યશસ્વી જયસ્વાલ : પહેલી જ મૅચમાં સદી ફટકારનાર જયસ્વાલે પોતાને નામ કર્યા અનેક રેકૉર્ડ
ઇમેજ સ્રોત, Getty Images
- લેેખક, ટીમ બીબીસી ગુજરાતી
- પદ, નવી દિલ્હી
યશસ્વી જયસ્વાલનું વધતું કદ
- યશસ્વી જયસ્વાલે ગત વર્ષે દુલીપ ટ્રૉફીની ફાઇનલમાં 265 રનની ઇનિંગ રમી હતી
- આ વર્ષે જ માર્ચમાં ઈરાની કપની મૅચમાં 213 રન નોંધાવ્યા હતા
- યશસ્વી જયસ્વાલે કોલકતા નાઇટરાઇટર્સ સામે આઈપીએલ 2023ની એક મૅચમાં માત્ર 13 બૉલમાં આઇપીએલના ઇતિહાસની સૌથી ઝડપી અર્ધ સદી નોંધાવી
ભારત-વેસ્ટ ઇન્ડીઝ ટેસ્ટ સિરીઝમાં ઇન્ટરનેશનલ ડેબ્યૂ કરનારા બૅટ્સમૅન યશસ્વી જયસ્વાલે ઓછા સમયમાં જ એક પછી એક અનેક રેકૉર્ડ પોતાને નામ કરી લીધા છે.
ડોમિનિકાના વિંડસર પાર્કમાં રમાઈ રહેલી ટેસ્ટમૅચમાં પણ કંઈક આવું જ થયું. આગળ વાંચો કે યશસ્વીના નામે અત્યાર સુધી કયા કયા રેકૉર્ડ છે અને કઈ પરિસ્થિતિમાંથી તેઓ આ સ્તરે પહોંચ્યા છે.
પોતાની પહેલી ઇન્ટરનેશનલ મૅચમાં યશસ્વીએ અણનમ 143 રનની ઇનિંગ રમી.
શિખર ધવન અને પૃથ્વી શૉ પછી તેઓ ત્રીજા ભારતીય ઓપનિંગ બૅટ્સમૅન બની ગયા છે, જેમણે પહેલી મૅચમાં પોતાની સદી પૂરી કરી છે.
ટેસ્ટ ડેબ્યૂમાં સદી ફટકારનાર તેઓ ભારતના 17મા અને કોઈ આંતરરાષ્ટ્રીય ટેસ્ટ ડેબ્યૂ મૅચમાં સદી ફટકારનાર ભારતના સાતમા બૅટ્સમૅન બની ગયા છે.
યશસ્વીએ ઇન્ટરનેશનલ ટેસ્ટ ડેબ્યૂમાં સૌથી વધુ રન મારવાના રેકૉર્ડને પણ પોતાને નામ કરી લીધો છે.
સાથે જ યશસ્વી પોતાના ટેસ્ટ ડેબ્યૂ મૅચમાં સૌથી વધુ બૉલનો સામનો કરનારા બૅટ્સમૅન પણ બની ગયા છે.
End of સૌથી વધારે વંચાયેલા સમાચાર
આની પહેલાં ઈરાની ટ્રૉફીમાં સદી અને બેવડી સદી ફટકારનાર એકમાત્ર બૅટ્સમૅન જયસ્વાલે આઈપીએલ 2023માં પણ અનકૅપ્ડ ખેલાડી તરીકે 625 રન બનાવી રેકૉર્ડ બનાવ્યો હતો.
પાણીપુરી વેચવાથી સદી ફટકારવા સુધીની 'યશસ્વી' કહાણી
ઇમેજ સ્રોત, ANI
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
"યશસ્વી જ્યારે 11 વર્ષના હતા, ત્યારે મેં પહેલી વખત તેને રમતા જોયા હતો. તેની સાથે વાત કરીને જાણ થઈ કે તે મૂળભૂત વસ્તુઓ માટે સંઘર્ષ કરી રહ્યો છે. તેની પાસે જમવા માટે પૈસા નહોતા અને રહેવા માટે જગ્યા પણ નહોતી. તે મુંબઈના એક ક્લબમાં ગાર્ડ સાથે ટેન્ટમાં રહેતો. તે દિવસ દરમિયાન ક્રિકેટ રમતો અને રાત્રે પાણીપુરી વેચતો."
"સૌથી મોટી વાત હતી કે તે ઉત્તર પ્રદેશના ભદોહીસ્થિત પોતાના ઘરથી દૂર મુંબઈમાં હતો." આ શબ્દો છે યશસ્વી જયસ્વાલના કોચ જ્વાલા સિંહના.
વર્ષ 2020માં અન્ડર-19 ક્રિકેટ વિશ્વકપમાં પાકિસ્તાન સામે શાનદાર સદી ફટકારી યશસ્વી જયસ્વાલે ભારતની ટીમને ફાઇનલમાં પહોંચાડી હતી. તેમણે એ મૅચમાં 105 રન કર્યા હતા.
કોચ જ્વાલાસિંહ આગળ કહ્યું હતું કે, "એ યશસ્વી માટે મુશ્કેલ સમય હતો કારણકે બાળકોને પોતાનું ઘર પણ યાદ આવે છે. એક રીતે તો તેણે પોતાનું બાળપણ ગુમાવી દીધું હતું. પરંતુ યશસ્વી પોતાના જીવનમાં કંઈક કરવા માગતો હતો. મારી કહાણી પણ આવી જ હતી."
"હું પણ નાની વયે ગોરખપુરથી કંઈક કરવા માટે મુંબઈ આવી ગયો હતો. મેં એ બધું સહન કર્યું હતું જે યશસ્વી કરી રહ્યો હતો."
"તેની મુશ્કેલીને હું સમજી શકતો હતો. ઘરથી થોડા પૈસા મળતા હતા. પોતાના પરિવારને કંઈ કહી ન શકાય કારણ કે એવો ડર લાગતો કે જો પરિવારજનોને આ વિશે ખબર પડે તો તેઓ પરત ન બોલાવી લે. ત્યારે મેં નક્કી કર્યું કે હું આ છોકરાની મદદ કરીશ, તેને ટ્રેનિંગ આપીશ, તેની જરૂરિયાત પૂરી કરીશ, ત્યારથી એ છોકરો મારી સાથે છે."
ઇમેજ સ્રોત, Getty Images
તેઓ વર્ષ 2020માં ભારતની અન્ડર-19ની ટીમ દક્ષિણ આફ્રિકામાં વિશ્વકપ રમી રહી હતી ત્યારે દક્ષિણ આફ્રિકામાં હાજર હતા અને બીબીસી સાથે ખાસ વાતચીતમાં તેમણે યશસ્વીના સંધર્ષની વાત કરી હતી.
આ અન્ડર-19 વિશ્વ કપમાં યશસ્વીના પ્રદર્શન વિશે જ્વાલા સિંહે કહ્યું હતું, "જ્યારે તમે ભારત માટે આટલા મોટા સ્તર પર રમી રહ્યા હો તો, સિનિયર ટીમ હોય કે જૂનિયર ટીમ, તમારે તમારું સર્વશ્રેષ્ઠ પ્રદર્શન કરવું પડે. અન્ડર-19 વિશ્વકપમાં જે રીતે ભારત રમ્યું છે અને યશસ્વી જયસ્વાલ સારું રમ્યો એ બાબત વખાણવા યોગ્ય છે."
જ્વાલા સિંહ કહે છે, "પરંતુ તેઓ 50-50 રન બનાવ્યા પછી આઉટ થઈ રહ્યા હતા. મેં તેમને કહ્યું કે મારે સેમિફાઇનલમાં પાકિસ્તાન વિરુદ્ધ મોટી ઇનિંગ જોઈએ છે અને તેણે સદી ફટકારીને આ કરી દેખાડ્યું હતું. જ્યારે વિદેશમાં ખાસ કરીને પાકિસ્તાન વિરુદ્ધ ભારતની ટીમ સારું રમે ત્યારે બહુ સારું લાગે છે. મારા માટે આ ગૌરવની પળ છે. બધાની નજર ભારત-પાકિસ્તાન મૅચ પર રહેતી હોય છે. પાકિસ્તાન વિરુદ્ધ આવી ઇનિંગ રમે એટલે રાતો રાત હીરો બની જાય."
આઈપીએલ 2023માં પણ 'ધૂંઆધાર' બેટિંગ
ઇમેજ સ્રોત, Getty Images
આઈપીએલ 2023માં પણ કોલકતા નાઇટરાઇટર્સ સામેની એક મૅચમાં 150 રનના લક્ષ્યાંકનો પીછો કરી રહેલી રાજસ્થાન રૉયલ્સના ઑપનિંગ બૅટ્સમૅન તરીકે યશસ્વી જયસ્વાલે મેદાન પર આવતાં જ ધૂંઆધાર બેટિંગ કરી હતી અને પ્રથમ ઓવરમાં 26 રન ફટકારી દીધા હતા. જયસ્વાલે એવી તોફાની ઇનિંગ રમી કે માત્ર 13 રનમાં જ અડધી સદી ફટકારી દીધી હતી.
આ આઇપીએલની સૌથી ઝડપી અર્ધ સદી હતી, અત્યાર સુધી આ રેકૉર્ડ કે. એલ. રાહુલના નામે હતો તેમણે 14 બૉલમાં અડધી સદી ફટકારી છે. ત્રણ છગ્ગા સાત ફોર અને માત્ર 13 બૉલમાં જયસ્વાલે આઇપીએલના ઇતિહાસની સૌથી ઝડપી અર્ધ સદી નોંધાવી દીધી હતી.
આ પહેલાં આઈપીએલની 1000મી મૅચમાં પણ જયસ્વાલની 'ઝંઝાવાતી બેટિંગે' ધૂમ મચાવી દીધી. એ વખતે યશસ્વીએ 62 બૉલમાં 124 રન કર્યા હતા અને મુંબઈ ઇન્ડિયન્સ સામે પોતાની આક્રમક બેટિંગથી પ્લાનિંગ, પ્લેસમૅન્ટ અને ટાઇમિંગનો ઉત્તમ નૂમનો રજૂ કર્યો હતો.
ચેન્નઈ સુપરકિંગ્સ સામેની મૅચ દરમિયાન પણ યશસ્વી જયસ્વાલે પહેલાં જ બૉલથી આક્રમક બેટિંગ કરવાનું શરૂ કરી દીધું હતું અને પહેલી જ ઓવરમાં તેમણે સળંગ બે ચોગ્ગા મારી પોતાના ફૉર્મના સંકેત આપી દીધા હતા. એટલું જ નહીં એ મૅચમાં ચાલુ કૉમેન્ટરીએ કેવિન પીટરસને પણ યશસ્વી જયસ્વાલનાં વખાણ કરતાં કહ્યું હતું કે, “વિશ્વ ક્રિકેટમાં એવા કોઈ બૅટ્સમૅનની કલ્પના ન કરી શકાય જે જૉસ બટલરની સાથે ઓપનિંગ કરતો હોય અને તેનાથી પણ વધારે આક્રમક હોય! પણ આ વખતે જયસ્વાલ એવું કરી દેખાડ્યું.”
મહેન્દ્રસિંહ ધોનીએ પણ મૅચ બાદ કહ્યું હતું કે યશસ્વીએ આક્રમક બેટિંગ કરીને મૅચનો પ્રવાહ રાજસ્થાન તરફ વાળી દીધો હતો.
યશસ્વીએ ચેન્નઈ સામે પણ 43 બૉલમાં આક્રમક 77 રન નોંધાવ્યા હતા.
આઈપીએલ 2023ની વાત કરીએ તો હાલ યશસ્વી સૌથી વધુ રન કરનાર ખેલાડી છે અને ઑરૅન્જ કૅપ હાલ તેમના નામે છે. તેમણે 9 મૅચમાં 144.66ના સ્ટ્રાઇક રેટ સાથે 428 રન નોંધાવ્યા છે જેમાં 3 વાર અર્ધસદી એક વાર સદીનો સમાવેશ થાય છે.
