Umufaransa wigize 'hypnotherapist' arashinjwa guha abagore ibiyobyabwenge no kubafata ku ngufu

Umuburo: Iyi nkuru irimo ibisobanuro ku ihohoterwa rishingiye ku gitsina.

Umugabo ari mu rukiko mu majyepfo y'u Bufaransa ashinjwa guha abagore ibiyobyabwenge hanyuma akabakorera ihohotera rishingiye ku gitsina, ndetse no gufata amashusho ya bimwe mu vyo yabakoreraga.

Cyril Zattara, umwarimu w'imbyino wiyigishije 'hypnose' akiyita inzobere muri yo, araregwa gufata ku ngufu abagore 14 mu gihe cy'imyaka icumi, ndetse no gufata amashusho y'urukozasoni rwihishwa ku bandi bagore bagera kuri 20.

Hypnose ni uburyo bw'ubuvuzi buhuza (guhuga) ubwonko bukabushyira ku kintu kimwe, ubikora aba yahisemo mu gihe runaka. Ibi bikoreshwa akenshi n'abavura abafite ibibazo ku buzima bwo mu mutwe, ariko babyize cyangwa babihuguriwe n'ababifitiye ubushobozi.

Uyu mugabo urimo kuburanira mu majyepfo y'u Bufaransa akurikiranyweho ibyaha byo guha ibiyobyabwenge abagore babaga baje kumwivuzaho, yarangiza akabakorera ihohotera rishingiye ku gitsina, ndetse bamwe akabafata amashusho mu gihe arimo kubakorera ibyo byaha.

Cyril umaze igihe afunzwe ategereje urubanza kuva mu mwaka wa 2021, yemeye bimwe mu byaha ashinjwa, harimo no gufata abagore 10 ku ngufu.

Ni urubanza rurimo kubera mu muhezo mu mujyi wa Aix-en-Provence, ku busabe bw'umwe mu bagore bavuga ko yahohotewe, kandi biteganyijwe ko ruzamara nibura ibyumweru bibiri.

Ku rundi ruhande hari abandi bagore bifuzaga ko urubanza rwabera mu ruhame, bavuga ko bashaka ko ubuhamya bwabo bwumvwa n'abantu benshi bishoboka.

Ipereza rya polisi ryagaragaje ko Zattara yajyaga ashyira imiti isindisha mu binyobwa by'abagore mbere yo kubasambanya. Bivugwa kandi ko akenshi yabikoreraga abagore b'inshuti ze cyangwa abo yari afitanye umubano wihariye.

Abashinzwe iperereza basanze kuri mudasobwa ya Zattara amafoto n'amashusho agaragaza abagore yasambanyije ariko bigaragara ko batabaga bazi ibirimo kubabaho bigashimangira koko ko ashobora kuba yarabanzaga kubaha ibiyobyabwenge bikabaca intege.

Umugore umwe watanze ikirego muri 2019, nyuma yo kwitabira imwe mu masomo ubuvuzi bwa 'hypnose' yagombaga guhabwa na Zattara, yavuze ko yanyoye umuvinyo yari yamuhaye, hanyuma agahita ata ubwenge, akaza gukanguka nyuma atibuka neza ibyabaye, ariko akibuka mu buryo bw'ibice ko yafashwe ku ngufu na Zattara kandi ko yari arimo aruka.

DNA (uturemangingo ndangasano) ya Zattara yabonetse mu nzara z'uyu mugore no ku myenda y'imbere ye, mu gihe ibisubizo by'isuzuma ry'imiti byagaragaje ko mu mubiri we harimo imiti ikomeye itera gusinzira.

Urubanza rwa Zattara ruje rukurikira urwamenyekanye cyane rwa Dominique Pelicot, wakatiwe igifungo cy'imyaka 20 nyuma yo gusindisha no gufata ku ngufu uwahoze ari umugore, Gisèle, ndetse akanatumira abantu benshi batandukanye ngo na bo bamusambanye mu gihe cy'imyaka hafi icumi yose.