Senegal: Umutoza Aliou Cisse ni muntu ki?
Ahavuye isanamu, Getty Images
Senegal y'umutoza Aliou Cisse yabaye igihugu cya mbere cy'Afurika gitsinze umukino wacyo mu mikino y'igikombe cy'isi cya 2018 kiri kubera mu Burusiya aho yatsinze Polonye ibitego 2-1.
Aliou Cisse w'imyaka 42 y'amavuko, yahoze ari umukinnyi mpuzamahanga ukina ku mwanya wo hagati mu kibuga.
Atoza Senegal kuva mu kwezi kwa gatatu kwa 2015 ubwo yasimburaga umutoza w'Umufaransa Alain Giresse.
Mu gihe yakiniraga Senegal, yahamagawe mu ikipe y'igihugu inshuro 35.
Cisse yigeze kuba umutoza wungirije w'ikipe ya Senegal ndetse aba n'umwe mu batoza b'ikipe ya Senegal yitabiriye imikino ya Olympike yabaye mu mwaka wa 2012.
Yari kapiteni w'ikipe ya Senegal mu gikombe cy'isi cya 2002, icyo gihe Senegal ikaba yarageze mu mikino ya kimwe cya kane cy'irangiza.
Mu mikino yo mu matsinda y'icyo gikombe cy'isi cyo mu mwaka wa 2002, Senegal yatsinze Ubufaransa bwari bwaratsindiye igikombe cy'isi cyaherukaga.
Cisse yatangiye umupira w'amaguru akina mu ikipe ya Lille yo mu Bufaransa ndetse aza gukinira amakipe ya Paris Saint-Germain na Montpellier, nayo yo mu Bufaransa.
Ukwitwara neza kwe n'ikipe ya Senegal yari abereye kapiteni mu gikombe cy'isi cya 2002 cyabereye mu Buyapani no muri Koreya y'epfo, byatumye ahita ajya gukina mu Bwongereza.
Kuva mu mwaka wa 2002 kugera muri 2006, yakiniye amakipe ya Birmingham City na Portsmouth.
