsare-tsare ne domin tabbatar da amfani da dokar.
Majiyar ta ce, da zarar an kammala tsare-tsaren, dokokin za su ƙara fitowa fili.
Sai dai tuni an fara amfani da yawancin dokokin a wasu sassa na ƙasar.
Ma'aikatar Gyara Tarbiyya na cikin ɓangarorin gwamnati da suka fi ƙarfi a ƙasar.
Ma'aikatar ta ce a bara, ƴansandan gyara tarbiyyar sun kama tare da tsare sama da mutum 13,000 bisa laifin saɓa dokokin shari'ar Musulunci.
