Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Arsenal 'ishobora kugera ku kintu icyo ari cyo cyose' nyuma yo gutsinda Aston Villa – Oleksandr Zinchenko
- Umwanditsi, Harry De Cosemo
- Igikorwa, BBC Sport
Umukinnyi Oleksandr Zinchenko ashimangira ko Arsenal ishobora kugera "ku kintu icyo ari cyo cyose bashaka", nyuma yuko iyi kipe y'umutoza Mikel Arteta yigaranzuye Aston Villa inshuro ebyiri ikanayitsinda, ikagarura icyizere cyo guhatanira igikombe cya shampiyona ya Premier League.
Arsenal yatsinze ibitego bibiri mu minota y'inyongera, bituma isubira ku mwanya wa mbere ku rutonde rw'agateganyo rwa shampiyona ndetse isoza imikino itatu yari imaze idatsinda.
Ollie Watkins wa Villa yafunguye amazamu ku munota wa gatanu, naho Philippe Coutinho ashyiramo igitego cya kabiri ku munota wa 31, nyuma yuko Bukayo Saka ku munota wa 16 yari yashyizemo igitego cya Arsenal cyo kunganya.
Nuko Zinchenko atuma Arsenal yongera kunganya na Villa, ubwo yatsindaga igitego cya kabiri ku munota wa 61.
Mu minota y'inyongera, umunyezamu wa Villa Emiliano Martinez yitsinze igitego nyuma yuko ishoti ikomeye yari itewe na Jorginho ikubise umutambiko w'izamu ikagaruka, umupira ugakubita ku mutwe w'uwo munyezamu ukijyana mu izamu.
Gabriel Martinelli, wari winjiye mu kibuga asimbuye, yashyizemo icya nyuma cya Arsenal izamu rirangaye kuko umunyezamu Martinez yari yagiye mu rubuga rw'amahina rwa Arsenal ubwo Villa yateraga koruneri. Umukino urangira Arsenal itsinze Villa ibitego 4-2.
Nyuma w'uwo mukino wo ku wa gatandatu, Zinchenko yabwiye igitangazamakuru BT Sport ati: "Mbere na mbere, twafashe isomo rikomeye kuri twebwe twese ko tugomba kugira icyizere kugeza ku mpera ya nyuma na nyuma.
"Nkuko nabivuze mu gihe cyashize, iyi kipe ifite abantu batangaje cyane, bashobora kugera ku kintu icyo ari cyo cyose bashaka niba tugiye gukomeza guhatana no gukomeza kwizera.
"Uko twabyitwayemo twese mu gice cya kabiri ni bwo buryo bwiza cyane dukwiye gukomeza kwitwaramo.
Nkuko Zinchenko yabivuze, Arsenal yize isomo - ishobora kubona imbaraga no kwigirira icyizere, mu gihe guhatanira igikombe cya shampiyona bigeze aho rukomeye.
Avugira kuri televiziyo BT Sport, Peter Crouch wahoze ari rutahizamu w'ikipe y'igihugu y'Ubwongereza, yagize ati:
"Abantu benshi bamaze igihe bavuga ku myitwarire ya Arsenal - [bibaza niba] ishobora gukomeza guhatanira igikombe? Kandi ibyo yabisubije uyu munsi [ku wa gatandatu]".
