Ole Gunnar wa Manchester United, wasezereye PSG muri Champions League, ati: 'Uku ni ko tubigenza'

Ole Gunnar Solskjaer, umutoza w'inzibacyuho wa Manchester United wagejeje iyi kipe mu mikino ya kimwe cya kane cya Champions League akoze ibisa n'ibitangaza mu mukino wo kwishyura wabereye i Paris mu Bufaransa, yagize ati: "Uku ni ko tubigenza".

Romelu Lukaku yatsinze ibitego bibiri mbere yuko Marcus Rashford yinjiza igitego cya gatatu cyabonetse kuri penaliti yatanzwe umusifuzi abanje kwitabaza uburyo bwa videwo imwunganira buzwi nka VAR mu magambo ahinnye y'Icyongereza.

Byatumye Manchester United ikomeza muri iri rushanwa kubera ibitego byinshi yatsindiye hanze ugereranyije na Paris Saint-Germain bakinaga.

Manchester United yanditse amateka muri iri rushanwa rya Champions League yo kuba ikipe ya mbere ikomeje nyuma yo gutsindirwa iwayo ibitego 2-0 cyangwa birenga mu mukino ubanza.

Umutoza Ole Gunnar, wamamaye cyane kubera igitego cy'intsinzi yinjirije Manchester United mu mukino wa nyuma wa Champions League wo mu mwaka wa 1999 ubwo yari agikina muri iyi kipe, yagize ati: "Iyi ni iyi kipe. Ni uku tubigenza, iyo ni yo Man Utd".

Yongeyeho ati: "Iyi ni Champions League, ni byo ikora".

Bubaye ubwa mbere guhera mu mwaka wa 2014 Manchester United igeze mu mikino ya kimwe cya kane cya Champions League. Andi makipe ane azakina imikino ya kimwe cya kane azamenyekana ku itariki ya 12 n'iya 13 z'uku kwezi kwa gatatu, uko azahura bimenyekane ku itariki ya 15 y'uku kwezi kwa gatatu.

Ole Gunnar yagize ati: "Dushobora kugera kure. Birumvikana, turirarira, ariko tugomba gutegereza uko tombola [yuko amakipe azahura muri kimwe cya kane] igenda, ubundi tugakina uwo mukino uko uzaba umeze".

Uyu mutoza ukomoka muri Norvège yongeyeho ati: "Iri ni ryo joro ubundi Manchester United nyayo imenyereye. Twari dufite uko twapanze umukino kandi icyizere abahungu [abakinnyi] bari bafite ni cyo twari twiteze. Buri wese arabishimiye cyane".

'Twari twateganyije kuba ari twe dutsinda igitego cya mbere'

"Abakinnyi bakinnye neza cyane. Bari bafite intumbero, bakurikiza amabwiriza yose nkuko twayavuzeho mu myitozo, kandi mu kibuga bari bazi ko bagomba kugarira neza. Wari umukino urimo kunogera ijisho kwinshi".

Igitego cya mbere cyinjijwe na Lukaku umukino umaze akanya gato utangiye cyahaye icyizere Manchester United, kandi nubwo Juan Bernat yacyishyuye nyuma yaho gato, Lukaku yongejemo icya kabiri mu gice cya mbere cy'umukino, mbere yuko Rashford yinjiza penaliti yahesheje iyi kipe itike ya kimwe cya kane.

Ole Gunnar yagize ati: "Twatangiye neza cyane - twari twateganyije kuba ari twe dutsinda igitego cya mbere, ariko ntitwari twiteze ko tukibona nyuma y'iminota ibiri. Ibyo byatumye umukino ufunguka, twashakaga gutsinda ibitego byinshi".

"Twari tubizi ko biza kutugora, kugarira Kylian Mbappe na Angel di Maria. Birazwi ko iyo utanze imyanya [mu kibuga], uba wiyemeje urupfu [gutsindwa] rudashidikanywaho".

"Twarabibonye ejo [ku wa kabiri] mu mukino wahuje Real Madrid na Ajax, n'uwahuje Barcelona na PSG [mu mwaka wa 2017] - ni imikino isa kandi yerekana ko mu mupira w'amaguru, gutekereza ari ingenzi".

"Abahungu [abakinnyi] bacu ni urubyiruko kandi bafite amafu, ibintu byatwongereye imbaraga mu gihe twashakaga kiriya gitego [cya mbere]".