Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Hatanzwe miliyari 1.41 y'amapawundi mu igura n'igurishwa ry'abakinnyi, Arsenal ni yo yasohoye menshi
Abakinnyi baguzwe ku munota wa nyuma muri Premier League batumye kuri iyi mpeshyi hasohorwa miliyari imwe na miliyoni 41 z'amapawundi, habuze gato ngo akureho umuhigo wa miliyari imwe na miliyoni 43 z'amapawundi yatanzwe mu 2017 yabaye aya mbere menshi mu igura n'igurishwa ry'abakinnyi.
Ejo ku wa kane ni wo wari umunsi wa nyuma w'igura n'igurishwa ry'abakinnyi ku mugabane w'Uburayi.
Ku munsi w'ejo wonyine, amakipe yo muri Premier League yasohoye miliyoni 170 z'amapawundi - ku masezerano y'abakinnyi 17, amasezerano y'abakinnyi bacye gutyo ku munsi wa nyuma yaherukaga ku mpeshyi ya 2009.
Igurwa rya rutahizamu Alex Iwobi na Everton kuri miliyoni 34 z'amapawundi avuye muri Arsenal ryatumye aba ari we mukinnyi uhenze uvuye mu ikipe imwe ajya mu yindi zombi zo muri Premier League ku munsi wa nyuma.
Kuva muri Manchester United ajya muri Inter Milan kwa Romelu Lukaku kuri miliyoni 74 z'amapawundi - harimo igihombo cya miliyoni imwe y'amapawundi ku yo yari yaguzwe ava muri Everton - kwatumye aba ari we mukinnyi wahenze kuri iyi mpeshyi avuye muri Premier League.
Arsenal yasohoye akayabo
Arsenal ni yo yasohoye amafaranga menshi cyane kurusha andi makipe yo mu Bwongereza mu kugura abakinnyi kuri iyi mpeshyi - miliyoni 155 z'amapawundi.
Ejo ku munsi wa nyuma w'igura n'igurishwa ry'abakinnyi, yaguze myugariro Kieran Tierney kuri miliyoni 25 z'amapawundi imukuye muri Celtic, igura na myugariro David Luiz kuri miliyoni 8 z'amapawundi imuvanye muri Chelsea.
Tottenham yaguze ku nguzanyo umukinnyi wo hagati Giovani Lo Celso imukuye muri Real Betis ndetse igura n'umukinnyi wo ku ruhande Ryan Sessegnon kuri miliyoni 25 z'amapawundi imuvanye muri Fulham.
Ariko kugambirira kugura rutahizamu Paulo Dybala imukuye muri Juventus - byari byakomeje kuvugwaho cyane ku munsi w'ejo, byo Tottenham ntabwo yabigezeho.
Watford yasohoye avugwa ko ari miliyoni 25 z'amapawundi mu kugura umukinnyi wo ku ruhande Ismaila Sarr imuvanye muri Rennes - amafaranga ya mbere menshi iguze umukinnyi.
Leicester yo yaguze umukinnyi wo hagati ukina asatira izamu Dennis Praet bivugwa ko yaguzwe miliyoni 18 z'amapawundi imuvana muri Sampdoria.
Burnley yaguze ku nguzanyo umukinnyi wo hagati Danny Drinkwater avuye muri Chelsea, Manchester City igura ku nguzanyo umunyezamu Scott Carson avuye muri Derby, naho Newcastle yongera kugura rutahizamu Andy Carroll utari ufite ikipe akinira.
