Gen Olivier Gasita 'yavuye i Uvira'

Komanda wungirije w'akarere ka gisirikare ka 33 k'ingabo za DR Congo ushinzwe ibikorwa n'ubutasi, Général de Brigade Olivier Gasita yavuye mu mujyi wa Uvira ku wa kabiri mu gitondo, nk'uko byemezwa na Radio Okapi.

Iyi radiyo iterwa inkunga na ONU ivuga ko amasoko ya gisirikare yayibwiye ko Gasita yavuye muri uyu mujyi ahagana saa cyenda z'igicuku, ariko ko nta makuru arambuye ku ho yerekeje.

BBC yagerageje kuvugana na Général Major Sylvain Ekenge, umuvugizi w'igisirikare cya DR Congo, kuri aya makuru. Mu butumwa bugufi bwanditse kuri terefone yasubije ati: ''Ku rwego rwanjye, ibyo nta makuru mbifiteho. Murakoze''.

Mu mpera z'icyumweru gishize uyu yari yemeje ko igisirikare n'ubutegetsi bashyigikiye Gasita n'inshingano yahawe i Uvira.

Amakuru avuga ko umunsi n'ijoro ry'ejo ku wa kabiri byaranzwe n'ituze ndetse no kongera gutangira kw'imirimo n'ibikorwa mu mujyi buhoro buhoro.

Ni nyuma y'icyumweru cy'umutekano mucye n'imyigaragambyo muri uyu mujyi y'abaturage bashyigikiwe n'imitwe ya Wazalendo basabaga ko Gen Gasita ava muri uyu mujyi.

Gasita yatangiye ziriya nshingano mu ntangiriro z'uyu mwaka avuye i Kinshasa ajya gukorera i Bukavu mbere y'uko uyu mujyi ufatwa n'inyeshyamba za M23, we na bagenzi be bagahunga bakajya gukorera mu mujyi wa Kindu mu ntara ya Maniema.

Mu minsi ishize ubwo yategekwaga kujya gukorera mu mujyi wa Uvira, umujyi yakuriyemo, ni bwo havutse imyivumbagatanyo ishingiye ku kuba abakuriye Wazalendo bamushinja uruhare mu ifatwa ry'umujyi wa Bukavu, no gukorana na M23.

Gasita ubwe nta cyo yatangaje kuri ibi birego, ariko umuvugizi w'igisirikare yatangaje ko basanze nta ruhare Gasita yagize mu byo ashinjwa kandi ashimangira ko igisirikare n'ubutegetsi bashyigikiye koherezwa kwe gukorera mu mujyi wa Uvira.

Ikibazo 'gihangayikishije Tshisekedi'

Imyivumbagatanyo imaze iminsi i Uvira yiciwemo abantu bagera kuri bane, nk'uko bivugwa n'ibiro ntaramakuru Associated Press, yari ingingo nyamukuru y'inama yahuje Perezida Félix Tshisekedi n'abandi bategetsi bakuru b'igihugu ku wa mbere nk'uko byatangajwe na televiziyo y'igihugu, RTNC.

Ibiro ntaramakuru bya Congo, bisubiramo Vital Kamerhe ukuriye Inteko Ishingamategeko, avuga ko "umukuru w'igihugu ahangayikishijwe n'iki kibazo" kandi ko iyo nama yafashe umwanzuro wo kohereza i Uvira intumwa za leta zivuye i Kinshasa kugerageza gushaka igisubizo.

Ibinyamakuru muri DR Congo bivuga ko izo ntumwa zageze i Uvira ku wa kabiri kandi ko ziteganya gukorana inama n'abakuriye Wazalendo n'abakuriye sosiyete sivile bakomeje gusaba ko Gasita ava muri uwo mujyi, hamwe n'abakuriye iyi ntara igice kigenzurwa na leta.

Mu mpera z'icyumweru gishize bamwe mu bakuriye Wazalendo bavuze ko niba Gasita atavuye i Uvira, umupaka n'icyambu cyo ku kiyaga Tanganyika bigomba gufungwa, n'ibikorwa byose mu mujyi bigakomeza guhagarara.

Bamwe mu Banyecongo bo mu bwoko bw'Abanyamulenge bahuza ibirimo kuba kuri Gen Gasita n'ivangura, ubwicanyi n'ubugizi bwa nabi bavuga ko bakorerwa muri Congo. Bakavuga ko bigaragarira mu magambo avugwa n'abakuriye Wazalendo kuri Gasita, bajya bita abo muri ubu bwoko Abanyarwanda.

Abandi bavuga ko ibirimo kuba kuri Gen Gasita bishingiye gusa ku mpamvu z'imirimo ya gisirikare yari ashinzwe mu gihe cy'intambara na M23, no gushidikanya ko azakora neza iyo yari yoherejwe gukora mu mujyi wa Uvira.