Biden yizeje Zelensky ko Amerika izohereza imfashanyo ya miliyari $60

Perezida w'Amerika Joe Biden yizeje mugenzi we wa Ukraine ko imfashanyo ya gisirikare ya miliyari 60 z'amadolari iri mu nzira.

Iyo ngamba iracyacyeneye gutorwaho bwa nyuma mu nteko ishingamategeko, ariko Biden yabwiye Perezida wa Ukraine Volodymyr Zelensky ko yizeye ko iyo mfashanyo izemezwa.

Mbere, Zelensky yari yasabye ko igihugu cye gihabwa izindi ntwaro mu buryo bwihutirwa, mu kwirinda ko haba "amakuba" mu Burayi.

Amerika yavuze ko abasirikare ba Ukraine bavuye mu rugamba rwo mu mujyi wa Avdiivka kubera ko inteko ishingamategeko itashyigikiye Ukraine.

Gufata Avdiivka - irembo ryinjira mu murwa mukuru Donetsk w'akarere wafashwe n'Uburusiya mu burasirazuba - ni yo ntsinzi ya mbere ikomeye y'Uburusiya kuva bwafata umujyi wa Bakhmut uri hafi aho, muri Gicurasi (5) mu 2023.

Umujyi wa Avdiivka wari umaze amezi uberamo imirwano ikaze, ndetse wabaye umujyi w'urugamba kuva mu 2014, ubwo abarwanyi bashyigikiwe n'Uburusiya bafataga ibice binini by'uturere twa Donetsk na Luhansk two mu burasirazuba bwa Ukraine.

Perezida w'Uburusiya Vladimir Putin yagabye igitero gisesuye kuri Ukraine ku itariki ya 24 Gashyantare (2) mu 2022.

Mu itangazo, ibiro bya perezida w'Amerika, White House, byagize biti: "Igisirikare cya Ukraine cyahatiwe kuva muri Avdiivka nyuma yuko abasirikare ba Ukraine bibaye ngombwa ko bakoresha ibisasu bicye kuko byari birimo kugabanuka bitewe no kuba inteko ishingamategeko nta cyo yakoze."

Muri iki cyumweru, sena y'Amerika yemeje imfashanyo ya miliyari 95 z'amadolari igenewe amahanga - irimo na miliyari 60 zigenewe Ukraine - nyuma y'amezi hari amakimbirane muri politiki.

Ariko iyo mfashanyo yitezwe guhura n'urugamba rukomeye mu nteko ishingamategeko umutwe w'abadepite, aho abadepite bo mu ishyaka ry'abarepubulikani batavuga rumwe kuri iyo ngamba.

Nyuma yo kuvugana na Zelensky kuri telefone ku wa gatandatu, Biden yabwiye abanyamakuru ati: "Umva, Abanya-Ukraine barwanye gitwari cyane, bigomwe byinshi cyane kandi igitekerezo cyuko ubu, mu gihe barimo gushiranwa n'ibisasu, twabatererana - nsanga kitumvikana."

Yongeyeho ati: "Nsanga kitarimo gushyira mu gaciro, nsanga gitandukanye na buri kintu cyose turi cyo nk'igihugu.

"Rero ngiye kurwana kugeza tubaboneye ibisasu bacyeneye n'ubushobozi bacyeneye kugira ngo birwaneho."

Zelensky yanashishikarije abadepite b'Amerika kwemeza iyo mfashanyo y'amafaranga.

Yatangaje ku rubuga Telegram ati: "Ndishimye ko nshobora kwizera ubufasha bwuzuye bwa perezida w'Amerika."

Zelensky amaze iminsi mu Budage, aho yasabiye ko igihugu cye gihabwa izindi ntwaro mu buryo bwihutirwa mu rwego rwo kwirinda "amakuba" mu Burayi.

Ukraine icungira cyane ku mfashanyo y'intwaro ihabwa n'Amerika n'izindi nshuti zo mu burengerazuba, kugira ngo ishobore gukomeza kurwana n'Uburusiya - igihugu gifite abasirikare benshi kurushaho kandi gifite ibisasu bihagije by'intwaro za rutura.

Minisitiri w'ububanyi n'amahanga w'Ubwongereza David Cameron yavuze ko ubufasha kuri Ukraine bw'Ubwongereza, umuryango w'Ubumwe bw'Uburayi n'Amerika, bwakora "ikinyuranyo cya nyacyo" ku rugamba rwo kurwanya Uburusiya.