Kylian Mbappe yafashije Paris Saint-Germain gutsinda Guingamp

Kylian Mbappe yatsinze ibitego bibiri mu minota ya nyuma y'umukino afasha ikipe ye ya Paris Saint-Germain kwigaranzura Guingamp, iyitsinda ibitego 3-1 mu mukino wa shampiyona ya Ligue 1 yo mu Bufaransa.

Mbappe w'imyaka 19 y'amavuko, yinjiye mu kibuga asimbuye, atsinda ibitego bibiri mu minota 8 ya nyuma y'umukino. Ku munota wa 52 w'umukino, Neymar yari yishyuye kuri penaliti igitego kimwe Paris Saint-Germain yari yatsinzwe mbere.

Mu mukino wa mbere wa shampiyona wa Paris Saint-Germain wabaye mu cyumweru gishize ikina na Caen, Mbappe yari yaruhukijwe.

Yatsinze ibitego bine mu gikombe cy'isi giheruka kubera mu Burusiya uyu mwaka cyegukanywe n'igihugu cye cy'Ubufaransa, na we atorwa nk'umukinnyi ukiri muto wahize abandi muri iryo rushanwa.

Intsinzi ya Paris Saint-Germain yayifashije gukomeza gutangirana shampiyona intsinzi, nubwo bwose iyi kipe ifite igikombe cya shampiyona y'Ubufaransa yari yabanjwe igitego ku munota wa 20 cyatsinzwe na Nolan Roux.