'Yarangaruye!': Bwa mbere bari kumwe Michelle na Barack Obama bavuze ku bihuha byo gutandukana kwabo

Nyuma y'amezi y'ibihuha ko batandukanye, Barack Obama wahoze ari perezida wa Leta Zunze Ubumwe za Amerika n'umugore we Michelle bwa mbere bombi bari kumwe bavuze kuri ibi byavuzwe ku rushako rwabo.

Bizeje abakunzi b'iyi 'couple' ko batigeze na rimwe batekereza gutandukana.

Mu kiganiro cya Michelle Obama na musaza we Craig Robinson kitwa "IMO" podcast, Barack w'imyaka 63 na Michelle w'imyaka 61 bateye urwenya kuri ibyo bihuha byatangiye mu mezi ashize.

Ubwo yinjiraga muri iki kiganiro ahamagawe n'umugore we, Obama, asetsa, yagize ati: "Yarangaruye [mu rugo]…hari igihe byari bigoye", Michelle aramusubiza ati: "Witangira ibyo…"

Mu ntangiriro z'uyu mwaka, uyu wahoze ari perezida wa Amerika yabonetse mu mihango ibiri y'ingenzi atari kumwe n'umugore we – gushyingura uwahoze ari perezida Jimmy Carter no kurahira kwa Donald Trump – ibyo byarushijeho gukomeza ibihuha ko yatanye n'umugore we.

Ariko bo bavuga ukuri gutandukanye n'ibyo.

"Nta na rimwe"

Michelle Obama we mbere yari yaramaze kugira ibyo atangaza kuri ibyo bihuha ku rushako rwabo.

Yavuze ko ubwe, nk'umugore wigenga, ukuze, atumva uburyo atakwihitiramo niba ajya mu bikorwa umugabo we yagiyemo cyangwa mu bikorwa bye bwite.

Yaneguye ibyo bihuha ati: "Biravugwa ko njye n'umugabo wanjye twatandukanye".

Obama we yakomeje guceceka ntagire icyo avuga kuri ibyo.

Mu kiganiro cye na musaza we, Michelle yongeye gushimangira ko urugo rwabo rumaze imyaka 32 rugikomeye.

Yagize ati: "Nta na rimwe mu rushako rwacu nigeze ntekereza guta umugabo wanjye, twaciye mu bihe bikomeye cyane, twagize ibihe byiza byinshi, ibihe bitandukanye,

"Kandi nabaye umuntu mwiza kurushaho kubera umugabo nashatse."

Barack yahise yinjira mu mujyo w'amagambo y'umugore we, aramusubiza ati: "Hoya, ntutume ndira nonaha, ikiganiro kigitangira".

Muramu we Craig Robinson yahise avuga ko yasabwe kubaza iby'urushako rwa mushiki we. Ngo "[Barack] Yamugize ate?"

Barack Obama yasetse, ku bantu bibajije ko ari we waba intandaro y'ikibazo. Ati: "Ntibanabaza ngo 'Byagenze bite?', baravuga ngo "Yamugize ate?'"

Michelle na Barack Obama bashakanye mu 1992, bafitanye abakobwa babiri, Malia w'imyaka 27 na Sasha w'imyaka 24.