Urukiko muri Afurika y'Epfo rwemeje ko ubu umugabo ashobora gufata izina ry'umugore we

Urukiko ruruta izindi muri Afurika y'Epfo rwemeje ko abagabo bashobora gufata amazina y'abagore bashakanye, rukuraho itegeko risanzwe ribibuza.

Ku ntsinzi ya 'couples' ebyiri z'abashakanye zatanze ikirego, Urukiko rurengera Itegekonshinga rwategetse ko itegeko ryari risanzweho "ryazanywe n'abakoloni" ririmo ivangura rishingiye ku gitsina.

Henry van der Merwe yari yarangiwe gufata izina ry'umugore we Jana Jordaan, naho Andreas Nicolas Bornman ntiyashoboraga kongera mu mazina ye Donnelly, irindi zina ry'umugore we Jess Donnelly-Bornman, nk'uko bivugwa n'ikinyamakuru cya leta SABC.

Ubu, Inteko Ishinga Amategeko igomba guhindura itegeko rizwi nka 'Births and Deaths Registration Act', kubera uyu mwanzuro w'urukiko ugomba guhita utangira gukurikizwa.

Ririya tegeko ryashyizweho muri Afurika y'Epfo ubwo iki gihugu cyari kigitegekwa na ba nyamucye b'abazungu.

Ziriya 'couples' ebyiri zareze zivuga ko ririya tegeko rishaje kandi rishyira hejuru abagabo, rigahonyora uburenganzira bungana kuri bose buvugwa n'itegekonshinga rya Afurika y'Epfo ryemejwe mu 1994 nyuma yo gukuraho ubutegetsi bwa apartheid.

Aba baregeye urukiko rw'ibanze ariko basaba ko Urukiko rurengera Itegekonshinga ari rwo rwemeza umwanzuro warwo.

Uru rukiko ruvuga ko rwasanze "mu mico myinshi y'Abanyafurika, abagore baragumanaga amazina bahawe bavuka nyuma yo gushyingirwa, kandi abana henshi barafataga amazina yo mu bwoko bwa ba nyina", ko ibi byahindutse nyuma "y'umuzo w'abakoloni b'i Burayi n'abamisiyoneri b'abakiristu, bagakwiza amahame y'iburengerazuba".

"Umuco ko umugore afata izina ry'umugabo wabaga mu mategeko y'Abaroma-n'Abaholandi, ni muri ubwo buryo wazanywe mu mategeko ya Afurika y'Epfo.

"Uwo muco kandi wabayeho nk'ingaruka z'amategeko yazanywe n'ibihugu byakolonije ibihugu bya Afurika yo munsi y'ubutayu bwa Sahara", ni ko uru rukiko rwavuze.

Rwongeraho ko Afurika y'Epfo "yateye intambwe ifatika" mu buringanire bw'ibitsina byombi, ariko ko hakiriho amategeko amwe n'amwe n'imigirire bikirangwamo "ivangura rishingiye ku gitsina".

Yaba minisiteri y'ubutegetsi cyangwa iy'ubutabera z'iki gihugu nta n'imwe yigeze yinjira muri uru rubanza irwanya ikirego cya ziriya 'couples', ahubwo izi minisiteri zemeje ko iryo tegeko bareze ritari rijyanye n'igihe.

Mu rubanza, urwego rw'abanyamategeko, Free State Society of Advocates, rwifatanyije na ziriya 'couples' ebyiri. Ruvuga ko mu kubuza umugabo gufata izina ry'umugore we itegeko riba rishimangira ivangura kuko ryima n'abagabo uburenganzira bufite abagore.