Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Sir Alex Ferguson agiye kongera gutoza Manchester United ku isabukuru ya 20 yo gutsindira Champions League
Manchester United yatangaje ko Sir Alex Ferguson wabaye umutoza w'icyatwa w'iyi kipe, ari we uzayitoza mu mukino wo kwizihiza isabukuru ya 20 y'umukino wa nyuma wa Champions League batsinzemo hamana Bayern Munich ibitego 2-1.
Ni umukino uzaba urimo abakinnyi bakinnye uwo mukino wa nyuma wa Champions League wo mu mwaka wa 1999 wabereye ku kibuga Nou Camp cy'ikipe ya Barcelona.
Biteganyijwe ko uyu mukino wo kwizihiza iyo sabukuru ya 20 y'iyo ntsinzi uzabera ku kibuga Old Trafford cya Manchester United, ku itariki ya 26 y'ukwezi kwa gatanu.
Biteganyijwe kandi ko umutoza w'inzibacyuho wa Manchester United, Ole Gunnar Solskjaer, wanatsinze igitego cy'intsinzi cyo minota y'inyongera y'uwo mukino wo mu mwaka wa 1999, azaba ari umukinnyi uri iyo kipe izaba itozwa - nanone - na Ferguson.
Ferguson w'imyaka 77 y'amavuko wagiye mu kiruhuko cy'izabukuru mu mwaka wa 2013, yavuze ko uzaba ari "umunsi udasanzwe".
Ni we mutoza wahize abandi bose mu mateka y'umupira w'amaguru w'Ubwongereza.
Yatwaye ibikombe 38 mu myaka 26 yamaze atoza Manchester United.
Icyo gikombe cya Champions League cyo mu mwaka wa 1999 - Manchester United itsinda Bayern Munich ku bitego bibiri byabonetse mu minota y'inyongera bitsinzwe na Teddy Sheringham na Ole Gunnar Solskjaer - ni kimwe muri bitatu yatwaye uwo mwaka, birimo na Premier League na FA Cup.
Uyu mukino wo kwizihiza isabukuru y'iyo ntsinzi, uzakinwa hagamijwe kwinjiza amafaranga agenewe umuryango ufasha wa Manchester United Foundation.
Richard Arnold, umuyobozi mukuru wa Manchester United, yagize ati: "Ibikombe bitatu byo muri 99 ni kimwe mu bihe by'ingenzi cyane kandi by'amateka akomeye y'ubuzima bwa Manchester United, ikipe yari igizwe na bamwe mu ndatwa z'ukuri mu mupira w'amaguru".
"Umukino wa nyuma na Bayern Munich ni ijoro rihora mu bitekerezo by'abafana bacu bose, kandi kuba benshi mu bawukinnye bazaba bagarutse ku kibuga Old Trafford mu kwizihiza iyo sabukuru y'icyo gikorwa gikomeye, ni ikimenyetso gikomeye kuri Manchester United Foundation n'akazi ikora".
