Seedorf yagizwe umutoza mushya w'ikipe y'igihugu ya Cameroon

Clarence Seedorf ni we wagizwe umutoza mushya w'ikipe y'igihugu y'umupira w'amaguru ya Cameroon nyuma yaho ibiganiro hagati ya Cameroon n'umutoza Sven-Goran Eriksson bitagize icyo bigeraho.

Seedorf w'imyaka 42 y'amavuko, yigeze gukinira amakipe ya Real Madrid, AC Milan n'ikipe y'igihugu y'Ubuholandi nk'umukinnyi ukina hagati mu kibuga.

Mu gutoza ikipe ya Cameroon, azaba yungirijwe na Patrick Kluivert bahoze bakinana mu ikipe y'igihugu y'Ubuholandi.

Amakuru aravuga ko igihe kontaro ye izamara atoza iyi kipe yatwaye igikombe cy'Afurika cy'ibihugu inshuro eshanu, kizatangazwa mu mpera y'uku kwezi.

Seedorf yigeze gutoza ikipe ya AC Milan yo mu Butaliyani, ikipe ya Shenzen yo mu Bushinwa n'ikipe ya Deportivo La Coruna yo muri Espanye.

Aho hose yagiye ahamara igihe kitageze ku mezi atandatu nk'umutoza.

Seedorf asimbuye kuri uyu mwanya Umubiligi Hugo Broos.

Afite igihe cy'umwaka umwe cyo kuba hamwe n'iyi kipe mbere yuko imikino y'igikombe cy'Afurika cy'ibihugu izabera muri Cameroon umwaka utaha itangira.