AfroBasket – Rwanda: Liz Mills utoza Kenya avuga ko bo 'bitsinze' atari Ivory Coast

Kenya, ifite umwihariko wo kuba ari yo kipe y'abagabo muri iri rushanwa ifite umutoza mukuru w'umugore, yatsinzwe umukino wa mbere na Côte d'Ivoire, ariko "ntiducitse intege" nkuko Liz Mills yabivuze.

Uyu ni umwe mu mikino yari yitezwe ku munsi wa kabiri wa AfroBasketball, muri Kigali Arena hari umubare ugereranyishe w'abafana ba 'team Morans' ya Kenya.

Iki gihugu cyaherukaga muri iri rushanwa mu myaka 28 ishize ubwo Kenya yari yakiriye AfroBasket ari nabwo iheruka kubera muri Africa y'iburasirazuba.

Liz Mills, Umunya-Australia uyitoza, ni we wayibigejejeho, yakoze kandi amateka yo kuba umugore wa mbere utoje ikipe y'igihugu y'abagabo ya Basketball mu mikino ya AfroBasket kuva yatangira mu myaka 60 ishize.

Ariko umukino we wa mbere yawutsinzwe ku manota 88 kuri 70, umukino batsinzwe mu duce tubiri twa nyuma kuko tubiri twa mbere twarangiye amakipe yombi anganya amanota 39 - 39.

Umukino urangiye, Liz yagize ati: "Si uku twashakaga gutangira irushanwa, nubwo twakinnye basketball nziza mu minota 25 ya mbere".

Yongeraho ati: "Ubundi simbona ko Côte d'Ivoire yadutsinze, ni twe twitsinze. Twari duhagaze neza turirara baducaho baradutsinda, bazaba ikipe ikomeye mu itsinda ryacu."

Kenya si yo mu karere gusa itaguwe neza n'intangiriro, kuko Uganda nayo yatsinzwe na Senegal mu mukino wari wabanje ku manota 93 kuri 55.

Liz Mills avuga ko agiye "gukosora amakosa yabaye no kwitegura cyane" Nigeria na Mali bari kumwe mu itsinda rimwe azahura nazo, uko zikurikiranye, ku wa gatanu no ku cyumweru.

Muri iyi mikino ikiri mu matsinda, uyu munsi ku wa kane u Rwanda rurakina umukino wa kabiri na Angola, mu gihe Misiri iza guhura na Tunisia ifite iri rushanwa riheruka.

Ubwoba bwa Covid

Muri iri rushanwa hafashwe ingamba zikomeye zo kwirinda iki cyorezo.

Amakipe n'abayashinzwe, n'abandi bakora muri iri rushanwa, bashyizwe mu mahoteli macye ubu afunze ku bandi bantu bo hanze, abayarimo nabo ntibemerewe kujya hanze yayo no hanze ya Kigali Arena, kandi bagapimwa kenshi.

Ariko ku munsi wa kabiri gusa w'irushanwa, FIBA yateye mpaga Cameroun ku mukino wari kuyihuza na Sudan y'epfo, ishinjwa 'kurenga ku mabwiriza yo kwirinda Covid'.

Bamwe mu bashinzwe iri rushanwa babwiye BBC ko hari abakinnyi n'abari hafi y'iyi kipe ya Cameroun basanzemo Covid-19.

Umwe mu bategura irushanwa utifuje gutangazwa yagize ati: "Biteye ubwoba no ku bandi ariko irushanwa rigomba gukomeza, ni ikintu abashinzwe ubuzima twizeye ko bazafata mu biganza".

FIBA ivuga ko Cameroun "tuzayibona ikina na Uganda ku wa gatanu".