Rwanda: Liliane Mugabekazi wari wafunzwe kubera uburyo yambaye yafunguwe by'agateganyo – umunyamategeko

Liliane Mugabekazi wari wafunzwe hashingiwe ku buryo yari yambaye mu gitaramo i Kigali yafunguwe by'agateganyo, nkuko umunyamategeko we yabibwiye BBC Gahuzamiryango.

Nyuma yuko ku wa kane urukiko rwari rwanzuye ko ruzatangaza umwanzuro warwo ku itariki ya 23 y'uku kwezi kwa munani ku ifunga n'ifungurwa ry'agateganyo, umunyamategeko Vincent Ndikumana wunganira Mugabekazi, kuri uyu wa gatanu yabwiye BBC Gahuzamiryango ko umukiliya we yafunguwe.

Mu butumwa bwanditse, yagize ati: "Nyuma yo kuvuga ko rwa rubanza ruzasomwa ku wa 2 urukiko rwafashe icyemezo cyo kurusoma uyu munsi maze rwemeza ko nta mpamvu zikomeye zatuma afungwa mbere y'urubanza rutegeka ko ahita arekurwa urubanza rukimara gusomwa".

Mu iburanisha ryo ku wa kane, yarezwe ibiterasoni bishingiye ku ifoto yafashwe muri icyo gitaramo. Yari yatawe muri yombi ku itariki ya 7 y'uku kwezi kwa munani.

Igitaramo Mugabekazi yitabiriye ni icy'umuhanzi w'Umufaransa ukomoka muri Cameroun, Julien Bouadjie, uzwi cyane nka Tayc.

Cyabereye mu nyubako y'imyidagaduro ya BK Arena i Kigali ku itariki ya 30 y'ukwezi kwa karindwi, cyitabirwa n'abantu babarirwa mu bihumbi.

Ku wa kane, mu rukiko rw'ibanze rwa Kicukiro, ubushinjacyaha bwamureze gukorera ibiterasoni mu ruhame, bumusabira gukomeza gufungwa iminsi 30 y'agateganyo.

Mu kwiregura, Mugabekazi yavuze ko atigeze ajya mu gitaramo yambaye ubusa kuko iyo biba ari ko byagenze abapolisi bari ku muryango w'iyo nyubako batari kuba bamwemereye kwinjira.

Yavuze ko mu gitaramo hagati ikoti rye ryaje gufunguka, umuntu atazi akamufotora, kandi ko kuba yaragaragaye yambaye gutyo byabazwa uwamufotoye.