ગુજરાતમાં આજથી વધશે વરસાદ, કયા જિલ્લામાં ભારે તો કયા જિલ્લામાં પડશે અતિભારે વરસાદ?
ઇમેજ સ્રોત, Getty Images
ગુજરાતમાં હાલ વરસાદનું જોર વધી રહ્યું છે અને આગામી બે દિવસમાં ઘણા જિલ્લાઓમાં ભારેથી અતિભારે વરસાદની આગાહી કરવામાં આવી છે.
બંગાળની ખાડીની સિસ્ટમ કે જે હાલ બાંગ્લાદેશ અને પશ્ચિમ બંગાળ પર ચારથી પાંચ દિવસ સુધી સતત સ્થિર હતી તે આગળ વધવાની શરૂઆત થઈ ગઈ છે.
હવામાન વિભાગે આગાહી કરી છે કે આ સિસ્ટમ બે દિવસમાં ગુજરાત પર આવશે અને રાજ્યમાં ધોધમાર વરસાદ પડશે.
ઝારખંડ, છત્તીસગઢ અને ત્યારબાદ મધ્ય પ્રદેશ પરથી થઈને લૉ-પ્રેશર એરિયા ગુજરાત પર આવશે અને તે બાદ તે આગળ વધીને અરબી સમુદ્રમાં જશે.
આ અઠવાડિયાથી શરૂ થયેલું વરસાદનું જોર ગુજરાતમાં આગામી સપ્તાહના મધ્ય સુધી ચાલુ રહે તેવી સંભાવના દેખાઈ રહી છે.
બીજી તરફ અરબી સમુદ્રમાં સર્જાયેલી સિસ્ટમ હાલ નબળી પડવા લાગી છે અને તે ગુજરાત પર આવે તેવી સંભાવના દેખાતી નથી. હાલ દક્ષિણ ગુજરાતથી કેરળ સુધી ઑફ શૉર ટ્રફ રેખા પણ સક્રિય છે.
ગુજરાતમાં કયા દિવસે પહોંચશે સિસ્ટમ?
ઇમેજ સ્રોત, mausam.imd.gov.in
હવામાન વિભાગે જે આગાહી કરી છે તે પ્રમાણે આખા ગુજરાતમાં આ સિસ્ટમની ભારે અસર થવાની શક્યતા છે અને તેના કારણે કેટલાક વિસ્તારોમાં વધારે વરસાદ થવાની સંભાવના દેખાઈ રહી છે.
ગુજરાત પર બંગાળની ખાડીની સિસ્ટમ 25 ઑગસ્ટની આસપાસ પહોંચશે પરંતુ તેની અસર એકાદ દિવસ પહેલાંથી જ દેખાવાની શરૂ થઈ જશે.
End of સૌથી વધારે વંચાયેલા સમાચાર
જે બાદ 26થી 28 ઑગસ્ટ એમ ત્રણ દિવસ સુધી તેની સૌથી વધારે અસર જોવા મળશે એટલે કે આખા રાજ્ય પર તેની અસર દેખાશે અને આ દરમિયાન ઘણા વિસ્તારોમાં ભારે વરસાદ પડી શકે છે.
પૂર્વ ગુજરાત અને દક્ષિણ ગુજરાત પર તેની અસર પહેલાં શરૂ થશે અને બાદમાં સૌરાષ્ટ્ર તથા કચ્છ પર તેની અસર થશે. અરબી સમુદ્રમાં સિસ્ટમ પહોંચશે ત્યારે પણ તેની અસર સૌરાષ્ટ્ર તથા કચ્છ પર દેખાશે.
સૌરાષ્ટ્ર તથા કચ્છમાં શ્રાવણ મહિનાના મેળા દરમિયાન 26થી 30 તારીખ સુધી ઘણા વિસ્તારોમાં ભારે વરસાદ થઈ શકે છે. જેમાં 29 તારીખ સુધી અનેક વિસ્તારોમાં જુલાઈમાં પડ્યો હતો તેવો ભારે વરસાદ થાવની શક્યતા છે.
હાલની સ્થિતિ પ્રમાણે આ સિસ્ટમ કદાચ 28 કે 29 ઑગસ્ટના રોજ અરબી સમુદ્રમાં પહોંચશે અને ત્યાંથી આગળ વધીને તે ઓમાન તરફ જાય તેવી સંભાવના છે. અરબી સમુદ્રમાં આગળ વધી ગયા બાદ ગુજરાતમાં વરસાદનું જોર ઘટી જશે અને હળવાથી મધ્યમ પ્રકારનો વરસાદ પડે તેવી સંભાવના છે.
સાતમ, આઠમ દરમિયાન ક્યાં ભારે વર્ષા?
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
વરસાદના હાલના રાઉન્ડના કારણે ગુજરાતમાં ચોમાસું લગભગ ચારથી પાંચ દિવસ સુધી ખૂબ જ સક્રિય રહેશે અને કેટલાક વિસ્તારોમાં પૂર જેવી સ્થિતિ પણ સર્જાઈ શકે છે. હાલ ભારતના ત્રિપુરા અને બાંગ્લાદેશમાં આ સિસ્ટમને કારણે પૂરની સ્થિતિ પેદા થઈ છે.
હવામાન વિભાગે કરેલી આગાહી પ્રમાણે 24 ઑગસ્ટના રોજ વલસાડ, નવસારી, ડાંગ, તાપી, સુરત, ભરૂચ, નર્મદા, ભાવનગર તથા અમરેલી જિલ્લામાં અતિભારે વરસાદની આગાહી કરવામાં આવી છે. જ્યારે છોટા ઉદેપુર, વડોદરા, આણંદ, ખેડા, પંચમહાલ, દાહોદ, મહીસાગર, અરવલ્લી, સાબરકાંઠા, બનાસકાંઠા, મહેસાણા, પાટણ, સુરેન્દ્રનગર, બોટાદ, રાજકોટ, જૂનાગઢ, તથા ગીર-સોમનાથ જિલ્લામાં ભારે વરસાદની આગાહી કરવામાં આવી છે. આ સિવાયના વિસ્તારોમાં પણ વરસાદ પડવાની શક્યતા છે.
હવામાન ખાતાની આગાહી પ્રમાણે, દક્ષિણ ગુજરાત અને મધ્યગુજરાત સહિત સૌરાષ્ટ્રમાં સાતમ- આઠમના તહેવારો દરમિયાન રવિવારના (25 ઑગસ્ટ ) રોજ સુરત, નર્મદા, તાપી, વલસાડ, નવસારી, ભરૂચ, દમણ અને દાદરાનગર હવેલી સહિત દક્ષિણ ગુજરાતના અમુક વિસ્તારોમાં; તથા છોટા ઉદયપુર, આણંદ, દાહોદ તથા સૌરાષ્ટ્રના અમરેલી અને ભાવનગરમાં ભારેથી અતિભારે વરસાદ નોંધાઈ શકે છે.
આ સિવાય ગુજરાતના અમદાવાદ, ગાંધીનગર, બનાસકાંઠા, પાટણ, મહેસાણા, સાબરકાંઠા, અરવલ્લી, ખેડા, અમદાવાદ, પંચમહાલ, મહીસાગર તથા સૌરાષ્ટ્રના રાજકોટ, જૂનાગઢ, મોરબી, સુરેન્દ્રનગર, ગીર સોમનાથ, બોટાદ અને દીવમાં ભારે વરસાદ પડવાની શક્યતા છે.
26 ઑગસ્ટના સોમવારે જનમાષ્ટમીનો તહેવાર છે. આ દિવસે વડોદરા, ભરૂચ અને ભાવનગરના અમુક સ્થળોએ ભારેથી અતિભારે વરસાદ પડવાની શક્યતા છે.
આ દિવસે અમદાવાદ, ગાંધીનગર, રાજકોટ, આણંદ, પંચમહાલ, દાહોદ, નર્મદા, છોટા ઉદેપુર, સુરેન્દ્રનગર અમરેલી તથા બોટાદ જિલ્લામાં ભારેથી અતિભારે વરસાદ પડી શકે છે.
આ દિવસે જામનગર, બનાસકાંઠા, મહેસાણા, પાટણ, સાબરકાંઠા, અરવલ્લી, મહિસાગર, ડાંગ, તાપી, નવસારી, વલસાડ, દમણ અને દાદરા નગર હવેલી, પોરબંદર, જુનાગઢ, મોરબી, દ્વારકા, ગીર સોમનાથ, કચ્છ તથા દીવમાં ભારે વરસાદ પડવાની શક્યતા છે.
બીબીસી માટે કલેક્ટિવ ન્યૂઝરૂમનું પ્રકાશન
