Ubutasi bw'Amerika bwemeje ko Iran yinjiriye mudasobwa z'ibikorwa bya Trump byo kwiyamamaza

Abategetsi b'ubutasi bw'Amerika bemeje ko Iran ari yo yari inyuma y'igikorwa giherutse kubaho cyo kwinjira muri mudasobwa z'ibikorwa byo kwiyamamaza bya Donald Trump ku mwanya wa perezida.

Urwego rw'ubugenzacyaha rw'Amerika (FBI) n'izindi nzego za leta basohoye itangazo bahuriyeho bavuga ko Iran yahisemo kwivanga mu matora y'Amerika mu rwego rwo "guteza amakimbirane no gutesha icyizere mu nzego za demokarasi zacu".

Itsinda rishinzwe ibikorwa byo kwiyamamaza kwa Trump ryatunze urutoki Iran ku itariki ya 10 Kanama (8) uyu mwaka ku kwinjira mu butumwa bw'imbere bwaryo. Abategetsi bo muri Iran barabihakanye.

Abantu bazi iby'iryo perereza babwiye igitangazamakuru CBS News, gikorana na BBC muri Amerika, ko bacyeka ko abinjira muri mudasobwa kwiba amabanga (aba 'hackers') b'Abanya-Iran banibasiye ibikorwa byo kwiyamamaza by'umukandida w'abademokarate ku mwanya wa perezida, Kamala Harris.

Mu itangazo, abategetsi b'ubutasi muri Amerika bagize bati: "[Ubutasi] bufite icyizere ko Abanya-Iran bakoresheje uburyo bwo kubeshya ngo bagere kuri mudasobwa, hamwe n'ibindi bikorwa bakoresheje, bashatse kugera ku bantu bigerera mu buryo butaziguye ku bikorwa byo kwiyamamaza ku mwanya wa perezida by'amashyaka ya politike yombi.

"Igikorwa nk'icyo, harimo n'ubujura no gutangaza [ibyabonywe], bigamije kugena imigendekere y'amatora y'Amerika."

Amakuru avuga ko itsinda ry'ibikorwa byo kwiyamamaza bya Trump ryohererejwe ubutumwa bwo kuri 'email' bugaragara ko buvuye ku muntu wizewe bwo kubabeshya kugira ngo bakande kuri 'link', ubundi binjirirwa muri mudasobwa.

Mu cyumweru gishize, itsinda ry'ibikorwa byo kwiyamamaza bya Harris ryavuze ko na ryo ryibasiwe n'igitero nk'icyo, nubwo kitageze ku ntego.

Ibigo by'ubutasi byasohoye iryo tangazo ryo ku wa mbere, birimo FBI, ibiro by'umukuru w'ubutasi bw'Amerika, ikigo cy'umutekano wo kuri mudasobwa n'umutekano w'ibikorwa-remezo, byavuze ko amayeri yakoreshejwe "si mashya", ndetse byavuze ko Uburusiya na Iran byakoresheje uburyo nk'ubwo mu matora yabanje yo muri Amerika.

Ntibisobanutse neza amakuru – niba hari ahari, yibwe muri uko kwinjira muri mudasobwa. Trump yavuze ko aba 'hackers' bashoboye gusa kubona amakuru asanzwe aboneka ku mugaragaro.

Ibinyamakuru The New York Times, Politico na The Washington Post byavuze ko byahawe amakuru y'ibanga y'imbere mu bikorwa byo kwiyamamaza bya Trump, arimo n'ajyanye n'itoranywa ry'uwo biyamamazanya nk'umukandida ku mwanya wa visi perezida, JD Vance. Kugeza ubu ibyo bitangazamakuru byanze gutanga amakuru arambuye.

Abategetsi bo muri Amerika bavuze ko bisobanutse ko Iran yashakaga kugena ibizava mu matora, Iran yemera ko "afite ingaruka z'umwihariko ku bijyanye n'ingaruka ashobora kugira ku nyungu zayo [za Iran] z'umutekano w'igihugu".

Ibigo by'ubutasi bw'Amerika byongeyeho ko "byabonye ko igikorwa cya Iran kirimo umwete urushaho kwiyongera muri iki gihe kijyanye n'amatora".

Hashize igihe hari impungenge zirushaho kwiyongera ku bitero bishobora kugabwa n'aba 'hackers' bo muri Iran.

Mu gihe cya vuba aha gishize, kompanyi y'ikoranabuhanga Microsoft yo muri Amerika yavuze ko yabonye "kwaduka kw'igikorwa gikomeye kigamije kugena" ibintu cy'amatsinda afitanye isano na Iran.

Mu kwezi gushize, mbere yuko ava mu rugamba rwo guhatanira kuba Perezida w'Amerika ku yindi manda, itsinda ry'ibikorwa byo kwiyamamaza bya Perezida Joe Biden ryibasiwe n'aba 'hackers' bo muri Iran, ndetse n'itsinda ry'ibikorwa byo kwiyamamaza bya Trump na ryo ryaribasiwe, nkuko bitangazwa na kompanyi y'ikoranabuhanga Google.