Nashinje umupolisi kumfata ku ngufu birangira nkurikiranywe mu rukiko

Igihe Ruth yajyaga kuri sitasiyo ya polisi gushinja uwo babanaga ihohoterwa rishingiye ku gitsina, ntiyigeze atekereza ko amaherezo ari we uzafungwa aho gufunga uwarezwe.

Ruth avuga ko nyuma yo gutanga ikirego, yaje gushinjwa na polisi ko yatanze ikirego cy'ibinyoma, arafungwa ndetse aranaburanishwa. Ibi byatumye amara imyaka myinshi arwana no kuvana umugayo ku izina rye, mbere y'uko agirwa umwere.

Ruth, twahinduriye izina hagamijwe kurinda umutekano we, yatangaje ko yatanze ikirego ko yafashwe ku ngufu mu ntangiriro za 2020, nyuma y'amezi arindwi atandukanye n'umugabo we w'umupolisi. Ruth asobanura ko uwo munsi yamufashe ku ngufu ari na wo munsi wa nyuma amuheruka.

Mu kiganiro 'File on 4 Investigates' cya BBC, Ruth yagize ati: "Numvaga ko nintamurega , ntazashobora gukomeza ubuzima bwanjye ukundi."

Nubwo umugabo yashinjaga atigeze akurikiranwa mu nkiko, Ruth we yashinjwe icyaha cyo kubeshya ubutabera, icyaha gishobora guhanishwa igifungo cya burundu.

Mu Bwongereza, urwego rw'ubushinjacyaha (CPS) ruvuga ko abashinjwa gutanga ibirego by'ibinyoma ku ihohoterwa rishingiye ku gitsina ari "bacye cyane".

Imibare iheruka y'uru rwego kuva mu myaka irenga icumi ishize, yerekana ko habayeho ibirego 5,651 byo gufata ku ngufu mu Bwongereza na Wales (Pays de Galles) mu gihe cy'amezi 17 muri 2011 na 2012, ugereranyije n'ibirego 35 by'abashinjwa gutanga ibirego by'ibinyoma.

Muri icyo gihe, amabwiriza ya CPS yongeye kuvugururwa, bituma ibirego by'ifungwa ry'ibinyoma byo gusambanya ku ngufu bigabanuka.

Umuntu ushinjwa ibinyoma ko yafashe umugore ku ngufu mbere y'uko acirwa urubanza, ashobora kumara igihe runaka muri kasho ya polisi cyangwa muri gereza.

Iyo baregwa banaburana, akenshi amazina yabo ashyirwa ahagaragara. Ndetse n'iyo baburanye bakaba abere, bashobora gukomeza guhura n'ingaruka zo kwisanga mu kuburana ibyaha bisa bityo.

Amabwiriza ya CPS avuga ko ari ngombwa ko polisi yemera ingaruka mbi ibirego by'ibinyoma byo gufata ku ngufu bishobora kugira, kandi ko byo birego bigomba kwitabwaho mu buryo bukomeye.

Baratubwiye bati: "Ibyo birego birakomeye cyane", kandi "ibimenyetso bishinja bigomba kwemerwa n'abavoka bo mu nzego zo hejuru z'iryo shyirahamwe".

Mu rubanza rwa Ruth, umucamanza yavuze ko byasaga nkaho "urwo rubanza rwose rwari rushingiye ku binyoma". Yagaragaje ibibazo bikomeye ku buryo urwo rubanza rwari rwateguwe, hakubiyemo n'ikimenyetso kimwe cy'ingenzi: amajwi yafashwe mu ibanga n'uwahoze ari umugabo wa Ruth.

Kuburira: Iyi nkuru irimo amagambo yeruye kandi ateye agahinda avuga ku kirego cyo gusambanywa ku gahato

Umubano wa Ruth n'uwo mugabo ashinja wabaye uw'akanya gato ariko wari ukomeye.

Kubana kwabo kwarangiye mu mpeshyi yo mu 2019, nyuma y'imibonano mpuzabitsina iteye agahinda avuga ko ari ugufatwa ku ngufu.

Ruth yari yaremeye gukora imibonano mpuzabitsina atabishaka n'uwo mugabo, ariko avuga ko yari yarashyizeho ibintu bibiri; kimwe muri byo kikaba ari uko uwo mugabo yagombaga kurekera aho igihe cyose amubwiye ko birimo kumubabaza.

Avuga ko nyuma yaho yisubiyeho mu buryo bweruye mu gihe cy'imibonano mpuzabitsina.

Yagize ati: "Byarababazaga cyane cyane."

Ariko, yavuze ko uko yavugaga ko ababara kose, umukunzi we atigeze abihagarika.

Nyuma yaho, aba bombi batangiye kujya impaka, maze umukunzi wa Ruth amubwira ko ubucuti bwabo burangiye.

Ruth avuga ko yasigaranye ububabare bwinshi kuburyo yagiye kwa muganga we, wamwohereje mu bitaro kugira ngo bamukoreho ibizamini no kumusuzuma. Mu mutwe we, yumvaga ko yari yarafashwe ku ngufu.

Yungamo ati: "Sinari kujya gutanga ikirego kuko uwabinkoreye yari umupolisi mukuru."

Yagerageje byose ngo yiyibagize ibyabaye, ariko ubwo yari ahanganye n'ikibazo cyo kugirana imishyikirano ya bugufi mu wundi mubano yari arimo nyuma y'amezi y'ibyabaye, yahisemo gutanga ibirego byo gufatwa ku ngufu kuri polisi yo mu karere ka Warwickshire, kari rwagati mu Bwongereza.

Icyo gihe, uwahoze ari umukunzi wa Ruth akaba n'umupolisi mukuru wo mu gace ka West Midlands Police, aho rwagati mu Bwongereza, yatawe muri yombi ahatwa ibibazo, ariko ahakana ko yamusambanyije ku gahato.

Nk'ikimenyetso cy'uko imibonano mpuzabitsina yari yarabaye ku bwumvikane, yatanze amajwi yari yarafashe rwihishwa kuri telefoni ye igendanwa mu gihe cy'imibonano mpuzabitsina, ibyo yavuze ko bigaragaza ko Ruth yabeshyaga.

Nyuma byaje kugaragara ko abashinzwe iperereza muri Warwickshire bemeranyijwe na we ko bumvise asa n'useka kandi yemera, bityo ikirego cy'ihohoterwa gikurwaho.

Nyuma y'ibyumweru bitandatu, Polisi y'i Warwickshire yavuze ko nta kindi gikorwa kizakorwa ku wahoze ari umukunzi wa Ruth.

Icyakora, Ruth yaje guhamagarwa n'urwego rw'ubutasi rumusaba ko yakwitaba akabazwa ibibazo ku bushake.

Yagize ati: "Nari nzi ko mu by'ukuri bari kunshyigikira, ariko byahise bihinduka."

"Bavuze ko ndi umugore usuzuguritse kandi ko umugabo wanjye atanshakaga, akaba ari yo mpamvu nabeshye ko nafashwe ku ngufu."

Igihe Ruth yahatwaga ibibazo na polisi, ni bwo yamenye iby'amajwi y'ibanga yari yarafashwe n'uwari umukunzi we.

Mu kwezi kw'Ugushyingo (11) mu 2020, nyuma y'amezi icyenda Ruth atanze ikirego cye, yashinjwe kuyobya ubutabera.

Ukudahura kw'amakuru

Kuyobya imikorere y'ubutabera bisobanura kwivanga ku bushake mu mikorere y'ubutabera. Harimo ibyaha nko gutanga amakuru y'ibinyoma hagamijwe kurengera inshuti cyangwa umuvandimwe, gusenya cyangwa guhisha ibimenyetso, gutera ubwoba abatangabuhamya, cyangwa gutanga ikirego cy'ibinyoma.

Mu gihe hakurikiranwa ibirego bicyekwa ko ari iby'ibinyoma by'ihohoterwa rishingiye ku gitsina, inzego za polisi zo mu Bwongereza na Wales zigomba kuzamura icyemezo cyo gukurikirana urubanza ku rwego rwo hejuru, zimenyesha umuyobozi mukuru w'ubushinjacyaha.

Nk'uko amabwiriza y'ubushinjacyaha bw'Ubwongereza (CPS) abivuga, inzego zibishinzwe zigomba kuba zifite ibimenyetso byerekana ko umuntu yatanze ikirego cy'ibinyoma.

Mu rubanza rwa Ruth, uretse amajwi yafashwe, abapolisi bakoze iperereza bavuze ko habonetse kudahuza gukomeye hagati y'ibyo Ruth yavugaga mu kirego cye n'ubutumwa bwo kuri WhatsApp yari yarandikiye uwari umukunzi we, mu kwemera imibonano mpuzabitsina.

Igihe urubanza rwa Ruth rwatangiraga ku mugaragaro muri Mata(4) mu mwaka wa 2023, abanyamategeko b'ubushinjacyaha babwiye urukiko ko ayo majwi n'ubwo butumwa, hiyongereyeho imyitwarire ye mbere na nyuma y'icyo gihe, byari ibimenyetso by'uko yabeshyaga.

Bavuze ku nyandiko-mvugo (transcript) y'ayo majwi, ariko bahisemo kutayumvikanisha imbere y'abagize inteko iburanisha.

Icyakora umwunganizi wa Ruth mu mategeko, Sophie Murray, we yarayumvikanishije.

Impinduka mu cyumba cy'iburanisha

Muri ayo majwi, Ruth yumvikanaga avuga ko arimo kubabara, abwira umukunzi we ati: "Oya, rekera aho."

Amajwi yandi yarimo y'umuntu useka anezerewe ntiyigeze avugwa na Ruth.

Itsinda rimwunganira mu mategeko ryasuzumye ayo majwi risanga ayo majwi y'ibyishimo yari ay'abakinnyi bo muri filime y'urukozasoni (porn film) yavugiraga inyuma.

Ruth ati: "Mu buryo butunguranye, icyumba cyose cyarahindutse."

Yongeyeho ko bwari ubwa mbere yari yumvise amajwi yumvikanisha neza ibyamubayeho, avuga ko yari mabi cyane kurushaho ugereranyije n'uko abyibuka.

Murray wamwunganiraga icyo gihe, yavuze ko yibuka ubwo yumvaga ayo majwi mu rukiko, Ruth yicaye inyuma ye mu gice cy'abaregwa, agaragaza agahinda n'umubabaro mwinshi. Uwo mwunganizi mu mategeko yavuze ko cyari kimwe mu bihe bikomeye cyane by'akazi ke kose.

Uburyo Ruth yireguye bwashingiraga ko kwemera kwe gukora imibonano mpuzabitsina kwari gufite ibisabwa kandi ko byarenzweho.

Itegeko ryo mu 2003 rihana ihohoterwa rishingiye ku gitsina rivuga ko umuntu ashobora kwemera imibonano mpuzabitsina ashyiraho amabwiriza cyangwa ibisabwa, urugero nko gusaba ko hakoreshwa agakingirizo.

Iyo ayo mabwiriza atubahirijwe, imibonano mpuzabitsina ifatwa nk'itabayeho ku bwumvikane, bityo ikabarwa nk'ihohoterwa rishingiye ku gitsina.

Mu buhamya yatanze busobanura ingaruka byamugizeho, uwahoze ari umukunzi wa Ruth yavuze ko gushinjwa gufata umuntu ku ngufu ari inzozi mbi, anavuga ko Ruth yari yemeye neza imibonano mpuzabitsina.

Ariko mu ibazwa ryimbitse (ibizwi nka 'cross examination' cyangwa 'contre-interrogatoire') ryakozwe na Murray, yemeye ko Ruth yamusabye guhagarika iyo mibonano mu gihe yababaraga, kandi ko atabikoze.

Uwo mugabo ubu yahagaritswe by'agateganyo mu kazi ka polisi yo muri West Midlands, ariko ahembwa umushahara wose.

Hategerejwe iburanisha ku myitwarire mibi nyuma muri uyu mwaka, harebwa niba gufata amajwi mu ibanga Ruth atabizi byaranyuranyije n'amahame agenga imyitwarire ya polisi.

BBC yagerageje kumuvugisha, ariko ntiyigeze asubiza.

Abagize inteko iburanisha bafashe isaha irenzeho gato kugira ngo bagire Ruth umwere ku cyaha cyo kuyobya imigendekere y'ubutabera.

Kubera ko rutari urubanza rw'ihohoterwa rishingiye ku gitsina, icyemezo nticyasobanuraga ko bemeje ko yafashwe ku ngufu, ahubwo cyemezaga ko yizeraga ko yafashwe ku ngufu igihe yatangaga ikirego cye.

Ruth yagize ati: "Ntabwo narize, sinigeze ntaka cyane cyangwa se ngo nsakuze, ubwo basangaga nta cyaha yakoze."

Yagize ati: "Mu by'ukuri sinzi uko numvise meze."

Umucamanza yabajije ibibazo ku byemezo byafashwe n'urwego rw'ubushinjacyaha (CPS) na polisi y'i Warwickshire, anasaba ko iperereza ryo mu ntangiriro ku kirego cy'ihohoterwa risubukurwa.

Urwego rw'ubushinjacyaha rwabwiye BBC ko rufata mu buryo buremereye cyane buri kirego cy'ihohoterwa rishingiye ku gitsina, kandi ko mu bihe byihariye, nk'iki cya Ruth, ibimenyetso byasuzumwe n'abashinjacyaha benshi bo ku rwego rwo hejuru b'impuguke. Ariko uru rwego rwongeyeho ko rwubaha icyemezo cy'inteko iburanisha.

Mu itangazo, polisi y'i Warwickshire yavuze ko icyemezo cyo mu ntangiriro cyo gukurikirana Ruth ku cyaha cyo kuyobya ubutabera cyafashwe ku bufatanye n'urwego rwa CPS.

Nyuma y'urubanza rwe, iyo polisi yavuze ko hakozwe isuzuma ryimbitse kuri uru rubanza no ku iperereza ry'ibanze (ryo mu ntangiriro), rikozwe n'abapolisi bigenga kandi batigeze bagira uruhare muri dosiye zombi mbere.

Polisi yongeyeho ko habayeho no kugisha inama ubushinjacyaha bukorera mu kandi gace kugira ngo habeho kureba ibintu mu buryo bwigenga, ariko bigaragara ko hakiri ibimenyetso bidahagije byo gutuma ikirego cyo gufata ku ngufu gikurikiranwa, bityo ko icyemezo cyafashwe ari icyo gufunga iyi dosiye.

Polisi yavuze ko uwahohotewe yakomeje guhabwa amakuru mashya ku ntambwe zose z'isuzuma ry'urubanza, kandi ko ifatana uburemere bukomeye cyane amakuru yose ku cyaha cyo gufata ku ngufu, igakora ibishoboka byose mu gufasha abahohotewe.

Yanongeyeho ko hashyizweho n'umutungo n'abakozi benshi kurushaho mu gukurikirana ibirego byo gufata ku ngufu.

Itangazo rya polisi ryongeyeho ko kuba ucyekwaho icyaha cyo gufata ku ngufu ari umupolisi ukiri mu kazi bitagize ingaruka ku iperereza, ahubwo byatumye hashyirwaho inzego z'igenzura z'inyongera kugira ngo dosiye isuzumwe kuburyo burushijeho kwitonderwa.

Urwego rwa polisi rukoresha uwahoze ari umufasha wa Ruth, ari rwo West Midlands Police, rwabwiye BBC ko ko iperereza ku bijyanye n'imyitwarire ryakozwe nyuma y'urubanza rwa Ruth, kuko amaperereza yo mu nzego z'imbere muri polisi adakorwa mu gihe imanza z'inshinjabyaha zitararangira.

Iyo polisi yongeyeho ko nubwo iperereza ryakozwe vuba bishoboka, ryagombaga gukorwa rikurikije amategeko, bivuze ko imanza zikomeye cyangwa z'urusobe zishobora gufata (kumara) igihe.

Ruth yavuze ko yumva yaratengushywe n'icyemezo cyo kutaburanisha uwahoze ari umukunzi we, ariko ko aticuza kuba yaratanze ikirego ku gufatwa ku ngufu.

Yagize ati: "Nshobora kuvuga nta gushidikanya ko ibyo nakoze byose byari byiza kuri jye ubwanjye no ku bandi bantu."

"Nizeye ko nta muntu n'umwe uzisanga mu bihe nk'ibyo nanyuzemo."