Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Zinedine Zidane 'ntashishikajwe no kuba Man Utd yamuvugishije ngo abe yaba umutoza wayo'
- Umwanditsi, Guillem Balagué
- Igikorwa, Inzobere ku mupira w'Uburayi kuri BBC Radio 5 Live
Manchester United yavuganye na Zinedine Zidane ku kuba yaba umutoza wayo ariko, nkuko bivugwa n'abari hafi y'uyu Mufaransa wahoze atoza Real Madrid, ntabwo ashishikajwe no kujya i Old Trafford muri iki gihe.
Ole Gunnar Soskjaer yirukanwe na Man Utd ku cyumweru nyuma yuko ku wa gatandatu itsinzwe ibitego 4-1 kwa Watford.
Zidane yasoje inshuro ya kabiri yari atoje Real mu kwezi kwa gatanu uyu mwaka.
Yatsindiye ibikombe bitatu byikurikiranya bya Champions League hamwe n'iyo kipe kuva mu 2016.
Nyuma yo kuyivamo mu 2018, yayisubiyemo umwaka umwe nyuma yaho ayifasha kwegukana igikombe cya shampiyona ya La Liga n'igikombe cya Espagne cya Super Cup mu 2020.
Abo bamuri hafi bavuze ko uyu munyabigwi wahoze akina hagati mu kipe y'igihugu y'Ubufaransa no muri Real, ubu udafite akazi, muri aka kanya kujya muri United bitamushishikaje.
Yagiye avugwa ko ashobora kuba yatoza ikipe y'igihugu y'Ubufaransa cyangwa Paris St-Germain (PSG), kandi yahitamo muri ayo makipe mu gihe haba habonetsemo akazi.
Mauricio Pochettino, wakomeje kuvugwa nk'uwazaba umutoza wa United, ubu ni umutoza wa PSG, iyi ikaba ifitiye icyizere cyuzuye uyu Munya-Argentine ndetse ntiyigeze igira icyo ikora cyo kuba yashaka kumusimbuza Zidane.
