Josep Maria Bartomeu, Perezida wa Barcelona, avuga ko iri kwitegura igihe Lionel Messi azaba atakiyikinamo

Josep Maria Bartomeu, Perezida wa Barcelona, avuga ko uburyo iyi kipe iri kugura abakinnyi ari ikimenyetso cyuko ubuyobozi bw'iyi kipe burimo kwitegura igihe kizagera Lionel Messi akaba atakiyikinamo.

Mu kwezi gushize kwa mbere, Barça yemeje ko yamaze kugura Umuholandi Frenkie de Jong w'imyaka 21 y'amavuko ukina hagati mu kibuga, imukuye mu ikipe ya Ajax, ku giciro cya miliyoni 65 z'amapawundi.

Messi w'imyaka 31 y'amavuko, amaze gutsinda ibitego 581 mu mikino 664 amaze gukinira Barcelona.

Bartomeu yabwiye ikiganiro 5 live cya BBC ati: "Ndabizi ko umunsi umwe Lionel azavuga ko asezeye ku gukina umupira w'amaguru".

Messi aracyafite ikindi gihe cy'imyaka ibiri kuri kontaro afitanye n'iyi kipe kandi Bartomeu yavuze ko igihe cya Messi cyo gusezera ku gukina umupira w'amaguru kigifite "akanya" ngo kigere.

Ariko iyi kipe imaze gutwara igikombe cya shampiyona La Liga ya Espanye inshuro 25, ivuga ko iri gushaka kugura abakinnyi bazayifasha gukomeza kwitwara neza no mu gihe Messi azaba atakiyirimo.

Bartomeu, byitezwe ko azarangiza manda ye nka perezida w'iyi kipe mu mwaka wa 2021, yongeyeho ati: "Tugomba gutegurira ikipe ejo hazaza".

"Turi kuzana mu ikipe abakinnyi bakomeye bakiri bato kubera ko ducyeneye gukomeza iki gihe kirangwa n'intsinzi. Iyo ni inshingano yacu".

"Manda yanjye izarangira mu myaka ibiri iri imbere y'imikino. Rero ngomba gusiga ikipe ihagaze neza nkabwira perezida mushya nti, 'uwo ni umurage wacu'".

Mu mwaka wa 2017, Messi yavuze ko ari hafi kugera ku nzozi ze zo "gusoreza gukinira umupira w'amaguru wanjye mu rugo" nyuma yo gushyira umukono ku masezerano mashya yo gukinira Barça, akubiyemo ingingo ivuga ko ikipe yakwifuza kumugura yatanga miliyoni 626 z'amapawundi.

Amaze gufasha Barcelona gutwara ibikombe icyenda bya shampiyona, ibikombe bine bya Champions League n'ibikombe bitandatu by'umwami bya Copa del Rey.