Shin Facebook na da illa ga lafiyar kwakwalwa?

Kamfanin Facebook ya bayar da sanarwar cewa zai yi wani babban sauyi a shafin domin cimma cikakkiyar hulda mai ma'ana a tsakanin masu amfani da shafin.

Shugaban kamfanin, Mark Zuckerberg ya ce bayanai daga shafukan kasuwanci da kafofin sada zumunta na dakushe damar hulda tsakanin mutane wanda kuma a cewarsa dama ce da ke da matukar muhimmanci.

Don haka ne ya ce sauye-sauyen da za a yi za su sa mutane su rage yawan lokacin da su ke batarwa a kan shafin kuma lokacin zai zama mai daraja.

Facebook ya fuskanci matsin lamba a kan yadda shafin ya ke iya zama jaraba ga wasu da kuma yiwuwar illarsa ga lafiyar kwakwalwa.

Kamfanin ya ce a sanadiyar wanna sauyin, mutane zasu rage ganin tallace tallace da sakonni daga kamfanoni.