IKIBIRIRAHO, Zelensky yabwiye BBC ko Putin yatangije intambara ya gatatu y'isi kandi ko agomba guhagarikwa

Amakuru y'ikibiriraho

Didier Bikorimana na Dinah Gahamanyi

1. Haciye isaha 1Amerika: Umugabo witwaje imbunda yishwe arashwe nyuma yo kwinjira mu nkengero yo kwa Trump

   

   Ahavuye isanamu, Getty Images

   Urwego rushinzwe gucunga umutekano wa perezida n'abandi bategetsi bakuru muri Amerika (Secret Service) rwatangaje ko umugabo witwaje imbunda yarashwe nyuma yo kwinjira mu nkengero z'inzu ya Perezida w'Amerika Donald Trump iri i Mar-a-Lago muri leta ya Florida.

   Abategetsi bavuze ko uyu mugabo ucyekwa yari afite imbunda nto n'akajerikani karimo ibikomoka kuri peteroli ubwo yabonwaga ku muryango wo mu majyaruguru w'urwo rugo.

   Byabaye ku mugoroba wo ku cyumweru ubwo Perezida Trump yari ari i Washington DC.

   

   Ahavuye isanamu, Facebook

   Igitangazamakuru CBS gikorana na BBC muri Amerika cyatangaje ko cyabwiwe n'abantu benshi ko uwo ucyekwa ari Austin T. Martin, wari ufite imyaka 21, w'i Cameron, muri leta ya North Carolina.

   Ibiro bya polisi ishinzwe umutekano muri ako gace aho inzu ya Trump y'i Mar-a-Lago iri, byahaye itangazo BBC bivuga ko umuryango we wari watangaje mbere yaho ku cyumweru ko yaburiwe irengero.

   Izindi nkuru wasoma:

   Icuka kibi mu matora ya Amerika: Donald Trump yahatswe kugandagurwa ariko yarusimvye

   Perezida Trump wa Amerika avuga ko ariko yihweza ingene yokora igitero ca gisirikare gitoya kuri Irani

   Lil Poppa: Uyu muraperi ukiri muto 'wapfuye yirashe' yatumye nanone hibazwa ku bibazo byo mu mutwe mu rubyiruko

2. Haciye amasaha 2Tour du Rwanda: Abantu babiri bapfuye abandi barakomereka

   

   Ahavuye isanamu, Tour du Rwanda / X

   Ubuyobozi bw’irushanwa mpuzamahanga ry’amagare mu Rwanda, Tour du Rwanda, bwatangaje ko bubabajwe n'abantu babiri bapfuye naho abandi batandatu barakomereka mu mpanuka yabaye ku cyumweru mu gace ka Gabiro, mu burasirazuba bw'igihugu.

   Mu itangazo bwasohoye ku rubuga nkoranyambaga X, ubuyobozi bwa Tour du Rwanda bwavuze ko iyi mpanuka yabaye mu gihe iri rushanwa ngaruka mwaka ryari riri mu gace ka mbere k'iri siganwa, ubwo itsinda ry'imodoka ziherekeza abasiganwa zataga umuhanda zigonga abantu benshi bari baje kureba amagare.

   Ntabwo umwirondoro w'abantu bishwe cyangwa se abakomeretse muri iyi mpanuka watangajwe muri iri tangazo.

   Muri iri tangazo, Tour de Rwanda yagize iti: "Abakomeretse barimo kwitabwaho, ndetse turimo gukurikiranira hafi uko bamerewe."

   Tour du Rwanda ivuga ko polisi irimo gukora iperereza ku mpamvu yateje iyi mpanuka.

   Agace ka mbere k'iyi Tour du Rwanda y'uyu mwaka kegukanwe na Itamar Einhorn, Umunya-Israel ukinira ikipe ya NSN Development Team yo mu Busuwisi.

   Izindi nkuru wasoma:

   Bizasaba iki kandi bizafata igihe kingana gute ngo Abanyarwanda bongere gutwara Tour yabo?

   Umukinnyi w'igare wa Kenya uzwi cyane mu karere yapfiriye mu isiganwa muri US

   Reba ikiganiro na Marciana Mukamirenzi wamamaye mu gusiganwa ku maguru mu Rwanda

3. Haciye amasaha 2Zelensky yabwiye BBC ko Putin yatangije intambara ya gatatu y’isi kandi ko agomba guhagarikwa

   

   Ahavuye isanamu, Fred Scott/BBC

   Perezida wa Ukraine Volodymyr Zelensky akomeje gutanga ubutumwa bwo kutagamburuzwa.

   Ubwo twahuriraga mu biro bikuru bya leta mu murwa mukuru Kyiv, yavuze ko aho gutsindwa, Ukraine izarangiza intambara itsinze.

   Ntashyigikiye na gato gutanga ikiguzi ku masezerano y’agahenge gisabwa na Perezida w’Uburusiya Vladimir Putin, ari cyo gukura ingabo ahantu h’ingenzi cyane Uburusiya bwananiwe gufata nubwo bwahatakarije abasirikare babarirwa mu bihumbi za mirongo.

   Putin, ni ko Zelensky yambwiye, yamaze gutangiza intambara ya gatatu y’isi, kandi igisubizo cyonyine ni ukumwotsa igitutu gikaze cya gisirikare no mu bukungu kugira ngo ahatirwe gusubira inyuma.

   Ati: “Nemera ko Putin yamaze kuyitangiza. Ikibazo ni ukumenya ingano y’ubutaka azashobora gufata n’uburyo bwo kumuhagarika... Uburusiya burashaka guhatira isi kubaho mu buzima butandukanye no guhindura ubuzima abantu bihitiyemo.”

   Naho se ku busabe bw’Uburusiya ko Ukraine iyiha ubutaka burenga 20% by’ubutaka bwayo bwo mu karere ka Donetsk ko mu burasirazuba ikigenzura, hamwe n’ubundi butaka bwo mu turere two mu majyepfo twa Kherson na Zaporizhzhia?

   Namubajije niba ubwo atari ubusabe bwumvikana mu gihe bwaba bugejeje ku gahenge.

   Ati: “Ibi mbibona mu buryo butandukanye. Simbibona gusa nk’ubutaka. Mbibona nko gutererana – bica intege aho duhagaze, bitererana abaturage bacu babarirwa mu bihumbi amagana bahaba. Ni uko mbibona. Kandi nzi neza ko uku ‘gusubira inyuma’ kwacamo ibice sosiyete yacu.”

   Perezida wa Ukraine yaganiriye n’umunyamakuru wa BBC Jeremy Bowen mu murwa mukuru Kyiv, habura iminsi ngo habe isabukuru y’imyaka ine intambara imaze itangiye.

   Uburusiya bwagabye igitero gisesuye kuri Ukraine ku itariki ya 24 Gashyantare (2) mu 2022.

   Izindi nkuru wasoma:

   'Turasaba reta ko yodufasha uwacu akagaruka' – umuryango wa wa Murundi yafatirwa muri Ukraine

   Ubwongereza bukwiye kurungika ingabo muri Ukraine atari izo kurwana- Johnson yahoze ari umushikiranganji wa mbere

   Muri uku kwezi abanyakenya 89 bari ku rugamba muri Ukraine barwanira Uburusiya – Ubutasi bwa Kenya

4. Haciye amasaha 2Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.