Sudan y'Epfo yohereje ingabo muri DR Congo
Ahavuye isanamu, EACRF DRC/Twitter
Abasirikare barenga 40 ba Sudani y'Epfo ku cyumweru bageze i Goma muri Repubulika ya Demokarasi ya Congo kwifatanya n'ingabo zo mu muryango w'Afurika y'uburasirazuba (EAC) zagiyeyo kurwanya umutwe w'inyeshyamba.
Iri ni itsinda rito ribanjirije abandi bo muri 750 Sudani y'Epfo yasezeranyije bazahoherezwa.
Ku wa mbere, Sudani y'Epfo yohereje abandi basirikare 300 muri DR Congo.
Ingabo za Sudani y'Epfo ni zo za nyuma zihageze mu zemeranyijweho n'abakuru b'ibihugu bo muri EAC zo koherezwa mu burasirazuba bwa DR Congo, mu nama yabo y'i Bujumbura muri Gashyantare (2).
Bari mu mutwe w'ingabo z'ibihugu birindwi bigize umuryango wa EAC, washyizweho mu kwezi kwa gatandatu mu 2022, mu kugerageza kugarura umutekano mu burasirazuba bwa DR Congo, zigenzura ko inyeshyamba za M23 ziva mu bice zari zarafashe.
Leta ya DR Congo, raporo y'inzobere z'umuryango w'abibumbye (ONU) n'ibihugu bimwe by'i Burayi n'Amerika bishinja u Rwanda gufasha inyeshyamba za M23, ikirego u Rwanda na M23 bahakana.
Ibiro ntaramakuru AFP byasubiyemo amagambo ya Koloneli Jok Akech, wo mu ngabo za Sudani y'Epfo akaba ari no mu mutwe w'ingabo za EAC, agira ati: "Ikaze i Goma.
"Ubu muri ahandi hantu hatandukanye ho gukorera. Mugomba kuba mwiteguye".
Kuva wakongera kubura imirwano mu Gushyingo (11) mu 2021, umutwe w'inyeshyamba wa M23 wari wigaruriye ibice byinshi mu ntara ya Kivu ya Ruguru.
Muri iyo ntara, imirwano hagati ya M23 n'ingabo za leta ya DR Congo yatumye abaturage barenga 520,000 bava mu byabo barahunga, nkuko ONU ibivuga.
Gahunda nyinshi zo mu karere zigamije guhagarika imirwano zarananiwe.
Nk'urugero, amasezerano y'agahenge yagizwemo uruhare na Angola yari yitezwe gutangira gushyirwa mu bikorwa ku itariki ya 7 Werurwe (3), yahise arengwaho nk'ako kanya.
Itariki ya 30 Werurwe yari yitezwe kuba ari yo ya nyuma ku "mitwe yose yitwaje intwaro" yo kuba yamaze gusubira inyuma, nkuko bikubiye mu ngengabihe ya EAC yagezweho hagati muri Gashyantare (2), nkuko AFP ibitangaza.
Iyo tariki ntarengwa ntiyubahirijwe.
Jenerali Jeff Nyagah, Umunya-Kenya ukuriye umutwe w'ingabo za EAC, ku wa gatanu yabwiye abanyamakuru ko gahunda yo gusubira inyuma y'inyeshyamba za M23 izakorwa "mu byiciro".
